هناى توان ده‌نگ كوردستانى كورده‌يل فه‌يلى له‌ به‌غدا كپه‌و بكه‌ن

شفق نيوز

ك ده‌سڵاتدارن له‌ به‌غدا دى چشتێ له‌ ناونيمان چوى براى ك ئيمه‌ جه‌خت له‌ بانيه‌و كه‌يم، هويرده‌هويرده‌ وه‌ره‌و كزى ئه‌چێ و ئيمه‌ى كورد وه‌ سياسه‌تمه‌داره‌و تا وه‌ هه‌ر جوورو شێوه‌ى تر له‌ ناو خوه‌مان ك هايمه‌ ته‌قلا ئه‌را وه‌گ ئه‌ى برايه‌ بمێنێد، دى فايده‌ ناكاو رووژ وه‌ رووژ مه‌رجه‌يل ئه‌را ئيمه‌ ديرێد وه‌ره‌و سه‌ختى چوود.

 

ئه‌وه‌ ك دياره‌ يه‌سه‌، بازێ جار باس له‌ حزب به‌عس كه‌يم و ئويشيمن ك دڕنده‌و زاڵم بوى و  ئه‌نفالمان كردو كوشته‌مان و هه‌ركارێ وه‌ سه‌رمان هاورد. ئمجا خاس بنوڕيم، ئيمه‌ وه‌ل ياد كاره‌ساته‌يل ئه‌نفال هه‌ر له‌ كورده‌يل فه‌يلى له‌ ده‌يشت هه‌رێم تا ئه‌و دوياى ئه‌نفال له‌ ناو كوردستان، له‌ وه‌ختێ ك ئيمه‌ ديريمن ئه‌ى كاره‌ساته‌ ئه‌يرێمه‌و هويرو هايمه‌ يه‌گ ياد ئه‌زيزه‌يل له‌ ده‌س چێمان بكه‌يم. ئمجا برايلمان له‌ولاه‌و، هه‌م له‌ نوو ديرن ئايه‌يل تر له‌ ئه‌نفال ئه‌رامان تراشن و خوازن ئيجاره‌گه‌ وه‌ شێوه‌ى تر ئه‌نفالمان بكه‌ن.

له‌ سه‌رده‌م به‌عس رمياى وه‌و هه‌مگه‌ به‌دبه‌ختيه‌ ك هاورده‌ سه‌رمان، وه‌لى ده‌نگمان وه‌ هه‌ر مه‌مه‌ر يا ده‌سپێچگێ بوى له‌ به‌غدا نه‌وڕى ك ئه‌وه‌يشه‌ راديۆ كوردى بوى ك وه‌ زووان كوردى به‌رنامه‌يل خوه‌ى بڵاو ئه‌كرد. وه‌لى ئمجا خاس بنوڕيم، دوياى به‌عس گوڕوه‌گوڕ، كى هاته‌ سه‌ركار و چوين ده‌نگمان بڕين!. وه‌ ناو دموكراسيه‌ت و يه‌گ دى عيراق پا ناسه‌ ناو قۆناغێ تازه‌ و دى ديكتاتۆريه‌ت نامێنێد، ‌دوياى ئه‌ى چه‌ن ساڵه‌ ئه‌رامان كه‌م كه‌م ده‌ر كه‌فێد ك كێشه‌ى ئيمه‌ وه‌ل ده‌سڵاتداره‌يل ده‌وڵه‌ت به‌غدا به‌عسى و نيه‌زانم شێوه‌يل تر نيه‌، به‌ڵكو گێچه‌ڵ ها له‌يره‌ ك ئيمه‌ وه‌ل هويرو زه‌ينێ سه‌روكار ديريم ك به‌عس چوود ئمجا نموونه‌ى تر له‌لێ چوى سه‌نتزێ تازه‌ جيق ئه‌داو سه‌رهێز ده‌يدو هناى به‌راورديشێ گريم، دوينيم جياوازى ئه‌وقه‌ره‌ى له‌ ناونى هويچ كاميان نيه‌. هه‌ر كاميان وه‌ شێوه‌يل جياواز توان له‌ ناومان بوه‌ن. ئمجا ئيرنگه‌ ئه‌رامان له‌ به‌غدا چ خه‌وێ دينه‌!.

يه‌كم يه‌گ يانه،‌ كوردێ له‌ به‌غدا خوازن ك وه‌ل خوه‌يانا بوودو له‌ژێرفه‌رمان وان بوود وه‌ى مانا ك ته‌عريب وه‌ شێوه‌ى تر هه‌روه‌رده‌وام بوود. ئمجا كوردگيش ك‌ ده‌يشت له‌ خوه‌يان بوود، وه‌ شێوه‌ى تازه‌ى ته‌كفيرێ بكه‌ن.

فره‌ سياسه‌ته‌يل نه‌رم هناى ك وه‌ ده‌م مانه‌و خه‌نين، ژێروه‌ژێر له‌ دژمان وه‌ كار هاوردن و تيه‌ر‌نيش.

ئيمه‌ى كورد ئه‌گه‌ر ئارشيۆێ فكرى داشتويم، له‌ دوياى پرۆسه‌ى ئازادى ئيمه‌و ئيهتلال برايل عه‌ره‌ومان، چوى فيلمێ باريمه‌ وه‌رچه‌و، هه‌ له‌ ده‌وڵه‌ت دروس كردن و پاراستن سيسته‌م عيراق و تا رێخسن شيعه‌و سونى، فره‌ ته‌قلا ئه‌را يه‌ كرديم تا عيراق له‌ته‌و نه‌ود. سه‌ركرده‌يل ئيمه‌ هه‌ له‌ى ته‌قلا بوين ك نه‌يلن له‌ يه‌ك بپاشيه‌ن، چوين ك يه‌ زانسن ك قوروانى جه‌ڕمه‌جه‌ت ئه‌ى لايه‌نه‌يل هه‌ مه‌ردم بێ تاوان به‌دبه‌خت عيراقن. وه‌لى له‌ يه‌ ئاگا نياشتن ك وه‌ى پاكيه‌و هناى وه‌ل وانا ره‌فتار كه‌ن، ئه‌وان مننه‌ كوڵژدم و ئيچنه‌ ياد گرتنه‌ ك بايه‌د هه‌ ژار خوه‌يان بڕشنن و خاسى و گه‌نى له‌ لايان يه‌كسانه‌. يه‌ وه‌ گشتى سياسه‌تێ بوى ك له‌وه‌رايوه‌ر‌ ئيمه‌ى كورد وه‌ كار ئه‌يرن. ئمجا بايمه‌و سه‌ر كورده‌يل فه‌يلى، خوو له‌ هه‌رقۆناغێ له‌ دوياى پرۆسه‌ ئازادى عيراق خوه‌مان، توانسه‌ ئيمه‌ له‌ برايلمان ك هويچ، له‌ ناسنامه‌ى كوردى ك ديريم، دويره‌و بخه‌ن.

له‌ يه‌ ده‌س وه‌پێ كردن ك ئويه‌ هيچ جى له‌ كوردستان نه‌يرين و... ئويه‌ وه‌رجله‌ يه‌گ كوردبوين شيعه‌ين و... ئويه‌ بايه‌د وه‌ل ئيمه‌ بوين چوين ك هاوساى ديواروه‌ ديواريم و ماڵ يه‌كيم... ئويه‌ له‌ فه‌رهنگ ئيمه‌ نزيكين و...تد!. ئمجا ئه‌را ئه‌ڵوژاننه‌يل و ده‌نگيش، چوى باوگ و داڵگێ ك ئه‌را روڵه‌ى جوانه‌مرگێ گيره‌ ئه‌كا، ئه‌را ئيمه‌يش شويه‌پگ شويه‌پگ ئه‌سر له‌ چه‌و وارين و ... ئمجا دوياى وه‌ ئه‌را كاڵه‌و كردن هێزمان و له‌ يه‌ك پاشنان هه‌ست يه‌كگرتێ بوينمان چوى نه‌ته‌وه‌ى كوردو كوردستانى بوينمان، چوى مكون خاص ناو نانه‌ سه‌رمان!. ئمجا گاڵ دانه‌و پيمان و هه‌ڕه‌شه‌ له‌ ليمان كردن و وه‌خت ئه‌رامان ديارى كردن ك بايه‌د له‌ به‌غداو باشوور عيراق ده‌رچيمن!.

دوياى يانه‌، ئمجا ده‌س كردن وه‌ ترۆر چه‌ن‌ كه‌سێ له‌ليمان و چه‌ن ئارمانج سياسى شوم له‌لێ داشتن.

ئمجا يانه‌ وه‌ ئه‌ساس ئه‌و پيلانه‌ ك داشتن، هه‌م گام وه‌ره‌ونوا ئه‌ڵگرتن و ته‌نيا ده‌نگ كوردو كوردستانى له‌ به‌غدا، خوازن كپيه‌و بكه‌ن.

دوياى پرۆسه‌ى ئازادى و به‌سين راديۆ كوردى له‌ به‌غدا، راديۆ شه‌فه‌ق له‌داڵگ په‌يا بوى و له‌ سه‌خترين مه‌رجه‌يل، ئه‌ى راديۆه‌ وه‌ ئستراتيجى ره‌سانن ده‌نگ براى له‌ ناونى عه‌ره‌و كورد كار خوه‌ى وه‌رده‌وام كردو چوى ئه‌خلاقێ كوردايه‌تى خوازيه‌و ئه‌خوازێ جياوازى و هوير شوڤينسيتى له‌ ناو بوه‌يدو له‌ى‌ سه‌رده‌م ك قه‌يرانێ چوى ناسنامه‌ گشت جه‌هان گرتيه‌سه‌و وه‌ر ك يه‌كێ له‌ فاكته‌يل ناسنامه‌ ك زووان و فه‌رهه‌نگه‌، نه‌يليد له‌ ناو بچوودو كورديل ده‌يشت له‌ هه‌رێم كوردستان وه‌ تايبه‌ت نيشته‌جيه‌يل به‌غدا، له‌ هه‌ليان و له‌ ناوچين ره‌زگار بكا.

وه‌لى خوو يه‌يشه‌ وه پيمان ره‌وا نه‌يرن و توان ئيمه‌ هه‌م له‌ نوو بخنه‌ وه‌ر جينۆسايدێ تازه‌ وه‌ هه‌رجوورێ بخوازن و ئه‌گه‌ريش ئه‌رايان ئه‌ڵكه‌فت له‌ ناومان بوه‌ن.

ئيمه‌ى كورد دى تاقه‌ت ئه‌يوب راس كرديمه‌و هه‌ هێمان وه‌ مل قه‌وه‌رێ ك مردگێ له‌تێ نيه‌، شين و گيره‌ كه‌يم. ئيمه‌ پسا دوينيمن ك يه‌ك وه‌ يه‌ك سوينه‌يل ماڵگه‌مان كيشنه‌و تا بڕميه‌يم.

ئايا ئيمه‌ دوياى ئه‌ى هه‌مگه‌ كاره‌ ك ديرن وه‌لمان ئه‌كه‌ن، وه‌خت وه‌ ناتيه‌ تا سنوورێ ئه‌رايان بنه‌يم و نه‌يليم كار بره‌سيده‌ ئه‌و جيه‌ ك دى كارێ ئه‌و بان ده‌سمان نايدو له‌ ده‌سمان ده‌ر چويدو بترازيه‌يدو ئمجا هه‌م  چوى گوزه‌يشته‌ى پڕكاره‌ساتێ ك ديريمن، كاره‌ساتێ تر بارنه‌ سه‌رمان و كلگ ئاخ بوه‌يمه‌وده‌م و  هه‌ هناس سه‌رد بكيشيم.

شۆڕش شاواز