دویر له‌ ڕاسى نزیك له‌ خه‌و... تا تویه‌نید بخه‌ن!!

شفق نيوز

شاریایه‌ له‌ ناو دڵ و ده‌روین و ئه‌قڵ و هووش تاكه‌ كه‌س و كوومه‌ڵگا و وه‌ل پرۆپاگه‌نده‌ (دعایه‌)  به‌شیگه‌ له‌ چه‌كیگ فره‌ سه‌خت ك دژ وه‌ دوشمنه‌یل و نه‌یاره‌یل وه‌كار تیه‌ریه‌ید چوینكه‌ مه‌سه‌له‌ى په‌رش و بڵاوبوینى له‌ ناو مه‌ردم وه‌خت فره‌ كه‌میگ وه‌پى چوود و ئه‌و نوكته‌ ك ئمڕوو له‌ شاریگ یا له‌ وڵاتیگ ده‌رچوود دویاى چه‌ن سه‌عاتیگ له‌ دونیا وه‌ گشتى بڵاوه‌و بوود، چ ده‌ماى ده‌م بوود یا وه‌ ئامێره‌یل په‌یوه‌ندى ك ته‌كنۆڵۆجیاى نوو فره‌ ئاسانیه‌و كردیه‌...

ئیمه‌ له‌یرا نیه‌توایم بووه‌یمنه‌دانه‌ بان ده‌ور نوكته‌ له‌ جه‌نگ و مرافه‌ى ناوبه‌ین وڵاته‌یل و هاوپه‌یمانه‌یل و دوشمنه‌یلیان... وه‌لى له‌یرا جوور وچانیگ له‌ ژیانمان دزیمنه‌ى و ئه‌را ئه‌وه‌گ بزگه‌یگ له‌ بان لیوه‌یل ئیوه‌ى خوه‌شه‌ویس ڕه‌سم بكه‌یمن بیلا وه‌یه‌كه‌و ئه‌ى نوكته‌یله‌ بخوه‌نیمنه‌و:

*ئویشن ژنیگ له‌ فه‌رمانبه‌ریگ كۆمپانیاى ته‌ئمین پرسى: ئه‌گه‌ر كارتیگ ته‌ئمین له‌ بان ژیان شویه‌گه‌م بسینم، وئى ڕووژ تر شویه‌گه‌م بمرى، له‌ى حاڵه‌ته‌ چه‌ حاسڵ كه‌م؟.

فه‌رمانبه‌ره‌گه‌یش یه‌كسه‌ر وت: یا ملد كریه‌یده‌ په‌ته‌و، یا بیس وپه‌نج ساڵ زندان حاسڵ كه‌ید!!.

* ئویشن پیاویگ خه‌ویگ دى و هات ئه‌را ڕه‌فیقه‌گه‌ى باسى كرد (ك پیاویگ ڕه‌زیل و ڕشكنبوى) و وت:" دویه‌شه‌و له‌ى خه‌ومه‌، سه‌د هه‌زار دینار وه‌ قه‌رد له‌لید داواكردمه‌ و تونیش ئى پویله‌ دایده‌سه‌ پیم، نیه‌ویشیده‌ پیم یه‌ مه‌عناى چه‌س؟ ئه‌ویش وت : نیه‌زانید یه‌ مه‌عناى چه‌س؟ بیلا خوه‌م ئه‌راد بویشم... یه‌ مه‌عناى ئه‌وه‌سه‌ ك تو خه‌و دیده‌!!!

*ئویشن ژنیگ خه‌ریك هه‌وڵ و ته‌قه‌لاداین بوى ئه‌را مه‌شقداین سه‌گه‌گه‌ى و وه‌خت فره‌یگ وه‌لیا وه‌ خه‌سار دا وه‌بى فایده‌، و تواست دوباره‌ هه‌وڵ بیه‌ید؛ له‌یرا پیاوه‌گه‌ى وته‌ پى: ژنه‌گه‌ دى واز بار، تو قه‌ت سه‌رنیه‌كه‌فید له‌ هووكاره‌ كردن ئى سه‌گه‌، دى ئه‌را خوه‌د وه‌لیا شه‌كه‌ت كه‌ید؟

ژنه‌گه‌یش وت :ئه‌را واز بارم، له‌ هویرده‌و چوى وه‌ختى شوى كردمه‌ پید، چه‌نى زه‌حمه‌ت وه‌لدا كیشام، تا هووكاره‌د كردم؟!!

*ئویشن كابرایگ سه‌یاره‌گه‌ى وه‌ توندى(سورعه‌ت) شێتانه‌یگ ڕانستیاد، و له‌یرا پۆلیسیگ هاتوچوو نواى گرد و وسانه‌ى،... پیاوه‌گه‌ له‌ پۆلیسه‌گه‌ پرسى: ئه‌را وسانیده‌م؟ ئه‌را من فره‌ خێرا (سه‌ریع) ڕانستیام؟ پۆلیسه‌گه‌یش وت:" نه‌ وه‌ڵڵا تو فره‌ سه‌ریع نه‌وید، تو قردگى له‌ بان زه‌ویه‌گه‌وه‌ باڵه‌و گردوید!!!!"

* ئویشن ژنیگ وته‌ شویه‌گه‌ى:" من هه‌رجارى ته‌ماشاى جامه‌ك كه‌م، خوه‌م جویر مانگ چوارده‌شه‌و دوینم، ئایا ئه‌یه‌ غرووره‌؟ ئه‌ویش وت:" نه‌وه‌ڵڵا غروور نیه‌، یه‌ ئویشنه‌ پى كوورایى!!!"

 

ماجد سوێره‌مه‌يری