شار مه‌نه‌لى و پشتگووشخستن وه‌دڵئه‌نقه‌ز

شفق نيوز

كووچوه‌پیكردن هاتنه‌ وه‌دریژى ساڵه‌یل گوزه‌یشته‌ و 35 ساڵ له‌ سه‌رده‌م ڕژیم وه‌رین، و له‌ى ماوه‌ى دریژه‌ هویچ هاووڵاتییگ له‌ مه‌نه‌لى نه‌تویه‌نست ئه‌وه‌گ له‌ ئان جه‌نگ ناوبه‌ین عیراق و ئیران له‌ساڵه‌یل (1980- 1988) ویران كریا دوباره‌ ئاوه‌دانه‌و بكه‌ید یا دوباره‌ خاسیه‌و بكه‌ید، له‌ هه‌مان وه‌ختیش ئه‌و كووچوه‌پیكریایه‌یله‌ ك ئه‌را شاره‌گه‌ هاتنه‌سه‌وه‌ تویش مه‌ینه‌تى قه‌یران نیشته‌جابوین گه‌ورایگ هاتنه‌ دویاى ساڵه‌یل دویر و دریژ ناهمێرى و غه‌ریبى وجیاوازى كردن و دوچه‌وه‌كى كردن ڕه‌گه‌زپه‌رستى له‌ لایه‌ن ڕژیم وه‌رین، و ئى كووچوه‌پیكریایه‌یله‌ شوونیگ نه‌ینه‌سه‌وه‌ له‌تى ماوابگرن و گشت كاره‌یل ئاوه‌دانكردن شاره‌گه‌ هیمان ئه‌را هاووڵاتیه‌یل نادیاره‌ و نیه‌زانن ك ئه‌و بڕ پویله‌یل فره‌ ك له‌ لایه‌ن پارێزگاى دیاله‌ له‌ چوارچیوه‌ى بودجه‌ى گشتى پارێزگاگه‌ ئه‌را مه‌نه‌لى ته‌رخان كریایه‌ چه‌وه‌پى هاتیه‌، ئه‌وه‌ بیجگه‌ ئه‌و پویله‌ ك له‌لایه‌ن حكوومه‌ت هه‌رێم كوردستانه‌وه‌ كل كریایه‌ ئه‌را ئاوه‌دانكردن شاره‌گه‌ و ئه‌و كوومه‌كه‌یله‌ ك ئه‌را پشتگیرى كردن و پیشخستن بیناكردن مه‌نه‌لى كل كریانه‌ گشتى چه‌وه‌سه‌ریان هاتیه‌؟ وه‌تایبه‌تى ك حكوومه‌ت هه‌رێم كوردستان نه‌خشوده‌ور گرنگیگ داشتیه‌ له‌ كوومه‌ك كردن شاره‌گه‌ و دوباره‌ زینگه‌وكردنى وه‌لى وه‌داخه‌وه‌ هاووڵاتیه‌یل هیمان وه‌ده‌س پشتگووشخستن و په‌راوێزخستنه‌و ناڵنن ونیه‌زانن چاره‌نویس شاره‌گه‌یان چه‌س، چونكه‌ تا ئیسه‌ نه‌ ماڵ بیناكردن و نه‌ ئاوه‌دانكردنیگ خریاسه‌ به‌رنامه‌ى ئه‌و پویل ته‌رخانكریایه‌ ئه‌را وه‌كارخستن و وه‌به‌رهاوردن تایبه‌ت وه‌ قه‌زاو ناحیه‌گان پارێزگاگه‌ هه‌ر له‌ ساڵ 2008 و 2009 و 2010 و ئه‌را ئیمساڵیش وه‌ هه‌مان شیوه‌ هیمان هاووڵاتیه‌یل هویچ له‌ پارێزگاى دیاله‌ وه‌رنه‌گردنه‌ وئه‌رایان نه‌كریاس و ئویشن ته‌نیا شۆسته‌ یا ره‌سیفه‌یل و بینایه‌یل ده‌زگا و فه‌رمانگه‌یل حكوومى ڕه‌نگ كریانه‌ و دى هویچ. وه‌لى ئه‌گه‌ر بایمن ئه‌را حاڵوگوزران مه‌ردم و شاره‌گه‌ دوینیمن كاره‌سات گه‌ورایگه‌ له‌ ئاكام بایه‌خ نه‌داین وه‌ كشتوكاڵ و وشكه‌و بوین باخه‌یل له‌ ئاكام كه‌مى و نه‌وین ئاو ئه‌را ئاوداینیان، ئه‌و بیجگه‌ ڕمیان ماڵه‌یل كۆنه‌ ك بوینه‌سه‌ كوومه‌یگ زڕ وزباڵه‌ ك له‌یرا و له‌وراى شاره‌گه‌ په‌رش و بڵاو بویه‌ و ته‌نانه‌ت بازه‌ڕه‌گه‌یشى ڕمیایه‌ و یه‌یشه‌ بویه‌سه‌ مایه‌ى دڵڕه‌نجیان و تویڕه‌بوین هاووڵاتیه‌یل مه‌نده‌لاوى ك چه‌وه‌ڕى خه‌یر كه‌ن ئه‌را ئى شاریانه‌ وه‌تایبه‌تى ك حكوومه‌ت مه‌ركه‌زى و وه‌ڕیگه‌ى وه‌زاره‌ت داراییه‌وه‌ ئه‌یه‌ چه‌ن ساڵه‌ پویل ته‌رخان كه‌ید ئه‌را خاسه‌وكردن و بیناكردن و ئاوه‌دانكردن له‌ گشت شاره‌یل عیراق، و مه‌ندلاویه‌یلیش چه‌وه‌ڕى به‌ش خوه‌یان كه‌ن له‌ ئاینده‌یگ نزیك وداواى چاودێرى و بایه‌خداین زیاتریگ كه‌ن له‌لایه‌ن كاروه‌ده‌سه‌یل پارێزگاگه‌ و زووانحاڵیانیش ئویشید: ده‌رماڵه‌ یا تخصیصات داراییمان ئه‌را ئمساڵ و ساڵه‌یل گوزه‌یشته‌ هاكوو ئه‌ى پارێزگاى دیاله‌؟!.