فه‌يليه‌يل و بيده‌نگی كوشنده‌

شفق نيوز

 

ئه‌را ماوه‌ی فيشتر له‌ ده‌ ساڵه‌ هيمان ئی كيشه‌ چاره‌سه‌ر نه‌ويه‌و مێژوويگيش ئه‌را چاره‌سه‌ری دانه‌نرياگه‌و هويچ زه‌مانه‌تيگيش نيه‌ ئه‌را هاتنه‌وه‌ی بار عراق ئه‌را بان بار سه‌قامگيری وه‌ شيوه‌يگ ك ده‌زگايه‌يل ده‌وڵه‌ت مه‌شق ئه‌ركه‌يل خوه‌ی بكا وه‌بی مه‌هانه‌و ده‌سپيچگ.

باريگ تر هه‌س له‌ناو ماڵ كورده‌يل فه‌يلی وه‌تايبه‌ت وه‌ل سه‌ره‌تای ساڵ ٢٠١٤ و ئاشكرابوين كيشمه‌كيش له‌ مه‌يدان سياسی و ئاسايشی، ك يه‌يش بويه‌ مايه‌ی وه‌ سه‌ربازكردن گووشه‌يل ژيان عراقيه‌يل ك ريڕه‌و كاركردن و جياوازی هوير وڕای ده‌ركه‌فت وه‌گووره‌ی لايه‌نگری فه‌يليه‌يل ئه‌را ئی لايه‌ن و ئه‌و لايه‌ن. يه‌يش نيشانه‌ی راده‌ی مه‌ترسی ئه‌و باره‌سه‌ له‌بان رينمايی نه‌ته‌وه‌يی و ريڕه‌وه‌يل تريش له‌يوا دوينن ك ئايديۆلۆجيای مه‌زه‌وی نمايشه‌ ئه‌را مه‌ترسی وه‌ شيوه‌يگ فراوانتر وه‌ بوونه‌ی ئه‌و رويداگه‌يله‌ ك ئه‌نجام ئه‌دريه‌ن له‌ مه‌يدان سياسی جوور پاكسازی ره‌گه‌زی و مه‌زه‌وی.

ئمڕوو بيجگه‌ ئه‌و هه‌مگه‌ قوربانيه‌يله‌، هه‌وه‌جه‌ وه‌ ئه‌وه‌ ديريم وه‌شيوه‌يگ تر قوربانی بيه‌يم، ك ئه‌ويش وه‌گووره‌ی ئيراده‌و توانای ئه‌وانه‌ك په‌رچه‌م كيشه‌گه‌مان به‌رزه‌و ئه‌كه‌ن و چه‌وديری له‌لی ئه‌كه‌ن وه‌گووره‌ی تواناو ده‌رفه‌ت كاره‌يليان ك رووژ وه‌رووژ وه‌رته‌نگه‌و ئه‌دێ وه‌ بوونه‌ی كه‌می هاوكاری و پشتگيری و له‌وه‌ر گرينگی نه‌داين وه‌ی دوسيه‌ له‌ناونی گشت ئه‌و هه‌مگه‌ دوسيه‌يله‌ ك خرياسه‌ روی.

ئمجا بيجگه‌ وجوود ده‌يه‌ها ريكخرياگ و كوومه‌ڵه‌و كه‌ناڵه‌يل ده‌زگای ره‌سانن و بيجگه‌ تيكه‌ڵبوين ده‌يه‌هاو سه‌دان و به‌ڵكوو فيشتريش له‌ روڵه‌يل پيكهاته‌گه‌مان له‌ پرووسه‌ی سياسی، وه‌لی دوينيد گشت ئه‌يانه‌و پاشمه‌ندی ئه‌و ئه‌مباركرياگ سووزداريه‌ له‌لايه‌ن ئه‌و لايه‌نه‌يل جيوه‌جيكاره‌ له‌باوه‌ت كيشه‌گه‌مان مايه‌ی ئه‌وه‌سه‌ ك بپرسيد ئايا وه‌ڕاسی ئه‌وه‌ك له‌ده‌س چی، چی و ئه‌وه‌كيش مه‌نده‌سه‌و مه‌ندگه‌ له‌ی ئاژاوه‌ی وه‌رده‌وامه‌؟ ك هويچ رييگ تر نه‌يريد بيجگه‌ خه‌ياڵ ‌و كاركردنيش له‌سای ئی‌ كيشمه‌كيشه‌ له‌وه‌ر خاتر مه‌نينه‌ له‌ژير هه‌ر ناونيشانيگ له‌ی بار ئيسه‌ و له‌ چوارچيوه‌ی ئی ژيانه‌ ك له‌تی ژيه‌يد، ك يه‌يش راسی بار ئيسه‌ی كورده‌يل فه‌يليه‌.

ئيمه‌ بايه‌سه‌ وه‌گووره‌ی دوسيه‌يل له‌ناوبردن وه‌جه‌م"جينۆسايد" ئه‌وه‌ بارمنه‌ هوير ك دوسيه‌ی له‌ناوبردن كورده‌يل فه‌يلی وه‌گووره‌ی شماره‌ی مێژوويی يه‌كه‌مه‌، يه‌يش بيجگه‌ دوسيه‌ی له‌ناوبردن وه‌جه‌م ك له‌لايه‌ن رژيم به‌عس رمياگه‌و ئه‌نجام درياو دوسيه‌يل تر له‌ی سه‌رده‌م تازه‌مانه‌ جوور پاكسازی ره‌گه‌زی پيكهاته‌يل و مه‌زه‌وه‌يل له‌ توركمان و شه‌به‌ك و مه‌سيحی و ئێزيدی و له‌هه‌مان وه‌خت وه‌ شيوه‌يگ دڕندانه‌يش وه‌ل ئه‌و شيعه‌يله‌ ك له‌ناوچه‌يل پڕ تون وتيژی عراق وجوود ديرن و وه‌ شيوه‌يگ دڕندانه‌ كوشيان له‌وه‌ر هووكاره‌يل تايفی نه‌ك له‌وه‌ر هه‌ر تاوانيگ تر.‌

گشت ئه‌و دوسيه‌يله‌ بار حكوومه‌ت قورسه‌و ئه‌كاو هوير گشتلايگ داگير كردگه‌ له‌ڕوی ناوچه‌يی و ناوده‌وڵه‌تی، چوينكه‌ ئی تاوانه‌يله‌ مايه‌ی حاشاكردن يا په‌رده‌پووشكردن نيه‌ وه‌تايبه‌ت له‌سای وجوود ره‌سانن و توانايه‌يل پيشكه‌فتگی ك تويه‌نستگه‌ بڕه‌سيده‌ گشت شوونيگ، هه‌ر وه‌و خاتريشه‌ ئی بار پڕ مه‌ويسيه‌ له‌ عراق له‌يوا كردگه‌ هه‌ر سته‌مديده‌يگ فه‌يلی هس وه‌ دڵته‌نگی بكا، چوينكه‌ ئه‌خاده‌ی ڕز چه‌وه‌ڕيكه‌ره‌يل ئه‌را ساڵه‌يل ناديار و دوير ودريژيگ.

ئيمه‌ ئمڕوو هه‌وه‌جه‌ وه‌ قوربانيداين وه‌خته‌يليمان ديريم وه‌خاتر ئاماده‌بوينمان له‌ گشت ئه‌و بوونه‌يله‌ ك خزمه‌ت وه‌ كيشه‌گه‌مان ئه‌كاو بايه‌سه‌ ئه‌وه‌يش بخه‌يمنه‌ ياد ك ئی كيشه‌مانه‌ په‌يوه‌س نيه‌ وه‌ وه‌خت و شوونيگ دياريكرياگ، به‌ڵكوو بايه‌سه‌ رووژانه‌ له‌تی بژيه‌يم و جوور تاك و ده‌زگايه‌يل مامڵه‌ وه‌ليا بكه‌يم وه‌ گووره‌ی وجوود رووڵه‌يل پيكهاته‌گه‌مان له‌گشت وڵاته‌يل جه‌هان و سووزداريمانيش وه‌ل گشت سته‌مديده‌يليگ هووكار ئه‌ركيگ ئنسانيه‌و خزمه‌ت راسه‌وخۆيگه‌ ئه‌را زينگه‌وكردن كيشه‌گه‌مان، يا وه‌مانايگ تر ئه‌توينيم بويشيم ئمڕوو شماری زوڵمليكرياگه‌يل و سته‌مديده‌يل له‌ عراق فيشتره‌و بويه‌و ئيمه‌يش يه‌كه‌مين پيكهاته‌يگيم ك ئه‌و زوڵمه‌يله‌ هاته‌سه‌ تويشمان چ ئه‌وساو چ ئيسه‌. ئمجا ئايا ئيمه‌ رازييم له‌راده‌ی ئه‌و ئدانه‌و ساڵيادو به‌شداريكردنه‌ وه‌ل ئه‌وانه‌ك ئاماده‌گی و چالاكی و ريپێوان ديرن ئه‌را ده‌رخستن كيشه‌ ره‌واگه‌مان، يا بيده‌نگی كوشنده‌و نه‌وين ئاشكرايگ فه‌يليه‌يل هه‌س له‌ی جووره‌ گرده‌وبوينيگ مه‌ردمی و ته‌نانه‌ت له‌ وڵاته‌يل دونيايش ك باوه‌ڕ وه‌ مافه‌يل ئاده‌ميزاد ديرن و ئاسايشی و سه‌ڵامه‌تی داين ئه‌كه‌ن ئه‌را هه‌ركه‌سيگ هه‌وڵده‌ر و خه‌بات ئه‌كا له‌ی جووره‌ كيشه‌يليگ؟.

عه‌لی حسێن فه‌يلی

ج . أ