ئه‌نفال، بايه‌د هسى بكه‌ى!

شفق نيوز

فه‌يلى تا كورده‌يل تر له‌ ناوچه‌يل تر و ناو كوردستانيش، وه‌هاڕێ وه‌ل ئازار و كاره‌سات ده‌س وه‌پێ ئه‌كه‌يم. ئمجا له‌جى يه‌گ چوى نه‌ته‌وه‌يل تر وه‌ خوه‌ش له‌ خوه‌شى بچيمه‌ پێشواز وه‌هاره‌و، ئيمه‌ يه‌كمجار كاره‌ساته‌يل ئه‌نفاڵ ئه‌يريمه‌و هوير خوه‌مان و له‌ سه‌رانسه‌رى كوردستان و ته‌نانه‌ت ده‌يشت كوردستانيش ئه‌ى كاره‌سات دڵتزنه‌ تيه‌ريمه‌و هوير و كه‌فيمه‌و هوير ئه‌و نه‌هامه‌تى و كوره‌وه‌ريه‌ ك وه‌ سه‌رمان هاوردن.

 

ئمجا هه‌له‌ى باوه‌ته‌، هه‌ له‌ ده‌سڵاتداره‌و تا وه‌ مه‌ردم ئاسايى كوردستان هه‌ر كه‌س وه‌ تواناى خوه‌مان ئه‌نفاڵ ئه‌يريمه‌و هويرو وه‌ شێوه‌ى ياد ئه‌و باوگ و داڵگه‌يل و برايل وخوه‌شكه‌يليمانه‌ ئه‌كه‌يمه‌و ياد. هه‌ر له‌ى باوه‌ته‌يشه‌و، فره‌ رێوره‌سم وه‌ پا كريه‌يدو له‌ بان ئه‌ى كاره‌ساته‌ قسيه‌ كريه‌يد....

له‌ كه‌ناڵێ ته‌له‌فیزیۆنى خوه‌مان ديم هناى خوه‌نه‌واريل زانكۆ له‌ كه‌ركوك خوازيار يه‌ بوين تا ئه‌ى رێوره‌سمه‌ له‌ زانكۆ وه‌پا بكه‌ن، وه‌رپرس زانكۆ نوا له‌ليان گرتويد وه‌ى مه‌مه‌ر ك گێچه‌ڵ و شه‌ڕ نه‌ته‌وه‌يى ها له‌ شوونێ و ئه‌و دوياى خوه‌نه‌واره‌يل زانكۆ ك برايل عه‌ره‌و و توركمان ئيمه‌ن، وه‌ يادهاوردن ئه‌ى كاره‌ساته‌ وه‌پێان نه‌خوه‌شه‌!.

دوياى يه‌گ ئه‌ى كه‌ناڵه‌ له‌ى وه‌رپرسه‌ ك وه‌داخه‌و هه‌م كوردو هه‌ميش ناو گه‌وراى پرۆفیسۆر له‌ نواى ناوێ بوى پرسيار كرد ك ئه‌را نه‌يشتينه‌ ئه‌ى بوونه‌ له‌ ناوزانكۆ بگريه‌يد، وه‌ بسكه‌ خه‌نه‌ى وت: ئه‌ى بڕياره‌ وه‌ ده‌س من نيه‌، ئه‌گه‌ر وه‌ دڵ من بوود...تد.

ئيرنگه‌ له‌يره‌ دى ئيمه‌ بايه‌د خاس هويره‌و بكه‌يم ك ئه‌ى ئه‌نفاڵه‌ ك حوكم دادگاى فێدراڵى له‌ سه‌رێ دريايه‌و دۆسيه‌ى له‌ جه‌نايه‌تگه‌ ك وه‌ سه‌ر ئيمه‌ كورد هاتيه‌، ئه‌را كه‌س شاره‌زاى له‌ ئاسته ك‌ ئيچنه‌ بنوڕيده‌پێ و له‌ ناوچێن ئه‌و هه‌مگه‌ ژن و مناڵ و پيرو جوانه‌ كورده‌، له‌ لاى گرنگى نياشتوودو برايل نه‌ته‌وه‌يل تر له‌ وه‌رچه‌وێ بوود ك ئه‌وان ئه‌ى باوه‌ته‌ وه‌پێا ناخوه‌شه‌، چوى بايه‌د وه‌ليا ره‌فتار بكه‌يمو چه‌نێ هه‌م مق بوه‌يمه‌و دڵ و هه‌م خوسه‌ بخوه‌يم!؟.

ئايا ئه‌ى كابرا نه‌ چوى كوردێ، به‌ڵكۆ چوى كه‌سێ شاره‌ز‌ا ك ناوێ نانه‌(پرۆفیسۆر)،  نه‌نوڕسيه‌سه‌ مه‌سه‌ڵه‌ى هڵوكاست ك چه‌نێ ئه‌را هه‌ر يه‌هودى گرنگه‌و ته‌نانه‌تيش تا ئه‌وه‌ره‌ ئه‌راى ته‌قلا كردنه‌ ك له‌ فره‌وڵاته‌يل ئه‌گه‌ر كه‌سێ هلۆكاست ئنكار بكا، سزاى ديريد!؟.

ئه‌گه‌ر ئه‌ى كابرا كورده‌، ئمجا نه‌بايه‌د له‌لێ بپرسيم ك ئيمه‌ له‌ بان هه‌ق خوه‌مان، ئه‌ى هه‌مگه‌ له‌ليمان كوشيان و زنه‌ وه‌چاڵ كريان ك هێمان شوون فره‌ له قه‌وه‌ريليان ديار نيه‌، جه‌نابد چوى كورديگ هه‌ڵويست نه‌ته‌وه‌ييد ها له‌ كووره‌، هناى بويه‌د هاوكاره‌ ئه‌را يه‌گ ئه‌ى ياده‌ وه‌ پا نه‌كريه‌يد!؟.

ئايا نه‌بايه‌د گومان له‌لێد بكه‌يم هناى ك ئێژێد يه‌ فه‌رمان له‌بان هاتيه‌و وه‌ ده‌س من نيه‌. خوو ئيرنگه‌ ئه‌ى كاره‌ جه‌ناب پرۆفیسۆر، جه‌نابد جيوه‌جى كرديه‌(ئه‌گه‌ر راس بويشيدو فه‌رمان وه‌پيد داوين)، هه‌ چوى ئه‌ فه‌رمانه‌ نيه‌ ك رژيم گوڕوه‌گوڕ به‌عس وه‌ هاوردن ئايه‌ى له‌ قورئان پيرۆز، فه‌رمان ئه‌نفال ئيمه‌ى كورد داو تكفيرمان كردو سه‌دها هه‌زارن له‌ ليمان وه‌پێ كوشت!؟.

ئمجا بزان جه‌ناب پرۆفیسۆر م خوو نيه‌زانم سه‌ر وه‌چ لايه‌نگيد، وه‌لى يه‌ خاس بزان ك ته‌مام لايه‌نه‌يل كوردى ئيچنه‌ چشتێ له‌ سه‌ر ئه‌نفاڵ قه‌بول نيه‌كه‌ن. چوين ك ته‌مام لايه‌نه‌يل كوردستانى، ئازار ئه‌ى ژانه‌ چوى ژار تامێ كردنه‌و كه‌م‌تر لايه‌ن كوردى هه‌سه‌ ك له‌ ناو ئه‌ى كاره‌ساته‌ كه‌سوكار خوه‌ى له‌ ده‌س نياويد.

ئمجا تيه‌مه‌و ‌سه‌ر يه‌گ له‌ ناوچه‌يل داورياى چوى كه‌ركوك، ئه‌و جوانه‌يل ئه‌زيز كورده‌ توان رێوره‌سمێ وه‌ ياد شه‌هيده‌يل ئه‌نفاڵ وه‌ پا بكه‌ن، من چوى خوه‌م كار وه‌ يه‌ نه‌يرم ك ئه‌وانه‌ سه‌ر وه‌ چ لايه‌ن بوينه‌و هه‌ن، وه‌لى ئه‌وه‌گ ئه‌رام گرنگه‌ يه‌سه‌ ك ئه‌و هه‌سته‌ له‌ لاى ئه‌ى جوانه‌يله‌سه‌ ك‌ له‌ جه‌نابدو كه‌سه‌يل تر چوى خوه‌د فره‌ به‌رزترهن وه‌ل ئه‌و ك دياره‌ زانستنه‌و نه‌زانسته‌، تواين وه‌ى شێوه‌ ئه‌ى هه‌سته ره‌ينه‌ ك ياه‌ى ئه‌را كوردايه‌تيه‌‌ بكوشينه‌ى.

وه‌ل هه‌ر چشتێ تويه‌نيه‌يد مامه‌ڵه‌ بكريه‌يدو بفروشيه‌يد، وه‌لێ  بێ رێزى كردن وه‌ شه‌هيده‌يل رێ ئازادى و نێشتمان له‌ هه‌روڵاتێ خه‌يانه‌ت وه‌ هساو ئه‌يادو هويچ كه‌س ئيچنه‌ چشتێ قه‌بول نه‌كا.

يه‌كێ له‌ گه‌ورا پياوه‌يل ئێژێ: له‌وانه‌ نه‌ترسن ك كارگه‌ن و شه‌يتانى ئه‌كه‌ن، به‌ڵكو له‌وانه‌ بترسن ك دوينن ئه‌ى ئايه‌مه‌يله‌ گه‌نه‌كاره‌ چه‌كه‌ن و له‌ وه‌رايوه‌رێ بێده‌نگن!؟.

خوو ئمجا جه‌نابد، چوى ئه‌ى وه‌رپرسياريه‌تيه‌ ك ديرێدو قسيه‌ديش تا ئاستێ برو داشتيه‌و ديرێد، ئه‌را له‌ وه‌رايوه‌ر ئه‌ى بڕياره‌ بێده‌نگ بويد هويچ، جيوه‌جيشێ كرديد!؟.

ئايا له‌ زانكۆ نه‌بايه‌د مناڵێ كورد ئه‌وه‌يشه‌ له‌ كه‌ركوك له‌ وه‌رايوه‌ر برايل عه‌روه‌مان يادوبوونه‌يل خوه‌يان وه‌پا بكه‌ن و وه‌ ده‌سپێچگه‌يل بێ مانا نوا له‌ليان بگريه‌يدو ئيچنه‌ باريمه‌ زووان ك كاره‌ودانێ له‌ لايه‌ن برايلمان له‌ نه‌ته‌وه‌يل تر ها له‌ شوونێ، خووئه‌گه‌ر يه‌يشه‌ راس بوود، پرسيار ها له‌يره‌ مه‌گه‌ر ئه‌ى برايله‌ له‌ نه‌ته‌وه‌يل تر چوى توركمان و وه‌تايبه‌ت عه‌ره‌و ك هان ناو زانكۆ پسا ده‌رس خوه‌نن، ئه‌نفاڵ وه‌ سه‌رمان هاوردنه‌!؟. ئه‌گه‌ر جوواو نه‌خێره‌، خوو له‌ چه‌ بترسيم!. ئه‌گه‌ريش جواو: به‌ڵێه‌، خوو ئيمه‌ له‌ سه‌رده‌مێ تازه‌ ژيان ئه‌كه‌يم و رژێمێ وه‌ ناو حزب به‌عس نه‌منيه‌. ئه‌گه‌ريش هويرو زهنيه‌تێ به‌عسى مه‌نيه‌، بايه‌د له‌لێ سڵم بكه‌يم و بترسيم يا له‌ وه‌رايوه‌رێ بوسيه‌يم!؟.

ئه‌وانه‌ ك ئه‌نفاڵ كريان، تاوانيان ته‌نيا كورد بوين بوى و به‌س. زوورم ئه‌و ژن و مناڵه‌يله‌ ك له‌ ناو خه‌و شرين و هه‌ وه‌ زينێ بريان كريانه‌ ناوچاڵه‌يل مردن و ئاخرين هناسه‌يل خوه‌يان وه‌ پله‌پرتى تاسيان و ئه‌ڵمژين خه‌رگ زوڵم‌ به‌عسيه‌يل دڕنده‌، گيان دان، باوه‌ڕ بكه‌ نه‌ دوكتۆر بوين و نه‌ چوى جه‌نابد پرۆفیسۆر بوين تا وه‌ قات و رۆباتێ ئه‌وه‌يش وه‌ بسكه‌ خه‌نه‌ى فه‌رمان زهنيه‌ت دوژمنه‌يليان جيوه‌جى بكه‌ن، ئه‌وان فره‌ وه‌ پاكى بسكه‌ى مردن نيشته‌ سه‌رگونايان و گيان له‌ رێ كوردايه‌تى دان.

خوو ئمجا جه‌ناب...  ئه‌گه‌ر سه‌ر وه‌ ده‌وڵه‌ت ناوه‌نديش بويد، خوو ده‌وڵه‌ت ناوه‌ندى ئيرنگه‌ ئه‌ى كاره‌ساته‌ وه‌ ره‌سمى ناسيه‌سه‌ى هه‌رچه‌ن ده‌مى و له‌ دڵيشه‌و نه‌ود، وه‌لى گۆفتار ره‌سمى يه‌ ديار ئه‌كا ك دگان وه‌پيا نانه‌، ئمجا دى چه‌ ديريد جواو به‌يد، بێجگه‌ له‌ يه‌ ك خوه‌د يا... يا سه‌ر وه‌ حزب به‌عس بويد!.

ئيرنگه‌ دى وه‌ باوه‌رم وه‌خت وه‌ هاتيه‌ ك كوردو كودستانى بوين په‌ى ناسێ ئه‌را ديارى بكريه‌يدو ئه‌را ئيچنه‌ خاڵه‌يل پيرۆزێ ك له‌ بان هه‌ق و هقووق كوردى بويه‌‌، دى سيه‌و چه‌رمگ له‌ يه‌ك جياو بكريه‌ن و ئجازه‌ نه‌يريد ئيچنه‌ كه‌سه‌يلێ وه‌ ناو كورد، بوونه‌يل موقه‌ده‌س ملله‌ت كورد له‌كه‌دار بكه‌ن و ئمجا مه‌ردم كوردو بنه‌ماڵه‌يل ئه‌نفاڵ كرياى له‌ ده‌سڵاتداره‌يل و  سياسه‌تمه‌داره‌يل كورد چ له‌ هه‌رێم كوردستان و چه‌ ده‌يشت له‌ هه‌رێميش دڵيان سيه‌ بكه‌ن. ئمجا دى ئه‌و وه‌خته‌سه‌ ك ئه‌گه‌ر رويداى بايده‌و رێمان، دى مه‌ردم وه‌لمانا نين و ئه‌را هه‌ميشه‌ چوى كورد له‌ ناو چيمن.

شوڕش شاواز