جيايى و دابه‌شكردن.. نعمه‌ته‌ يا نفره‌ت ؟

عادل عه‌بدولمهدى

شه‌فه‌ق نيوز/ گشت جيايى يا به‌شكردنيگ نفره‌ت نيه‌و خواستيش نيه‌ نعمه‌ت بوود، تويه‌م تيه‌ێده‌ به‌ر و ژيان له‌ شكه‌فته‌ێى جوانه‌و ئه‌كا، جه‌نينيش له‌ يه‌كه‌وگرتن توخم پياگ و ژن دروس ئه‌دێ و مزگانى مناڵ و له‌داڵگبوين تازه‌ ئه‌ياد. ئمجا له‌وه‌ر ئه‌وه‌گ هه‌ردوگيان بانه‌ ده‌س، بايه‌سه‌ مه‌رجه‌يليگ وجوود داشتوون، جوور خاك وه‌پيت و وه‌خت گونجياگ و ئاويارى گونجياگ له‌ حاڵه‌ت كاڵين تويه‌م. وه‌ هه‌مان شيوه‌ جوور ره‌حم يا بريار كارا ك خودا ئه‌و نوتفه‌ دروس ئه‌كاو عه‌له‌قه‌يگ له‌لێ ئه‌دێ و دوياێ ئه‌وه‌يش نشخواريگ تا وه‌ فه‌رمان خودا ئه‌دێده‌ گوشت و سقان و جوانترين دروسكرياگيگ له‌لى دروس ئه‌كا. ئه‌يانه‌يش هه‌وه‌جه‌ وه‌ چه‌ودێرى ديار و شارياگ خودايى ديرن و چ وه‌ زانين يا نه‌زانستن بدێده‌ نعمه‌ت و ژيان، ئه‌گه‌ريش مه‌رجه‌يل گونجياگ نه‌ود، وه‌چه‌واشه‌وه‌ دروس ئه‌دێ.

 

له‌يرا مه‌سه‌له‌گه‌ فريه‌ جياواز نيه‌ له‌ ژيان سياسى و كۆمه‌ڵايه‌تى. جيايى و دابه‌شكارێ ئه‌گه‌ر وه‌ مه‌رج روێداو ده‌س غه‌يبى چه‌وديرێ كرد، ئه‌وه‌ كاره‌گه‌ ئاساييه‌و هويچ كيشه‌يگ له‌تى نيه‌، وه‌لێ ئه‌گه‌ر وه‌ چه‌واشه‌وه‌ بوى، ئه‌وه‌ كيشمه‌كيشه‌يليگ ويرانكه‌ر و هه‌وڵه‌يلييگه‌ وه‌تاڵان ئه‌چێد و ناڕه‌حه‌ت خاوه‌نه‌يلى ئه‌كا جوور ئه‌وه‌گ ناڕه‌حه‌ت ملله‌ت و وڵات ئه‌كا.

 

بيگومان ئيمه‌ى عراقى و هه‌رێمى و جه‌هانى له‌ حاڵه‌تيگ له‌ جياوازى و دابه‌شبوين و ديارده‌يل تازه‌ ژيه‌يم، ك هويچ كه‌سيگ باوه‌ڕى ئه‌وه‌ نه‌وێ بڕه‌سێده‌ ئى شيواز و ئى سورعه‌ته‌. ئى ديارده‌يشه‌ وه‌ راده‌يگ ده‌ليله‌ ك وه‌رگ وه‌رينمان ته‌نگه‌ له‌وه‌رمان و دڕيه‌ێد و لاشه‌مانيش گه‌وراتر و جموجويل و خواسته‌يل ژيانمانيش گورجتر و فراوانتر بويه‌، ئمجا هيزه‌يل و دامه‌زرياگه‌يل و ريكخرياگه‌يل و كه‌سايه‌تييگيش ك ماناى په‌ره‌سه‌ندن ئى بارودوخه‌ نه‌زانێد و كوت بكا له‌بان قاڵب و شيواز فكره‌ێ خوه‌ێ جوور ئه‌وه‌سه‌ چشتيگ له‌ ناوخودى يا ده‌يشتيه‌و په‌ره‌ بسينێد ئه‌را ئه‌وه‌گ له‌ ژيانى بتارنێده‌ێ. وه‌ى جووريشه‌ "ئه‌لبريكست" سه‌رۆك وه‌زيره‌يل وه‌رين بريتانى ديفيد كاميرۆن رمان ك هه‌رچه‌نى ئه‌و خوه‌يشى پيشنيار راپرسى كرد و " تيريزا ماى" سه‌رۆك وه‌زيره‌يل زوورمى خه‌سار كرد ك هه‌رچه‌نى خوه‌يشى داواێ هه‌ڵوژاردن كرد ئه‌را خاسه‌وكردن زوورمينه‌ێ په‌رله‌مانى و "ترامپ"يش وه‌و جووره‌ تاڕده‌يگ له‌ وڵاته‌يل يه‌كگرتگ ديموكراسيخوازه‌يل و كۆماريه‌يليش راو نا و "ماكرۆنى" له‌ فره‌نسا و مير حه‌مه‌د بن سه‌لمان له‌ سعوديه‌يش وه‌ هه‌مان شيوه‌. ئى دابه‌شبوينيشه‌ شايه‌ت حاڵه‌تيگ خاستر له‌ وه‌رين له‌لى بكه‌فێده‌و ئه‌گه‌ر له‌ حاڵه‌تيگ مه‌رجه‌يل سه‌ركه‌فتگ داشتوود، يا وه‌ چه‌واشه‌وه‌ شايه‌ت حاڵه‌ت خراوتر بوود ئه‌گه‌ر ئى مه‌رجه‌يله‌ نه‌ياشتوود.

 

له‌ عراقيش دابه‌شبوين تيژيگ ديريم له‌ مه‌يدانه‌يل جياجياو له‌ ناونى هيزه‌يل جياجيا. له‌ مه‌يدان كوردستانييش دوينيمنه‌ێ و له‌ مه‌يدان باشوور و ناوڕاس و خوه‌رئاواو باكووريش ديارن و له‌بان ئاست هيزه‌يل سياسييش جوور ئه‌وه‌گ دوينيمنه‌ێ له‌ناونى ناسنامه‌يل يا له‌ناو يه‌ك ناسنامه‌ يا له‌ ناونى جوگرافيه‌يل و به‌رژه‌وه‌نديه‌يل يا له‌ناو جوگرافياێ نيشتمانى و به‌رژه‌وه‌نديه‌يل هاوبه‌ش. ئمجا گشت ئه‌يانه‌يش ئاماژه‌ وه‌ ئه‌وه‌ ئه‌كه‌ن ك وڵاته‌گه‌ هه‌وه‌جه‌ وه‌ فكره‌و مه‌شق و چاره‌سه‌ره‌يل تازه‌كارێ ديرێد تا ئه‌و ئه‌قڵيه‌ته‌يل دوياكه‌فتگ و شيوازه‌يل ژه‌هراويه‌ و ئه‌و ده‌زگايه‌يل جامده‌و ئه‌و كيشه‌و گرفته‌يل فريه‌ نه‌يلێد و كار و فكره‌يل وه‌رينيش يا ئه‌وه‌سه‌ تازه‌وه‌ بكريه‌ن يا ئه‌وه‌سه‌ چشتيگ له‌ ناخه‌و يا له‌ ده‌يشته‌و ديرن ده‌ريان بكا له‌ ژيان.

 

با كه‌س شاكامێ وه‌كه‌س نه‌وه‌ێد و كه‌سيش وه‌ موسيبه‌ت كه‌سه‌يل تر خوه‌شاڵ نه‌دێ، يا دڵته‌نگ بدێ ئه‌را ئه‌و چشته‌ روێ ئه‌ياد ك شايه‌ت باێده‌ تويشى، چوينكه‌ گشت چشتيگ پشت وه‌ هوشيارى و دابينكردن مه‌رجه‌يل خاستر ئه‌وه‌سێد تا يه‌كێتى په‌ره‌ بسينێد ئه‌را وه‌رگرتن روێداگه‌يل تازه‌، يا دابه‌شكردن و جيايى تيه‌ێد وه‌ ئه‌وه‌گ چشتيگ تازه‌و خاستر له‌ جاران پيشكه‌ش بكا وه‌ل تواناێ فيشتر له‌بان روێ وه‌ڕوێ بوينه‌وه‌ى وه‌رده‌وام و پيشكه‌شكردن فكر و چاره‌سه‌ر گونجياگ ئه‌ڕاێ وه‌ شيوه‌يگ گونجياگ له‌وه‌ر وه‌رگرتن و قه‌بولكردن روێداگه‌يل تازه‌ ك فكره‌ێ وه‌رين له‌ قه‌بولكردنى جاڕس بوێ، گشت ئه‌يانه‌يش پشت وه‌ هوشيارێ باردوخ و خاسێ مامڵه‌كردن وه‌ليا ئه‌وه‌سن.

عادل عه‌بدولمهدى