ئه‌وانه‌گ له‌ خوه‌رئاوا هاتنه‌، ئاواره‌ نین

شفق نيوز

ئنجا كوردیش له‌و ناوچه‌یله‌ وه‌ شایه‌تى تاریخ چ وه‌ته‌نیا یا وه‌جه‌م یا جوور حزبه‌یل كوردستانى وه‌رگرى خاسیگ كردیان و تا هیز بوى وه‌رگرى كریا، وه‌لى دویاخر جوور هه‌ڵویستیگ تاریخى كوردستان چووڵ كریاو كه‌س رازى نه‌وى وه‌ حوكم سه‌دام.

جه‌مڕه‌وى كورد له‌و وه‌خته‌ بویه‌ هووكاریگ ك په‌رده‌ له‌بان تاوانه‌یل گه‌وراى سه‌دام هه‌ڵه‌و دریه‌یدو بویه‌ هووكاریگیش ك ئاسمان دژه‌ باڵگرتن ته‌یاره‌ دروس بوودو ئداره‌یگ كوردى په‌یا بوود، ك ئه‌را تاریخ له‌شوون كومار مه‌هاباد ئه‌و ئه‌زموون هه‌رێم كوردستانه‌ گامیگ تاریخى بوى و ئه‌را گشت نه‌ته‌وه‌ى كورد ده‌سكه‌فتیگ بوى.

جه‌مڕه‌ویه‌گه‌ى ئه‌وسا، یه‌كده‌نگیگ نائیرادى له‌تى بوى، ك ئیمه‌ وه‌ قیامه‌ت بویچگ ته‌ماشاى ئه‌كه‌یم و هه‌زاران كه‌س له‌ناو ڕى گیان له‌ده‌سدان و چاڵ ئه‌ڕایان هه‌ڵكه‌نیاو خاكیان كردیان، له‌ ئاسمانیشه‌و ته‌یاره‌یل به‌عس بورمان مه‌ردم كردیان.

وه‌لى كووچ ئیجاره‌و ده‌رچگن خوه‌رئاوایه‌یل له‌ واقعیگ بوى ك تویه‌نریا ئه‌و مه‌ردمه‌ مقه‌یه‌تى له‌ زێدو ناوچه‌یل خوه‌یان بكردیان و ڕى نه‌یاتان كوردبوین ئه‌و ناوچه‌یله‌ بكه‌فیده‌ ژیر هه‌ڕه‌شه‌و هه‌وڵ ئه‌وه‌ بیاتان وه‌ل عه‌ره‌ب سوریا له‌ یه‌كترى بفامستیان نه‌ك وه‌ ئسراحه‌ت بیه‌نه‌ قاپى ماڵه‌ براو برایش وه‌پیان بویشید بفه‌رمان بانه‌ ناو.

جى داخه‌ ئه‌وه‌ك رویدا گام خراویگ بوى، نه‌بایه‌س قاپى ئه‌ڕایان واز بویاتاد، ئه‌یه‌ كاریگه‌رى خراویگ دیرید له‌بان گشت كورد، چوینكه‌ له‌ چه‌و ناوچه‌یل عه‌ره‌بنشین سوریا، خوه‌رئاوا فریه‌ ئه‌مان بوى، وه‌لى خاوه‌ن نه‌یاشت، ئنجا با وه‌گشتمانه‌و مقه‌یه‌تى له‌ خوه‌رئاوا بكه‌یم و هه‌وڵ ئه‌وه‌ بیه‌یم و نه‌یلیم كورد دوباره‌ ئاواره‌ بوود.

ئه‌وه‌ك ئیسه‌ په‌یا بویه‌ ئه‌را نه‌ته‌وه‌ى كورد، دوباره‌ نیه‌وده‌و، ئه‌گه‌ر یه‌كگرتگ بویمن تویه‌نیم گام خاس بنه‌یم، ئه‌گه‌ر پشت یه‌كترى وه‌ردایم ئه‌وه‌ فه‌وتیه‌یم و نه‌وه‌ له‌شوون نه‌وه‌ ئى تاریخه‌ نویسنن و دوباره‌ نه‌وه‌ى ئاینده‌ وه‌پیمان ئویشن كورد یه‌كگرتگ نه‌وى و پشت یه‌كترى نه‌گرتن.

كه‌نعان به‌هادین

ج . أ