ڕاسگوو به‌ نه‌جاتت بوود!

شفق نيوز

 

له‌هه‌مان باوه‌ت پیشینه‌یلمان وه‌سارهاتیگ خوه‌ش هاوردنه‌، ئه‌را ئه‌وه‌گ ئى بنه‌ماى راس ودروسه‌ وه‌جوانى بڕه‌سننه‌ نه‌وه‌یل نوو، حه‌زكردم له‌یرا باسى بكه‌م، ك ئویشید : پادشاى مه‌مڵه‌كه‌ت وه‌ختى ڕه‌سیه‌ ئه‌وه‌ڵ پیرى و جووریگ له‌ بیمارى و ناته‌وانى وه‌پییه‌و دیاردا، و وه‌خاتر ئه‌وه‌گ جانشین خوه‌ى له‌ یه‌كى له‌ هه‌فت كوڕ ك داشت ده‌سنیشان بكه‌ید، رووژیگ له‌ رووژان گشتیان وه‌یه‌كه‌و جه‌م كرد، و سه‌رو تویه‌م دار گوڵیگ داده‌سیان و وته‌ پیان: توام ئه‌را ساڵیگتر بزانم كامن له‌ ئیوه‌ دارگوڵیگ جوان وته‌ندروس بووخوه‌ش وه‌ئه‌نجام بارید تا بكه‌مه‌ى جانشین خوه‌م؟.

... كوڵ وكوڵبڕ ساڵه‌گه‌ وه‌سه‌رچوى، و واده‌ى ئه‌و رووژه‌ هات ك هه‌ریه‌ك له‌ى كوڕه‌یله‌ دارگوڵ خوه‌ى نیشان باوگى بیه‌ید، گشتیان، وه‌ خوه‌شڵه‌خوه‌شى، یه‌كه‌ یه‌كه‌ هاتنه‌ دیواخان پادشا ك باوگیانه‌ و هه‌ریه‌ك له‌ لیان گوڵدانیگ جوان هاورد ل دارگوڵ ڕازیاییگ له‌تى ئیمایه‌ت كردیود و ده‌یان گوڵ بووخوه‌ش وه‌پییه‌وبوى، ته‌نیا كوڕه‌ بویچگه‌گه‌ى ناویان نه‌ود ك گوڵدانیگ وه‌پى بوى ك هویچ دارگوڵیگ له‌تى سه‌وزنه‌كردوید، ئه‌ویش وه‌سه‌رشووڕى وشه‌رم وخه‌جاڵه‌تكیشان فره‌یگه‌و هاته‌ ناو دیواخان، و وه‌ل هاتنى برایه‌یلى تیر تیر وه‌پى خه‌نستن وزیاتر شه‌رمه‌زارى كردن...

دویاى ئه‌وه‌گ پادشا ته‌ماشاى گوڵ وگوڵدان كوڕه‌یلى كرد، یه‌كه‌ یه‌كه‌، ده‌سخوه‌شى له‌لیان كرد، وستایش زه‌حمه‌تكیشانیان كرد، تا ڕه‌سیه‌ لاى گوڵدان خالى كوڕه‌بویچكه‌ڵه‌ و وه‌مێڵیگه‌و ته‌ماشاى خوه‌ى وگوڵدانه‌گه‌ى كرد... كوڕیش له‌ تاوا وت باوگ سه‌روه‌رم بزان ك من فره‌ هه‌وڵدام تویه‌م ئى گوڵه‌ سه‌وز بوود، سه‌مات دونیا ئه‌راى هاوردم سوود نه‌یاشت وله‌شاره‌زایه‌یل وكه‌سه‌یل خاوه‌ن خبره‌ت و هه‌تا پیره‌مه‌رده‌یل مه‌مڵه‌كه‌ت گشتى پرسیم، ته‌نانه‌ت یه‌كیگیان وته‌پیم ئه‌را سه‌ماتكردن ئى تویه‌مه‌ خوین خوه‌د تیكه‌ڵاى بكه‌ به‌شكه‌م سه‌وزبكه‌ید، منیش هاتم زه‌خمیگ له‌ ده‌س خوه‌م كردم وقه‌یریگ خوین چووڕانمه‌ ناو گوڵدانه‌گه‌؛ وه‌لى گشتى وه‌ده‌رد نه‌خوارد و وه‌ى جووره‌ من شه‌رمه‌زار بویم، ونه‌تواستم بامه‌ خزمه‌تد، وه‌لى ژنه‌گه‌م وت تو قه‌وڵ دایده‌سه‌ باوگد وبایه‌سه‌ بى قه‌وڵى نه‌كه‌ید وڕاسگوو بوید وه‌لیا،... منیش ئه‌یه‌سه‌ دوینید ئاماده‌م ئه‌را هه‌ر فه‌رمانیگ ...یه‌ مل من ویه‌یشه‌ شمشیر تو....

پادشا دوواره‌ چوى له‌بات ته‌خته‌گه‌ى دانیشت وت : دیاره‌ ئیوه‌ گشتدان چه‌وه‌ڕ ى كه‌ین تا بزانین كامدان بووده‌ جینشینم وله‌ ئاینده‌ بووده‌ پادشاى مه‌مڵه‌كه‌ت؟ گشتیان وه‌سه‌ربه‌رزى وتن به‌ڵى..

له‌ى ئانه‌ پادشا كلك ئه‌را كوڕه‌ بویچكه‌ڵه‌ى دڕا كرد وت تو جاگیر منى، چوینكه‌ ته‌نیا تو له‌ ناو كوڕه‌یلم ڕاسگوو ده‌رچوید... یه‌یش ك كردم تاقیه‌وكردنیگ بوى تا بزانم كامندان شایسته‌ین ئه‌را ئى ئه‌رك قورس وگه‌ورا، چوینكه‌ ته‌مام ئه‌و تویه‌مه‌یله‌ دامه‌ى وه‌پیدان ناوپویك وخه‌راو بوین و قه‌ت سه‌وز نه‌كردیان، وه‌لى، بیجگ له‌ كوڕه‌ بویچكه‌ڵه‌م، ئیوه‌ گشتدان وه‌لما دروو كردین و تواستین بخه‌ڵه‌تنینه‌م وه‌ ئه‌وه‌ز كردن ئه‌و تویه‌مه‌یله‌ ك دامه‌ى پیدان وه‌ تویه‌مه‌یلیگ نوو...

ماجد سوره‌میرى