به‌خته‌وه‌رى وه‌ ماڵ و ته‌ڵا نیه‌

شفق نيوز

ئاده‌میزاد تویه‌نیگ ژیان خوه‌ى وه‌ده‌س خوه‌ى دروس بكاو به‌خته‌وه‌ر بووگ له‌ژیانى. بیگومان خوه‌شه‌ویسى راسه‌قینه‌ و بى پیچ وپه‌نا كه‌م كه‌س تویه‌نیگ خوه‌ى به‌یگ له‌ قه‌ره‌ى، چوینكه‌ ئه‌وه‌ك ئمڕوو دوینریه‌یگ هه‌ر وه‌ناو خوه‌شه‌ویسیه‌و ته‌نیا وه‌خت وه‌سه‌ربردنه‌و هویچ تر. وه‌لى له‌ هه‌مان وه‌خت جووریگ  له‌ خوه‌شه‌ویسى كه‌فیگه‌ وه‌رچه‌و ك ئامانج له‌تى یه‌كه‌وگرتن و هه‌وڵداین راسه‌قینه‌س ئه‌را ئاینده‌و پیكهاوردن ژیان هاوسه‌رى له‌بان بنه‌ماى راسى و پاكى. وه‌لى وه‌داخه‌وه‌ راسه‌ ك ئویشن كه‌س وه‌بى ئه‌جه‌ڵ نیه‌مریگ، وه‌لى فره‌كه‌س هه‌س خوه‌یان خه‌نه‌ قوڕگ ئه‌ژده‌هاوه‌، له‌یرا مه‌به‌س باسه‌گه‌مان ئه‌وه‌سه‌ ك ئایا به‌خته‌وه‌رى وه‌ماڵ وته‌ڵاس؟ بیگومان نه‌خه‌یر، چوینكه‌ به‌خته‌وه‌رى ها له‌گونجیان و له‌یه‌كڕه‌سینه‌وه‌و نه‌وین كیشه‌و گرفت له‌ناونى ژن و شوى، ئمجا فره‌ وه‌داخه‌وه‌ دوینید به‌خته‌وه‌رى كریه‌یگه‌ قوربان ماڵ دونیاو خوه‌شیه‌یل تایبه‌تیگ له‌و دویه‌ته‌ دزیه‌یگ  ك دریه‌یگه‌ شوى، ئه‌ویش وه‌ ئیرادگرتن و داواكارى فره‌یگ له‌لایه‌ن خیزان دویه‌ته‌گه‌وه‌ جویر مه‌رجیگ  سه‌ره‌كى ك هه‌رچه‌نى دویه‌ته‌گه‌یش ڕازى نیه‌ وه‌و داواكاریه‌، وه‌لى دوینید سڵاى وه‌ده‌س خوه‌ى نیه‌و نیه‌تویه‌نیگ ده‌نگى بایگه‌ بان و نق بكا، هه‌ر له‌وه‌ر ئه‌وه‌یش دوینید كوڕه‌گه‌ كه‌فیگه‌ ناو دوڕیان سه‌خت و ته‌نگیگ و ناچاره‌ داواكارى ماڵ خه‌سویره‌ باریگه‌جى و نیه‌توایگ  ئه‌نجام ئه‌و خوه‌شه‌ویسیه‌ له‌ده‌س به‌یگ، وه‌لى نوڕید باخه‌وان نامه‌ردیگ بویه‌سه‌ تویشیه‌وه‌ له‌باخ دوڵبه‌ر گوڵ ئومیدیان وه‌ مه‌رج تیه‌ریگه‌ به‌ر، دى هویر له‌وه‌ ناكا جه‌ڕه‌ى تازه‌ له‌ ئه‌وه‌ڵه‌وه‌ ئاوه‌گه‌ى سه‌رد و خوه‌شه‌و دویاى ماوه‌یگ تامى نیه‌مینیگ و ژه‌نگ  ده‌یگ، ئایا دى خوه‌شبه‌ختى له‌ كووراوه‌ بایگ ئه‌گه‌ر خیزان دویه‌ت وه‌ك فرووشتن دویه‌ته‌گه‌یان بفرووشن وه‌ ماڵ و ته‌ڵا؟ ئایا ئه‌و دویه‌ته‌ چوین شه‌رمه‌زار نیه‌وگ وه‌ختى بژنه‌فیگ ماڵ باوانى ئیراد گرتنه‌و فرووشتنه‌ى له‌وه‌ر پویل نه‌ك له‌وه‌ر خوه‌شه‌ویسى و خواست بى مه‌رج خوه‌ى؟ مه‌عناى ئه‌وه‌سه‌ له‌یرا ئه‌و خوه‌شه‌ویسیه‌ جوانه‌رمه‌رگ بووگ و نریه‌یگه‌ چاڵ له‌لایه‌ن خیزان دویه‌ته‌گه‌وه‌، وه‌ختیگیش تیه‌یگه‌ پاى قسه‌و باس ئویشن ئیمه‌ به‌خته‌وه‌رى ئه‌را دویه‌ته‌مان توایم!!!

به‌خته‌وه‌رى له‌ ژیان هاوسه‌رى خوه‌ى دوینیگه‌وه‌، ئه‌ویش وه‌ مه‌رجیگ جویر ئه‌وه‌ك له‌سه‌ره‌تا ئشاره‌ت وه‌پى كردیم له‌یه‌كڕه‌سینه‌وه‌و گونجیان و قه‌بوولكردن یه‌كتریه‌ وه‌گشت جووریگه‌وه‌، ژیانیگه‌ خوه‌شى و ته‌نگیه‌یلى جویر یه‌ك بكیشن، هویچ وه‌ختیگ به‌خته‌وه‌رى وه‌ پویل نیه‌سینیه‌یگ، وه‌لى شایه‌ت ڕووژى بایگ ئه‌و ژنه‌ بكه‌فیگه‌ وه‌ر تانه‌ى ماڵه‌ خه‌سویره‌و بویشن ئیمه‌ وه‌ پویل سه‌ندیمه‌سه‌د، ئمجا ئه‌و وه‌خته‌ ژیانى چوین بووگ و ڕووژگارى چوین بگوزه‌ریگ، هه‌ر له‌وه‌ر ئه‌وه‌یش ئویشیم به‌خته‌وه‌رى وه‌ماڵ و ته‌ڵا نیه‌.

 

جه‌ماڵ ئه‌ركه‌وازى