قسه‌ى مه‌ردم

شفق نيوز

 فریه‌یگ له‌ ئاده‌میزاده‌یل و له‌وانه‌ك مه‌یل خستنه‌سه‌ لاى قسه‌ى ئه‌ى و ئه‌و ، تواناى ئه‌وه‌ نه‌یرن روى وه‌ڕوى ئه‌و قسه‌یل ناڕه‌واو نادروسه‌ بوونه‌و ك هه‌میشه‌ جوور عه‌یبه‌و شووره‌یى بووده‌ ریگر له‌وه‌رده‌م په‌ره‌داین وه‌ ژیان رووژانه‌.

وه‌لى له‌یرا پرسیاره‌یلیگ هه‌ن ك مه‌ردمانیگ تویش سه‌رسوڕمه‌نین كه‌ن و مه‌ردمانیگیش هه‌ن هویچ جواویگ ئه‌ڕاى نه‌یرن، ك ئه‌ویش ئه‌وه‌سه‌ ئایا قسه‌ى مه‌ردم نه‌خش فریه‌یگ دیرید له‌ ژیاند؟ ئایا تا چه‌نیگ قسه‌ى مه‌ردم كاریگه‌ره‌ له‌لید؟ ئایا تواناى ئه‌وه‌ دیرید واز له‌ ئامانجه‌یل خوه‌د بارید ك نه‌خشه‌ ئه‌ڕایان كیشایده‌ له‌وه‌ر مه‌ترسى قسه‌ى مه‌ردم؟ ئایا قسه‌ى مه‌ردم گرفت دروس ئه‌كاو گشتمان له‌لى رخمان چوود؟

له‌یرا بیگومان بایه‌سه‌ ئه‌وه‌ بزانیم ك رازیكردن مه‌ردم وه‌سیله‌یگه‌و هه‌وه‌جه‌ وه‌ ئه‌قڵ دیرید، وه‌لى ئایا بوود ئاده‌میزاد گشت ئه‌زه‌رت و ئاره‌زووه‌یلى وه‌ زه‌ره‌د بیه‌ید و واز بارید له‌گشت ئامانجه‌یلى له‌وه‌ر رازیكردن مه‌ردم!!

ئیمه‌ ئویشیم هه‌ر ئاده‌میزادیگ ژیانى ئه‌را خوه‌یه‌و تایبه‌ته‌ وه‌ خوه‌ى، هه‌ر له‌وه‌ر ئه‌وه‌یش هه‌ق خوه‌یه‌ بگه‌ردیده‌ شوون ژیان ك له‌تى شاد و به‌خته‌وه‌ر بوود وه‌بى ئه‌وه‌ك هه‌میشه‌ له‌ قسه‌ى مه‌ردم رخد بچوود.

ئیمه‌ له‌ى دونیا له‌ هه‌ر كرده‌وه‌یگمان بایه‌سه‌ یه‌كه‌مجار ره‌زاى خودا وه‌ده‌س باریم و چشتیگیش ئه‌گه‌ر خوداو شه‌رع له‌لى رازى بوى نه‌بایه‌د وه‌ قسه‌ى مه‌ردم له‌لى په‌شیمانه‌و بویمن و زه‌ره‌د بیه‌یمن له‌ خوه‌مان، چوینكه‌ مه‌ردمان هه‌ن هه‌میشه‌ كاروباریان ناونیتگ و ناوزڕانن و بى حورمه‌تیه‌ له‌ ره‌فتار و قسه‌كردن، ئه‌را نموونه‌ ت ئه‌گه‌ر بتواید هاوسه‌رگیرى بكه‌ید ئه‌را كوڕیگد وه‌بى ده‌نگ و بى قاڵبخوڕ ، شایه‌ت له‌وه‌ر تانه‌و قسه‌ى مه‌ردم ئه‌و بیده‌نگییه‌ په‌سه‌ن نه‌كه‌ید و ناچار بوید گه‌وراترین ئاهه‌نگ ئه‌راى ساز بكه‌یدو تنیش ئه‌و دارایى خاسه‌ نه‌یاشتوید یا بار ئابووریید كز بوود، ئنجا له‌ى حاڵه‌ته‌ قسه‌ى مه‌ردم وه‌جى ئه‌یه‌ریدو خوه‌د ئه‌خه‌یده‌ ناو زه‌ره‌د فریه‌یگ .

له‌ى جووره‌ حاڵه‌ته‌یله‌ ئه‌گه‌ر هات و ئیمه‌ ترس له‌قسه‌ى مه‌ردم داشتویم، ئه‌وه‌ بیگومان ناتویه‌نیم وه‌و جووره‌گ خوه‌مان خوازیم بژیه‌یم، چوینكه‌ ئاشكراس ئیمه‌ ئه‌را ئه‌وانه‌ ژیه‌یم ك هه‌میشه‌ له‌كه‌دار حاڵه‌ته‌یل فریه‌یگ كه‌ن و ده‌خاڵه‌ت فریه‌یگیش كه‌ن له‌ بڕیگ مه‌سه‌له‌ ك هویچ په‌یوه‌ندییگ وه‌پیانه‌و نه‌یرید.

ئاده‌میزاد له‌گشت حاڵه‌تیگ بایه‌سه‌ ئه‌قڵ خوه‌ى وه‌رجه‌ قسه‌ى مه‌ردم باریده‌ كار له‌گشت كاروبار و ره‌فتاریگى و هه‌ر كاریگ ك له‌ڕوى شه‌رع و ده‌ستووره‌و ڕى وه‌پى دریا نه‌بایه‌د وه‌قسه‌ى مه‌ردم حاشا له‌لى بكریه‌ید، یا نه‌بایه‌د هه‌میشه‌ قسه‌ى مه‌ردم سوار بوود له‌بان گشت كرده‌وه‌یلیگ . قسه‌ى مه‌ردم ته‌نیا ئامووژگاریه‌گه‌ى هه‌ڵوژن ك وه‌مه‌رجیگ له‌جى خوه‌ى بوود و دویر بوود له‌ ئامانج و نیاز خراو.

ئمڕوو له‌ى رووژگاره‌ ئه‌گه‌ر ده‌وڵه‌مه‌نید حه‌سویدى وه‌پید به‌ن و ئه‌گه‌ریش نه‌دارید پشت له‌لى كه‌ن، ئه‌گه‌ر كاریگ كردید وه‌بى ره‌زامه‌نى بڕیگ له‌ قه‌وم وخیش ئه‌وه‌ ناوزڕد كه‌ن، ئه‌گه‌ریش گووش له‌لیان گردید وه‌ قسه‌ى دڵسه‌ردى و په‌شیمانى سڕد كه‌ن، وه‌هه‌ر حاڵ هه‌ركه‌سیگ ئه‌قڵ خوه‌ى ها خوه‌یه‌و، ئه‌وه‌ك خوازیاره‌ ئاڵشتكارى و په‌ره‌داین وه‌ ژیانى بكا، ئه‌وه‌ نه‌بایه‌د قسه‌ى سه‌رد مه‌ردم كاریگه‌ر بوود له‌لاى و بكاده‌ى ریگر له‌وه‌رده‌م ئامانجه‌یلى له‌ ژیان.

حه‌سه‌ن عه‌بدوڵڵا

ج . أ