به‌هه‌يشته‌گه‌ی ديار خوه‌ش نيشان

شفق نيوز

شارسانه‌ شارۆچكه‌ى (كرن)ه‌ ك 99كیلۆمه‌تر له‌ كرماشانه‌و دویره‌. رویوه‌ر داڵاهوو (1900 كم 2)س و 154ئاوایى دیریگ..شماره‌ى نیشته‌جایه‌یلى54هه‌زار كه‌سه‌ ك له‌ بواره‌یل كشتوكاڵى، ئاژه‌ڵدارى، باخدارى و پیشه‌یل ده‌سى كار كه‌ن. ناو داڵاهوو له‌ كویه‌یل سه‌ركه‌ش ناوچه‌گه‌ گیریاس. فره‌تر نیشته‌جایه‌یل ئى ناوچه‌ په‌یڕه‌و ئاین كویه‌ن(یارسان)ن. شارۆچكه‌ى كرن وه‌خاتر جوانییه‌یل سروشتى و ئاو و هه‌واى هوونكى، له‌ وه‌رزه‌یل گه‌رم ساڵ میواندارى له‌ گه‌شتیاره‌یل فره‌یگ ئه‌كا و بیجگه‌ له‌ سروشته‌ مه‌یلكیشه‌گه‌ى، شوینه‌یل گه‌شتیارى فره‌یگ دیرێ ك ئاماژه‌ وه‌ چه‌ن ده‌نگیگیان كه‌یمن:

زیاره‌تگایل "پیر موسى" و "بنیامین"، مه‌زار سه‌ى حه‌یده‌ر حه‌یده‌رى(ئاسه‌ى براكه‌)، مه‌زار ته‌یموور بانیارانى(شا ته‌یموور بانیارانى)، مه‌زار سه‌ى ره‌زا(سه‌ى ره‌زاوه‌) ك فره‌تر ئى شوینه‌یله‌، شوین وه‌خاكسپاردن گه‌ورایه‌یل (یارسان)ن.

توانایى مه‌ردم كرن له‌ بوار پیشه‌یل ده‌سى وه‌ تایبه‌ت له‌ دروسكردن ته‌مویره‌(تنبور) و چه‌قوو له‌سه‌رتاسه‌ر پارێزگاى كرماشان و ناوچه‌گه‌ ناو ده‌ركردگه‌، وه‌جووریگ  ك فره‌تر رێواره‌یل ئه‌را سه‌نین ئه‌و چشته‌یله‌ سه‌ردان كرن كه‌ن.

رێژاو

رێژاو، ناو یه‌كیگ له‌ شوینه‌یل گه‌شتیارى تر (داڵاهوو)ه‌، ك وه‌خاتر دیمه‌نه‌یل مه‌یلكیش و جوان سروشتیى و ئاو و هه‌واى سازگارى ناوبانگى  فره‌یگ له‌ ناوچه‌گه‌ ده‌ركردگه‌.باخه‌یل پڕ میوه‌ و داره‌یل سه‌رسه‌وز  جووراوجوور  و وه‌رفراوانى دارستانه‌یلى مه‌یل هه‌ر كه‌س وه‌ره‌و لاى خوه‌ى كیشى. بیجگه‌ له‌ سروشت سه‌رسه‌وز، زیاره‌تگایل پیرۆز یارسان له‌ ئاواییه‌یل ناوچه‌گه‌ و له‌ گشتى گرنگتر(باوه‌یاگار) گرنگییگ تایبه‌ت وه‌خشێده‌ ئى ناوچه‌. رێژاو كه‌فتگه‌سه‌ ناونى كرن و سه‌رپێڵ له‌ نزیك مله‌ى پاتاق.

ده‌رگۆمه‌

یه‌كیگ تر له‌ زیاره‌تگایل ناوچه‌گه‌ ده‌رگۆمه‌س ك مه‌زار باوه‌یاگار ها ئه‌وره‌. باوه‌یاگار یه‌كیگه‌ له‌ گه‌ورایل یارسان ك له‌ سه‌ده‌ى هه‌یشتم كووچى له‌ داڵگ بویه‌ و ناو داڵگى (دادا سارا)س، باوه‌یاگار له‌ سه‌رده‌م جوانى وه‌ فه‌رمان سوڵتان ئسحاق ئه‌را بڵاوه‌وكردن ئاین یارى چیه‌سه‌ هندستان و پاكستان. له‌وه‌ر ئه‌وه‌گ باوه‌یاگار ژن و مناڵ نه‌یاشتگه‌ دووان له‌ یاره‌یلى وه‌ ناوه‌یل (خیاڵ و وساڵ) وه‌ پله‌ى"پیر" جوور جیگره‌یل خوه‌ى له‌ناو موریده‌یلى هه‌ڵوژانگه‌ و سه‌یده‌یل بنه‌ماڵه‌ى باوه‌یاگار له‌ نه‌وه‌ى ئه‌و دو كه‌سه‌نه‌. دوشمنه‌یل یارسان باوه‌یاگار كوشتن و له‌ شوونیگ وه‌ ناو (سه‌رانه‌) له‌ داوان كویه‌ێ داڵاهوو وه‌ خاك سپاردنه‌ى ك ئیسه‌ ئه‌و شوینه‌ وه‌ ناو باوه‌یاگار ناوبانگى ده‌ركردگه‌. باوه‌یاگار 40كیلۆمه‌تر له‌ سه‌رپێڵه‌و دویره‌و هاله‌ كووتایى جاده‌ى رێژاو.