ژیانیگ دویر له ‌ئاسووده‌یى

شفق نيوز

مه‌رگ و ژیان له‌ى وڵاته‌ هه‌میشه‌ هاومه‌رز یه‌كترى بوینه‌و تاڕاده‌ى فریه‌یگیش له‌ یه‌كه‌و نزیكن، چوینكه‌ ئه‌و ژیانه‌ ك وه‌ماناى شادى و سه‌رفرازى و به‌خته‌وه‌رى بوود، وه‌رده‌وام پڕ بویه‌ له‌ كاره‌سات و رویداگه‌یل دڵته‌زن و له‌ناكاو.

ماناى ئه‌وه‌سه‌ ژیانیگ دویر له‌ تام خوه‌شى و ئاسووده‌یى، دووزه‌خ سه‌ختیگه‌و زه‌نگ خوه‌شى له‌تى مه‌حاڵه‌، ئه‌گه‌ریش ته‌ماشاى ساڵه‌یل دویاى رمیان رژیم سته‌مكار به‌عسیش بكه‌یم ك یه‌كیگ له‌ خه‌وه‌یل مه‌ردم ئازادى و دیموكراسى بوى، ئه‌وه‌ بیگومان ئه‌تویه‌نیم بویشیم ئه‌و خه‌ویشه‌ ته‌نیا خه‌یاڵیگ بوى و هویچ له‌لى ناته‌سه‌ دى، چوینكه‌ له‌ساى ئازادى و دیموكراسى خوین فریه‌یگ رووڵه‌یل عراق رشیاگه‌و تائیسه‌یش بار ئاسایش سه‌قامگیر نیه‌و رووژ وه‌ڕووژ مه‌ترسى فیشتر ڕوى له‌وڵات ئه‌كاو هویچ مزگانییگ ئه‌را ئاینده‌ى رووشنیگ په‌یا نادێ له‌ساى حزب و لایه‌نه‌یل وه‌یه‌كه‌و نه‌گونجیاگ ئمڕوو.

به‌ڵى ئمڕوو ژیان له‌ زوورم شاره‌یل عراق مایه‌ى دڵخوه‌شى نیه‌و رووژانه‌ ده‌یه‌ها كه‌س بیتاوان بوونه‌ قوربانى رویداگه‌یل جیاجیاو ده‌خاڵه‌ت ده‌ره‌كییش چنگ ناسه‌ قوڕگ ئى ژیانه‌و تاسانه‌سه‌ى و ده‌نگ هاوار و ناڵه‌یل یه‌تیمه‌یل و بى سه‌رپه‌رشه‌یل وه‌ گووش كه‌س ناڕه‌سید و جه‌نگ ترۆر و ته‌قینه‌وه‌یل جوراوجوور ره‌سیه‌ گشت شار و ناوچه‌یگ ئى وڵاته‌ زه‌خمداره‌.

دویاى 2003 جاریگتر سته‌م دیكتاتۆریه‌ت له‌ژیر په‌رده‌ى ئازادى و دیموكراسى ریڕه‌و خوه‌ى وه‌رگرت و گه‌ناته‌كارى باڵ كیشا بان زوورم دام و ده‌زگایه‌یل حكوومه‌ت و نه‌وین یاساو دادگاى بته‌ویگ فیشتر ڕى یاخیبوین ئه‌را ئاده‌میزاد ملهوڕ و چه‌ته‌ خوه‌شكرد، ك یه‌یش تا ئیسه‌ هویچ چاره‌سه‌ریگ بنه‌ڕه‌تى نه‌یاشتگه‌و هه‌ر هه‌وڵیگ له‌ى باوه‌ته‌و چیه‌سه‌ خانه‌ى شكه‌ست و نا ئومیدى.

ئارام عه‌بدولڕه‌حیم

ج . أ