كوردستان كه‌ی بووده‌ هاوسای عراق؟

شفق نيوز

ئه‌و هه‌رێمه‌ ك ئه‌را ماوه‌ی فيشتر له‌ بيس ساڵه‌ هه‌وڵ ئاوه‌دانی و خاسسازی و بته‌وكردن ژيرخان ئابووری ئه‌يادو ساڵه‌يليگيشه‌ وه‌ فه‌رمی پيشوازی له‌ كومپانيايه‌يل گه‌ورای جه‌هانی ئه‌كا ئه‌را وه‌به‌رهاوردن و سه‌رمايه‌گوزاری، له‌يوا دياره‌ زوورم وڵاته‌يل دونيايش ئه‌وه‌ ئه‌ڕايان ده‌ركه‌فتگه‌ ك كورد توانای وه‌ڕيه‌وبردن ده‌وڵه‌ت سه‌روه‌خوه‌يی و جيابوينه‌وه‌ ديرن له‌ ئاينده‌و هويچ گومانيگ له‌تی نيه‌ ك ئه‌زموون كوردستان ئه‌زموونيگ سه‌ركه‌فتگ بويه‌ له‌ بواره‌يل ژيان و مه‌ردم ناوچه‌گه‌و وڵاته‌يليش وه‌گشتی شايه‌تی پيشكه‌فتن ئه‌و ئه‌زموونه‌ دانه‌، ك هه‌ر وه‌و خاتريشه‌ سه‌رمايه‌دار و كومپانيايه‌يل گه‌ورای دونيايش كوردستان جوور ناوچه‌يگ ئارام هه‌ڵوژاننه‌و كاره‌يليان له‌تی وه‌بی ترس ئه‌نجام ئه‌يه‌ن، يه‌يش بيجگه‌ ئه‌و هه‌مگه‌ باڵوێز و باڵوێزخانه‌و كارمه‌نده‌يل بيگانه‌ ك له‌ كوردستان جيگيرن و له‌ هه‌مان وه‌خت وڵاته‌يليانيش په‌يوه‌ندی بته‌و ديرن وه‌ل هه‌رێم كوردستان.

بيگومان "ده‌وڵه‌ت سه‌ربه‌خوه‌ی كوردی" خه‌وه‌ گه‌وراگه‌ی كورده‌، ك له‌وه‌ر خاتر ئه‌و سه‌روه‌خۆييه‌ ده‌ريايگ خوين رشانگه‌و ده‌يه‌ها ساڵيش ئاواره‌و ده‌روه‌ده‌ر بويه‌، وه‌لی ئی مه‌سه‌له‌ له‌لايه‌ن حكوومه‌ت ناوه‌ندی عراقه‌و وه‌ كوفر و تاوان فريه‌ گه‌ورايگ دريه‌يده‌ قه‌ڵه‌م و هويچ وه‌ختيگيش سه‌ران ده‌وڵه‌ت عراق وه‌ چه‌ويگ يه‌كسانه‌و ته‌ماشای گشت مه‌ردم ئی وڵاته‌ نه‌كردنه‌و ئيسه‌يش ئه‌را ماوه‌ی چه‌ن ساڵيگه‌ ناكووكی ناونی هه‌رێم كوردستان و به‌غدا له‌بان مه‌سه‌له‌ی نه‌فت و غاز و بودجه‌ی پێشمه‌رگه‌و له‌ی دوياخريشه‌ مه‌سه‌له‌ی كلكردن نه‌فت كوردستان قاڵ گه‌ورايگ له‌لی كه‌فته‌وه‌و حكوومه‌ت عراق هه‌ر جاريگ و وه‌مه‌هانه‌يگ تومه‌تبار هه‌رێم ئه‌كا وه‌بی ئه‌وه‌ك ته‌ماشای بنه‌مايه‌يل ده‌ستوور بكا.

وه‌لی ئه‌گه‌ر بنوڕيمنه‌ سروشت و بار سه‌خت وه‌رده‌وام ئی عراقه‌، ئاشكراس ك ژيان وه‌و شيوه‌ گوزه‌ر نادێ و له‌ژير چه‌تر سته‌م ديكتاتۆريه‌ت هويچ وه‌ختيگ كوردستان ئاسووده‌ نادێ تا وه‌ختيگ ئاڵای سه‌روه‌خوه‌يی به‌رزه‌و نه‌كاو نه‌وده‌ ده‌وڵه‌تيگ هاوسا، هه‌ر له‌وه‌ر ئه‌وه‌يش ملله‌ت كورد له‌ كودستان ئه‌وه‌نه‌ متمانه‌يان وه‌ ره‌فتار و هه‌ڵسووكه‌فت ده‌سڵاتداره‌يل به‌غدا نه‌مه‌ندگه‌و له‌يوا هس ئه‌كه‌ن هويچ په‌يوه‌ندی وخاڵيگ هاوبه‌ش له‌ ناونی هه‌رێم و به‌غدا نيه‌ ئه‌را وه‌يه‌كه‌وژيان و گوزه‌ركردن رووژگار. چوينكه‌ كيشه‌ی ناونی سينی و شيعه‌ی عه‌ره‌ب و ده‌سوه‌رداين وڵاته‌يل هه‌رێمی و عه‌ره‌بی له‌ی وڵاته‌ ئاماژه‌ وه‌ چه‌سپانن ئاسايش و سه‌قامگيری ناكه‌ن و هه‌ر وه‌و خاتريشه‌ ئويشيم كوردستان كه‌ی بووده‌ هاوسای عراق تا ملله‌ت كوردمان له‌ژير ئاڵای كوردستانيگ سه‌روه‌خوه‌ی ژيانيگ بڕ له‌ به‌خته‌وه‌ری و خوه‌شتر هه‌ڵوژنيد فيشتر له‌و ژيان ئارام ئيسه‌يه‌ ك ديريده‌ی، چوينكه‌ تا ده‌سڵات ناوه‌ندی له‌ ئيمه‌وه‌ نزيك بوود، ئيمه‌ له‌ كيشه‌و گرفت نزيك و له‌ ئاسووده‌ييش دويريم.

جه‌ماڵ ئه‌ركه‌وازی