مه‌ترسیه‌یل وشكه‌وبوین دجله‌و فورات

شفق نيوز

له‌سه‌وزایى جوان و سروشت دڵگیر وه‌ل فره‌یى ئاو و باخ وبوسان خورماو بوسان میوه‌یل جوراوجوور. ئه‌را نموونه‌: شار دیاله‌ ناوداره‌ وه‌ بوسانه‌یل گشتڕه‌نگ ك جووره‌یل فره‌یگ له‌سه‌وزى و میوه‌جات دیرێد. ناوچه‌یل باشووریش ناودارن وه‌كاڵین چنه‌ر و كه‌نم و جویه‌، به‌غدایش ناوداره‌ وه‌ ماسى برشیاگ.

 

وه‌ عراق ئویشن وڵات كشتوكاڵى و پڕ خه‌یر سروشتى، ئه‌ویش له‌وه‌ر خاك نه‌خت و گونجیاگ ئه‌را زه‌ویكاڵى له‌سایه‌ى وجوود ئاو دجله‌و فورات و چه‌م و ئاوه‌یل بویچگ  ك رشیه‌نه‌ ناو خاكه‌یل عراق، وه‌لى ئى خه‌یر وبه‌یره‌ خه‌ریكه‌ روى له‌كه‌مى كه‌ن و عراق كه‌فیده‌ وه‌رده‌م وشكه‌وبوین و كه‌مى سه‌رچه‌وه‌یل ئاو ك هه‌وه‌جه‌ى وڵات پڕه‌و كه‌ێد، یه‌یش وه‌ ئه‌وه‌ك ئى مه‌سه‌له‌ بایه‌سه‌ له‌وه‌رچه‌وه‌ بگیریه‌ێدو چاره‌سه‌ر خاسیگ ئه‌ڕاى په‌یا بكریه‌ێد وه‌تایبه‌ت وه‌ل ده‌وڵه‌ت ئیران و توركیا ك سه‌رچه‌وه‌یل هاتن ئى ئاوه‌یله‌نه‌ له‌لیانه‌و ئه‌را ناو خاك عراق، ك حكوومه‌ت ئیرانى له‌ى دویاخره‌ له‌نسبه‌ى ئه‌و ئاوه‌ كه‌مه‌و كرد ك تیه‌ێده‌ ناو خاك عراق و یه‌یش بویه‌ مایه‌ى زه‌ره‌دڕه‌سانن گه‌ورایگ  وه‌ بوسانه‌یل دیاله‌.

 

له‌ناوچه‌یل باشووریش ك ئیسه‌ ناڵنن وه‌ده‌س كه‌مه‌وبوین ئاو، مه‌ترسى وشكه‌وبوین له‌لى كه‌فێده‌و، ك یه‌یش ماناى له‌ناوبردن كشتوكاڵیه‌ له‌باشوور عراق و مه‌ترسى ئاڵشتبوین ژینگه‌س ئه‌را وشكانى و ئى كاریشه‌ گرفت فره‌یگ دروس ئه‌كا ئه‌را مه‌ردم نیشته‌جى زه‌لگاوه‌یل و له‌هه‌مان وه‌خا زه‌رده‌ ڕه‌سنێده‌ داهات ئابوورى و ژیانیان سه‌ختتره‌و ئه‌كا.

 

ئى ره‌فتاریشه‌ له‌لایه‌ن ده‌وڵه‌ته‌یل سه‌رچه‌وه‌ى ئاوى ناپه‌سه‌ن و نامه‌نتقیه‌ ك خاك كشتوكاڵى عراق ویران بكریه‌ێد وه‌مه‌هانه‌ى ناجوور، ك یه‌یش زه‌ره‌د گه‌ورایگه‌ له‌ به‌رژه‌وه‌ندى عراق له‌ڕى به‌سانن و كه‌مه‌وكردن ئاوه‌یل.

 

لایه‌ن توركییش ك ئاوه‌یل دجله‌و فورات كۆنترۆڵ كردگه‌ له‌ڕى دامه‌زرانن بڕیگ وه‌ربه‌س له‌بان ئاو دجله‌و فورات و په‌نگه‌وداین بڕ فره‌یگ له‌ئاو ك وه‌گووره‌ى هه‌ق ناوده‌وڵه‌تى به‌ش عراق له‌لى نه‌یاگه‌، یه‌یش سه‌رپیچیكردن ناڕه‌وایگه‌ ده‌رهه‌ق ده‌وڵه‌ت هاوساى خوه‌ى ك عراقه‌.

 

ئى گرفته‌یله‌ له‌ى ساڵه‌یل دویاخره‌ رویدا وه‌بى وه‌دیكردن چاره‌سه‌ریگ گونجیاگ ك وه‌جووریگ رازى هه‌ردوگ لایه‌ن بكا، ئنجا مه‌ندن ئى گرفتیشه‌ وه‌ى جووره‌ مه‌ترسى زیاتر دروس ئه‌كاو هه‌ڕه‌شه‌ وشكه‌وبوین له‌ئاوه‌یل عراق ئه‌كا.

 

هه‌ر له‌وه‌ر ئه‌وه‌یش بایه‌سه‌ له‌بان حكوومه‌ت عراق كار خاسیگ له‌ى باوه‌ته‌و ئه‌نجام به‌ێد ك وه‌رده‌وام له‌هه‌وڵداین بوودو شكایه‌ت پیشكه‌ش لایه‌نه‌یل و دادگایه‌یل ناوده‌وڵه‌وتى بكا له‌وه‌ر ئه‌وه‌ك فشار بخه‌نه‌ بان لایه‌ن توركى له‌وه‌ر خاتر وه‌رداین ئاو دجله‌و وفرات و دى واز له‌ى وازى مه‌ترسیداره‌ بارن و په‌یوه‌ندى و ره‌فتار خاس وه‌ل ده‌وڵه‌ت عراق په‌یا بكه‌ن.

 

جومعه‌ عه‌بدوڵڵا

ج