ده‌سڵات چینایه‌تى.. مه‌ترسى ئه‌را قه‌واره‌ى ده‌وڵه‌ت

شفق نيوز

له‌وه‌خت رمیان رژیم به‌عس خوینمژ تا ڕووژ ئمڕوومان له‌باوه‌ت شیواز حكوومه‌ت له‌عراق، ك ئایا ئى جووره‌ حكوومه‌ته‌ نوێنه‌رایه‌تى گشت عراقیه‌یله‌ یا حكوومه‌ت به‌شبه‌ش و چینایه‌تى و نه‌ته‌وایه‌تیه‌ ك هاته‌سه‌ بان ته‌خت ده‌سڵات وه‌گووره‌ى گونجیان سیاسى؟

 

له‌وه‌ختیگ ك ئى هیز ده‌سڵاتداره‌ له‌ڕز هیزه‌یل ئۆپۆزسیۆن بوى، ئه‌و رژیمه‌ ملله‌تمان له‌ژیان به‌خته‌وه‌رى ناهمى كردو هه‌ر ئه‌و رژیمه‌ مه‌شق سیاسه‌ت چینایه‌تى و ره‌گه‌زى دژ دو پیكهاته‌ى گه‌وراى عراقیه‌یل كرد جوور شیعه‌ى عراق وه‌تایبه‌ت له‌وه‌خت ده‌سوه‌شاننى له‌ڕاپه‌رین ئازار و بوردمانكردن شار و مه‌زارگه‌ى پیرووز ئیمامه‌یل وه‌ سارووخ و چه‌ك قورس ك ده‌یه‌ها هه‌زار له‌هاووڵاتیه‌یل بیتاوان بوینه‌ قوربانى و دویاى ئه‌وه‌یش له‌رووژنامه‌و ره‌سانن له‌یوا باس كریان ك گوایا عه‌ره‌ب نین و چه‌نه‌ها تاوان خسته‌ پاڵ هاووڵاتیه‌یل عراق، ك یه‌یش ته‌نیا ئه‌قڵ نه‌خوه‌ش به‌عسیه‌یل ئه‌و توومه‌ته‌یله‌ كرده‌ مه‌ردم بیتاوان.

 

وه‌ل ئه‌وه‌یشا رژیم به‌عس خراوترین كاره‌سات له‌ناوبردن وه‌جه‌م ده‌رهه‌ق ملله‌ت كورد ئه‌نجامدا وه‌ك كاره‌سات ئه‌نفال به‌دناو ك نزیكه‌ى 180هه‌زار كه‌س بیتاوان له‌تى بوینه‌ قوربانى و كاولكردن نزیكه‌ى په‌نج هه‌زار ئاوایى كوردنشین و بیجگه‌ ئه‌وه‌یش وه‌كارهاوردن چه‌ك كیمیاوى له‌وه‌خت بوردمانكردن شار هه‌ڵه‌بجه‌ى شه‌هید ك ئه‌را ماوه‌ى چه‌ن ده‌قه‌یگ په‌نج هه‌زار هاووڵاتى مه‌ده‌نى شه‌هید كرد له‌یه‌كه‌مین تاوان وه‌كارهاوردن ئه‌و چه‌ك كیمیاویه‌ له‌لایه‌ن رژیم وه‌رینه‌و دژ به‌شیگ له‌روڵه‌یل ملله‌ته‌گه‌ى، ك یه‌یش بیجگه‌ كووچ وه‌پیكردن هه‌زاره‌ها خیزانه‌یل كورد فه‌یلى و بى سه‌روشوونكردن هه‌زاران جایه‌ڵ جوانه‌یلیان و بیجگه‌ كاره‌ساه‌یل تر دژ پیكهاته‌یل تر دینى و نه‌ته‌وه‌یل تر.

 

هه‌ر له‌وه‌ر ئه‌وه‌یش بایه‌س بوى له‌بان هیزه‌یل ئۆپۆزسیۆن په‌ند له‌و غه‌ڵه‌ته‌یل رژیمه‌ وه‌ربگردیان، له‌وانه‌یش: مه‌شقكردن ئه‌و رژیمه‌ له‌بان سیاسه‌ت چینایه‌تى و ره‌گه‌زى ك ده‌زگایه‌یل ده‌وڵه‌ت په‌یڕه‌وى كردن ك ئه‌ویش بڕیاره‌یل چاره‌نویسساز بوى و هووكار گشت ئه‌و تاوانه‌یله‌ بوى ك ده‌رهه‌ق وه‌ ملله‌ت و نیشتمانمان ئه‌نجام دریا.

 

ئه‌و تاوانه‌یله‌ هان كوومه‌ڵگاى ناوده‌وڵه‌تى دا ئه‌را چه‌سپانن مقه‌یه‌تیكردن مه‌ده‌نیه‌یل له‌شه‌ڕ ده‌سڵات و ئه‌را ئه‌وه‌ك ناچار حكوومه‌ت به‌عس بكا ده‌س له‌و تاوانه‌یله‌ ئه‌ڵگرید ده‌رهه‌ق ملله‌ت.

 

وه‌لى جى داخه‌ ئه‌وه‌ك رویدا له‌شوون رمیان رژیم به‌عس تاوانبار، ئه‌وه‌ بوى هیزه‌یل ئۆپۆزسیۆن هاتنه‌وه‌و ڕوى له‌ پرووسه‌ى سیاسى كردن، وه‌لى وه‌هه‌مان ریڕه‌و رژیم به‌عس مه‌سه‌له‌ى چینایه‌تى هاوردنه‌وه‌ جوور سیاسه‌تیگ چه‌سپیاگ و كریا په‌یڕه‌ویگ ئه‌را حوكم له‌وڵات فره‌ نه‌ته‌وه‌یى و دین و مه‌زه‌و، ئه‌ویش وه‌بى ئه‌وه‌ك مه‌ترسیه‌یلى له‌وه‌رچه‌و بگرن و له‌وانه‌یش به‌شبه‌شه‌وبوین وڵات ك دویاخر هاووڵاتى باجه‌گه‌ى ده‌ێد.

 

مه‌سه‌له‌ى چینایه‌تى له‌عراق ئمڕوو، مه‌ترسى نه‌یرێد له‌بان ده‌سڵات، چوینكه‌ وه‌ئاسانى ده‌سڵات گرێده‌ ده‌س، وه‌لى مه‌ترسیه‌گه‌ ئه‌وه‌سه‌ ك شایه‌ت هه‌ڕه‌شه‌ له‌وجوود ده‌وڵه‌ت ومه‌ندنى بكا، وه‌ل ئه‌وه‌یشا مه‌سه‌له‌ى چینایه‌تى له‌عراق نه‌بایه‌د جوور كیشه‌یگ دینى ته‌ماشاى بكه‌یم، چوینكه‌ كیشه‌یگه‌ سیاسى و حزبه‌یل دینى جموجویل ده‌نه‌پى دژ به‌رژه‌وه‌ندى هیزه‌یل كوومه‌ڵایه‌تى، ئنجا ئى هیزه‌یل كوومه‌ڵایه‌تییشه‌ تویه‌نن وه‌ل یه‌كا بژیه‌ن دویر له‌ تون وتیژى چینایه‌تى له‌وه‌ختیگ ك حزبه‌یل سیاسى علمانى نوێنه‌رایه‌تییان كه‌ن و باوه‌ڕ وه‌دیموكراسى دیرن ئه‌را بنیاتناین كوومه‌ڵگایگ دویر له‌سته‌م و چه‌وسیان.

 

زه‌كى ره‌زا

 

ج