ئه‌ڕا ئه‌وه‌گ هه‌میشه‌ جوان بمینن

شفق نيوز

* سه‌ردان كلینكه‌يل ته‌ندروسى: ئاساره‌يل هوڵیۆد وه‌شێوه‌ى وه‌رده‌وام هه‌فتانه‌ سه‌ردان كلینكه‌يل ته‌ندروسى ئه‌كه‌ن تا پووس ده‌مچه‌ویان له‌ زیتگه‌و دشپوك یا هه‌رچشتێگ ترناشرین پاكه‌و بكه‌ن.

* نه‌شته‌رگه‌ریه‌یل جوانكاری: زوورم هونه‌رمه‌نده‌یل ناودار جه‌هانى نه‌شته‌رگه‌رى لاوردن لوچه‌یل ده‌مچه‌و و به‌رزه‌و كردن پیه‌ڵیو و لاوردن چه‌ورى ژیر چه‌وه‌یلیان ئه‌نجام ئه‌يه‌ن.

* نه‌وسیان له‌وه‌ر خوه‌ر: ئاساره‌يل هوڵیۆد تا ئه‌وره‌گ وه‌پێیان كریه‌ی له‌وه‌ر تیشك تیژ خوه‌ر نا‌وسيه‌ن و له‌وه‌ر خوه‌ريش عه‌ینه‌ك سیه‌ ئه‌كه‌نه‌ چه‌ویان ئه‌ڕا ئه‌وه‌گ خوه‌یان له‌ زه‌ره‌ده‌یل ئه‌و تیشكه‌ بپاريزن و بيجگه‌ ئه‌وه‌یش هه‌ر ڕووژ وه‌ شێوه‌ى وه‌رده‌واميش ئه‌و كرێمه‌یله‌ وه‌كار ئه‌وه‌ن ك پووسیان له‌ وه‌رانوه‌ر تیشك خوه‌ر پاريزێد.

*وه‌كاربردن ده‌رمانه‌یل چالاك: زوورم هونه‌رمه‌نده‌یل ناودار جه‌هان ملیونه‌ها دولار خه‌رج ئه‌كه‌ن ئه‌را سه‌ندن تازه‌ترین ده‌رمانه‌یل دژه‌ پیرى و وه‌ل ناودارترین پسپوره‌یل جوانكاری ڕاوێژ ئه‌كه‌ن ئه‌ڕا ئه‌وه‌گ ده‌سمه‌یه‌تیان بيه‌ن تا ئه‌و ده‌رمانه‌یله‌ ئه‌ڵوژنن ك وه‌ل نیازه‌یلیان بگونجیه‌ى، يه‌يش بێجگه‌ ئه‌وه‌گ پویل فريه‌‌یگيش خه‌رج وه‌كاربردن ده‌رزیه‌یل بوتاكس ئه‌كه‌ن له‌ تيوڵ و ده‌ورگرد چه‌و و لیوه‌یليان تا لووچى و خه‌ته‌يل فريه‌ هویرد ده‌مچه‌ویان وه‌پی لاوه‌ن.

* ماساژ یا وڵاین وه‌ئه‌ڵماس: زوورم ئاساره‌یل هوڵێود په‌نا ئه‌وه‌نه‌ وه‌ر ماساژداین گیانیان وه‌ئه‌ڵماس، ك يه‌يش گرانترین چشته‌ ئه‌را مه‌قه‌یه‌تيكردن پووس به‌ده‌ن، ك وه‌شيوه‌یگ چه‌ن تیكه‌ ئه‌ڵماس ٨١ غرامى چه‌سپننه‌ شوونه‌یل ئنرژى زا له‌ جه‌سه‌ و نرخ ئه‌و ئه‌ڵماسه‌یليشه‌ ئه‌ڕه‌سيده‌ نزيكه‌ی‌ ١ ، ٥ ملیون دولار.

* وه‌رزش و ئاوخواردن : ئاساره‌یل جه‌هانى وه‌شيوه‌ی وه‌رده‌وام وه‌رزش ئه‌كه‌ن و رووژانه‌يش ٢ لتر ئاو ئه‌خوه‌ن و ته‌قالایش ئه‌كه‌ن وه‌شیوه‌ی وه‌رده‌وام سه‌وزی و میوه‌جات و به‌رهه‌مه‌یل ده‌ریایى بخوه‌ن.

ج . ك

سه‌رچه‌وه‌: گووڤار له‌ها