وه‌دویرزانستن خوه‌ینیشانداین له‌ عیراق

شفق نيوز

له‌ ناوڕاس پایته‌خت و وه‌ره‌و ناوچه‌ى سه‌وز كه‌فته‌ ڕى، هاووه‌خت وه‌ل بانگه‌واز یا ده‌عوه‌ته‌یل فره‌یگ له‌ بان ماڵپه‌ڕه‌یل ئینته‌رنێتى ئه‌را ڕیكخستن خوه‌ینیشانداین له‌ ڕووژه‌یل 14 و 25 ئى مانگه‌ له‌ مه‌یدان ته‌حریر له‌ناوڕاس به‌غدا، ئه‌را ناڕه‌زایى ده‌ربڕین له‌باره‌ى گه‌نه‌وبوین ئاست خزمه‌تگوزارى له‌ وڵات؛ نوێنه‌ریگ له‌ هاوپه‌یمانى نیشتمانى ئه‌وه‌ وه‌دویر زانست ك خوه‌ینیشانداینه‌یلیگ جوور ئه‌وه‌گ له‌ تونس و مسر به‌رپابوى، له‌ عیراق به‌رپابوود و ئه‌وه‌یشه‌ ئاشكراكرد ك داواكردن ئى خوه‌ینیشانداینه‌یله‌ له‌ خاتر خاسه‌وكردن واقع خزمه‌تگوزاریه‌ له‌ وڵات، و داوایش له‌ حكوومه‌ت كرد خزمه‌تگوزاریه‌یل ئه‌را هاوڵاتیه‌یل دابین بكه‌ید.

عه‌لى شلاه‌ له‌ په‌یوه‌ندییگى وه‌ل ماڵپه‌ڕ شه‌فه‌ق ئه‌وه‌یشه‌ ڕووشنه‌وكرد ك:"هه‌ردوگ ملله‌ت تونس و مسر له‌ حاڵه‌ت سه‌ركوتكردنیگ ژیان ك چه‌ن ده‌یه‌یگ دریژه‌ كیشا، وه‌تایبه‌تى ملله‌ت تونس ك هاوشیوه‌ى ڕژیم وه‌رین عیراق بوى وچنگ ناویده‌ بان ده‌م ملله‌ته‌گه‌ى" و به‌راوردكردن ناوبه‌ین حكوومه‌ت عیراق و ڕژیمه‌یل تونس و مسر وه‌ زوڵمیگ گه‌ورا وه‌سفكرد.

ئه‌وه‌یشه‌ ئاشكراكرد ك :"خوه‌ینیشانداینه‌یل عیراق وه‌خاتر خاسه‌وكردن واقع خزمه‌تگوزاریه‌، چوینكه‌ ملله‌ت عیراق له‌ى هه‌یشت ساڵ گوزه‌یشته‌، وه‌ده‌س گه‌نى خزمه‌تگوزارى ناڵان، و حكوومه‌ت عیراق بایه‌ته‌ دابینى بكه‌ید". و جه‌خت له‌بان ئه‌وه‌یشه‌كرد ك:"خوه‌ینیشانداینه‌یل نه‌بایه‌ت له‌ چوارچیوه‌ى عه‌قلانیه‌ت ده‌رچوود ئه‌را مقه‌یه‌تى كردن ئاشتى مه‌ردمى، و له‌هه‌مان وه‌ختیش داواى جیوه‌جیكردن داواكاریه‌یل كوومه‌ڵایه‌تى وه‌ ئاراسته‌كردنیان وه‌ره‌و ئه‌نجوومه‌نه‌یل پارێزگایه‌یل و وه‌زاره‌ته‌یل په‌یوه‌ندیدار ئه‌را دابین كردن خزمه‌تگوزاریه‌یل".

شلاه‌ ئاماژه‌یش وه‌وه‌دا:"ئه‌وه‌گ له‌ ناوچه‌گه‌ ڕوى دا له‌ خوه‌ینیشانداین و هاتن شه‌پۆل یا مه‌وجه‌ى دیموكراسى وه‌شیوه‌ى گه‌ورایگ به‌شدارى كه‌ید له‌ چه‌سپانن ئاسایش له‌ وڵاته‌گه‌مان، چوینكه‌ ئه‌و تیرۆریستیه‌یله‌ ك له‌و وڵاته‌یله‌ ئه‌را وڵاته‌گه‌مان هاتیان، له‌یه‌ولا ئه‌را وڵاته‌یله‌ چنه‌دویاوه‌".

جه‌خت له‌بان ئه‌وه‌یشه‌كرد ك:"حكوومه‌ت جددیه‌ له‌ خاسه‌وكردن واقع خزمه‌تگوزارى، و دیداره‌یل وه‌رده‌وام وهه‌وڵ و ته‌قه‌لایه‌یل گه‌ورایگ هه‌س ئه‌را خاسه‌وكردن كاره‌با و كارت خوه‌راكى وه‌خاتر ڕه‌ساننى وه‌شیوه‌یگ ته‌واو ئه‌را هاوڵاتیه‌یل". و داوایش كرد :" مه‌عاش فه‌رمانبه‌ره‌یل زیاى بكریه‌ید وه‌و شیوه‌ ك وه‌ل بارووه‌زع زندگانى بگونجیه‌ید و كه‌رامه‌ت خێزان عیراقى بپاریزید، و له‌وه‌رانوه‌ر ئه‌وه‌یشه‌ مه‌عاش به‌رز كاروه‌ده‌سه‌یل كه‌مه‌و بكریه‌ید تا هاوشان مه‌عاش مامۆستایه‌یل زانكۆ یا جامعه‌ بوود".

نوێنه‌ریگ لیست عیراقیه‌ له‌لاى خوه‌یه‌و پیشبینى ئه‌وه‌ كرد ك خوه‌ینیشانداین جوور ئه‌وه‌گ له‌ تونس و مسر روى دا له‌ عیراق دوباره‌وه‌ نه‌ود، و لایه‌نگرى خوه‌یشى ئاشكراكرد ئه‌را خوه‌ینیشانداینه‌یل ئاشتیانه‌ ئه‌را خاسه‌وكردن واقع خزمه‌تگوزارى له‌ وڵات.

ناهده‌ داینى له‌ په‌یوه‌ندییگى وه‌ل ماڵپه‌ڕ شه‌فه‌ق زیاتریش وت:" هویچ زه‌ره‌دیگ نیه‌ له‌ هه‌ر خوه‌ینیشانداینیگ ئاشتیانه‌ ئه‌را خاسه‌وكردن خزمه‌تگوزاریه‌یل چوینكه‌ ملله‌ت عیراق ته‌نیا داواى لایكه‌م كه‌ره‌سته‌یل ژیان كه‌ید". ئه‌وه‌یشه‌ وه‌دویر زانست ك :" خوه‌ینیشانداین له‌ عیراق به‌رپابوود جوور ئه‌وه‌گ له‌ تونس و مسر به‌رپا بوین".

ئه‌وه‌یشه‌ ڕووشنه‌وكرد ك :"واقع خزمه‌تگوزاریه‌یل له‌ ساڵ 2003 وه‌ تا ڕووژ ئمڕوو وه‌گووره‌ى خواست نیه‌، و تا ئیسه‌یش ژیرخانه‌یل تویش كه‌مى گه‌ورایگ هاتنه‌". و جه‌خت له‌ بان ئه‌وه‌یشه‌كرد ك :"گه‌ناته‌كارى دارایى و ئیدارى په‌رش و بڵاوه‌و بویه‌سه‌ ناو زوورمى فه‌رمانگه‌و وه‌زاره‌ته‌گان".

زیاتریش وت ك:" خاسه‌وكردن ئاست خزمه‌تگوزارى وه‌ بارووه‌زع ئاسایشیه‌و به‌نه‌، و له‌ى ماوه‌ى دویاییه‌ بار ئاسایشى خاسه‌وبوین گه‌ورایگ وه‌خوه‌یه‌و دیه‌ له‌ چوار قوڕنه‌ى وڵات".

جه‌خت له‌بان ئه‌وه‌یشه‌كرد ك:"حكوومه‌ت جددیه‌ له‌ خاسه‌وكردن بارووه‌زع زندگانى هاوڵاتیه‌یل، ئه‌ویش وه‌ دابینكردن ماده‌یل كارت خوه‌راكى و وزه‌ى كاره‌با، پشتگیرى كردن له‌ كه‌رت تایبه‌ت، وه‌ چه‌سپانن قانوون باج گومركى و ئاسانه‌وكردن هاتن كۆمپانیایه‌یل وه‌رهه‌رهاوه‌ر".

داینى داوایش كرد :" مه‌عاش خانه‌نشینه‌یل و هێزه‌یل له‌شكر و ئاسایش ناوه‌خوه‌یى زیاى بكریه‌ید و وه‌رداین 280 پله‌ فه‌رمانبه‌ریه‌گه‌ ئه‌را دامه‌زرانن بیكاره‌یل".

هه‌ر له‌هه‌مان باوه‌ت شیه‌وكه‌ر سیاسى عباس یاسرى له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:"بارووه‌زع عیراق جیاوازه‌ وه‌ل ئه‌وه‌گ هاله‌ مسر و تونس، چوینكه‌ عیراق هه‌ر ساڵ 2003 تا ئمڕوو خوه‌ینیشاندایه‌نه‌یل فره‌یگ وه‌خوه‌یه‌و دیه‌ له‌ مه‌یدانه‌یل جیاجیا جوور داواكردن خاسه‌وكردن واقع خزمه‌تگوزارى و ڕوى وه‌ڕوى بوین داگیركه‌ره‌یل، وه‌لى هویچ كامیان ئه‌را ڕمانن ئۆپه‌راسیۆن سیاسى نه‌وى". و جه‌خت له‌ بان ئه‌وه‌یشه‌ كرد ك:"بانگه‌وازكردن ئه‌را به‌رپاكردن خوه‌ینیشانداین وه‌خاتر ده‌سنیشانكردن حاڵه‌تیگ دیاریكریاى، نه‌ك گشتاندنى یا تعمیم كردنى تا ڕمانن ئۆپه‌راسیۆن سیاسى وه‌گشتى بگریده‌وه‌، چوینكه‌ سسته‌م حوكم له‌ عیراق بگۆڕ یا متغیره‌ و نه‌گۆڕ نیه‌".

داینى به‌پاكردن خوه‌ینیشانداین ئه‌را خاسه‌وكردن خزمه‌تگوزاریه‌یل وه‌:"كار خاسیگ" وه‌سفكرد و زیاتریش وت :"ئه‌گه‌ر ئیجووره‌ خوه‌ینیشانداینه‌لیگ به‌رپابوود نیه‌تویه‌نید شماره‌ى گه‌ورایگ مه‌ردم جه‌مه‌و بكه‌ید، چوینكه‌ ته‌ركیز له‌ بان لایه‌نیگ دیاریكریاى كه‌ید".

شایان باسه‌ ك پارێزگایه‌یل كه‌ربه‌لا و نه‌جه‌ف و واست و مه‌یسان و حله‌ و نه‌ینه‌وا و كه‌ركووك و بابل و چه‌ن ناوچه‌یگ له‌ به‌غداى پایته‌خت چه‌ن خوه‌ینیشانداینیگ دژ وه‌ گه‌نه‌وبوین واقع خزمه‌تگوزاریه‌یل وه‌خوه‌یانه‌و دین.

 

ئا: یاسر عماد