دۆسیه‌یگ له‌بان ڕفه‌

شفق نيوز

ئه‌همیه‌ت فره‌یگ دیرم ئه‌را ئى چینه‌ له‌ كوومه‌ڵگاو ئاره‌زوو دیریم جویر خواستیگ  بانه‌وه‌ ئه‌را توانایى ئمپراتۆریه‌تیان له‌ڕوى ئابووریه‌وه‌ ك كاریگه‌رى داشت له‌بان ده‌سڵات به‌عس.

له‌دویاى ڕمیان رژیم وه‌رین به‌عس حزب و ڕیكخریاگ و جموجویله‌یل یا حه‌ره‌كه‌یلیگ  ده‌ركه‌فت و ده‌سكردنه‌ كاركردن له‌وه‌ر خاتر ئى چینه‌، وه‌لى كار یه‌كگرتگى له‌ده‌سدان و له‌وه‌یش زیاتر ئه‌وه‌ بوى كه‌سه‌یل فره‌یگ وه‌بان پشت ئه‌وانه‌وه‌ چینه‌ بان و له‌لیانیش له‌ ئه‌نجوومه‌ن نیشتمانى عراقى كورسى كه‌فته‌ پیان، له‌لیانیش بوى وه‌بان كورده‌یل فه‌یلیه‌وه‌ ره‌سینه‌ پله‌و پایه‌یل جیاجیا له‌چوارچیوه‌ى ده‌وڵه‌ت عراقى و خزمه‌ت وه‌ كه‌سه‌یل تر كرد و دووسیه‌ یا مه‌له‌ف كورده‌یل فه‌یلى له‌بان ره‌فه‌ له‌هویره‌و برد، چوینكه‌ كورده‌یل فه‌یلى ده‌س باڵایگ نه‌یاشتن له‌ دروسكردن رویداگ له‌ شوون ڕمیان رژیم، ئمجا وه‌ باوه‌ڕ ئیمه‌ كاریگ جویر میلیشیات نه‌كردن، ك هه‌رچه‌نى ئه‌وان له‌ ڕز یه‌كم بوین له‌ قوربانیداین و به‌شداریكردن له‌وه‌ر خاتر بنیاتناین و عراق و ئازادكردنى، وه‌لى مه‌یدانه‌یل و ڕویداگه‌یل شایه‌تى ده‌ن ئه‌ڕایان ك ده‌نگ و كرده‌وه‌ بوین له‌ ڕووژگاریگ ك مه‌ردمان فره‌یگ رخیان چیاگ له‌وه‌ك وه‌شان دیوار ئاسایش گشتى عراقیشا هاتوچوو بكه‌ن. وه‌لى وه‌ داخه‌وه‌ ده‌س غه‌در له‌لیان وه‌شیا، ك هه‌رچه‌نى ئه‌وان پیه‌ڵیگ بوین له‌ناونى دین و نه‌ته‌وه‌، ك ده‌س خیانه‌تكار ره‌سیه‌ پیان و هه‌رچه‌نى ئه‌وان نه‌وه‌ى قوربانى بوین له‌وه‌ر خاتر چین ژیرپاكریاگ و ئازادكردن بازاڕ له‌ده‌س پیاوكوشه‌یل، وه‌لى وه‌داخه‌وه‌ وه‌خته‌یلیان چیه‌ سه‌ر و كه‌فته‌ ژیر ده‌وار و چه‌وه‌ڕى هه‌قه‌یل زه‌فتكریاگیان كردن.

بیگومان جویر ئه‌وه‌ك ئاشكراس، كیشه‌ى كورده‌یل فه‌یلى له‌لاى مه‌ردمان فره‌یگ  ئاشكرا بوى و ئیراده‌ى سیاسى له‌ عراق ئه‌ومه‌سه‌له‌ وه‌گووره‌ى قوربانیداینیان وه‌رنه‌گرت دویاى ئه‌وه‌ك دووسیه‌ یا مه‌له‌فه‌گه‌یان خوه‌نده‌وه‌. وه‌ل ئه‌وه‌یشا دویاى چه‌نه‌ها ساڵ له‌ داگیركارى ئه‌و هاووڵاتیه‌یله‌ ك ماڵه‌یلیان داگیر كردنه‌ ئاماده‌ نین ماڵه‌یلیانه‌ بیه‌نه‌ ده‌س خاوه‌نیان ك هه‌رچه‌نى هه‌وڵ و ته‌قلاى ئه‌وه‌ ده‌ن ئه‌و كه‌سه‌یله‌ ماڵه‌یلیان زه‌فتكردنه‌ چووڵى بكه‌ن، وه‌لى نوڕید زه‌فتكه‌ره‌یل وه‌ناو قانوونه‌وه‌ قسه‌ كه‌ن له‌ سه‌ندن و فرووشتن تا خاوه‌ن ماڵ بانه‌وه‌ ئه‌را ناو ماڵه‌یلیان.

ئه‌و داڵگه‌یله‌ ك ڕوڵه‌یلیان بى سه‌روشوونه‌، گشت شوونیگ گه‌ردیان له‌وه‌ر خاتر ئه‌وه‌ك وه‌ره‌قه‌یگ  بكه‌فیگه‌ ده‌سیان و هه‌واڵ ڕوڵه‌یلیان له‌تى نویسیاویگ ، وه‌ل ئه‌وه‌یشا هه‌وڵه‌یل فره‌یگ  دریا له‌لایه‌ن پیاوه‌یل سیاسیه‌وه‌ له‌ سازكردن كۆنگره‌یل جووراو جوور ك وه‌ بان كیشه‌یل كورده‌یل فه‌یلیه‌وه‌ كه‌فتنه‌ خه‌یر و ده‌سكه‌فت خاسیگ هاوردنه‌ ده‌س، ك ئه‌ویش وه‌ سه‌ندن روخسار درووكانى وه‌ناو ئه‌وانه‌وه‌و له‌ هه‌مان وه‌خت گووشگره‌یل فره‌یگیش ئاماده‌ى ئه‌وكۆنگره‌یله‌ بوین، وه‌لى كورده‌یل فه‌یلى وه‌بان ئه‌وه‌یشه‌وه‌ هه‌ر مكوڕ بوین له‌بان وه‌رده‌وامى كاره‌یل خوه‌یان له‌وه‌ر خاتر هاوردنه‌وه‌ى هه‌قه‌یل چینه‌گه‌یان و سه‌بر فره‌یگیش كردن له‌ڕوى ئه‌قڵ شۆڤێنى ك وتیاگه‌ پیان بیگانه‌و جویر وه‌ربه‌سیگ بوین له‌نواى ئه‌وانه‌ك هه‌وڵ شیوانن ڕزه‌یلیان دیان، ئه‌وه‌ بوى فره‌یگ له‌و كه‌سه‌یله‌ دژ هه‌وڵ و ته‌قلاى كورده‌یل فه‌یلى بوین خه‌ساره‌ت له‌ گره‌وه‌یلیان كردن و هیمان ڕى دریژیگ ها له‌نواى ئى چینه‌ ئه‌را هاوردنه‌وه‌ى ژیانیگ جویر ژیان هاووڵاتیه‌یل تر ك داواى قه‌ره‌بووكردن ئه‌كا له‌و زه‌ره‌ده‌یله‌ ك وه‌پى ره‌سى هه‌ر له‌حاڵه‌ت كوومه‌ڵایه‌تى بگر تا حاڵه‌ت ده‌روینى و گشت ئه‌و به‌دبه‌ختى و مه‌ینه‌تیه‌ ك هاته‌ بانیان، ك ئه‌ویش وه‌گووره‌ى یه‌كگرتگى هه‌وڵ و ته‌قلاو هاوكاریكردن پڕ له‌ ئه‌قڵانیه‌ت و ئیراده‌ى بته‌ویگ، ك شایه‌ت نه‌وه‌یل ژیر ده‌وار و مه‌ردم غوربه‌ت و ئاواره‌ چوینیه‌تى خه‌بات باوگ و باپیره‌یلیان نه‌زانن و دویر نیه‌ تاریخیش چه‌واشه‌وه‌ كریاویگ و له‌به‌رژه‌وه‌ندى ئه‌وان نه‌وگ، وه‌لى هیمان كه‌سه‌یل خاس وخه‌یردار مه‌ندنه‌و به‌شدار بوین له‌ داناین هه‌قه‌یل قانوونى و ئیراده‌ى خه‌یر سه‌ركه‌فت له‌ى باوه‌ته‌وه‌ ك هه‌رچه‌نى كورده‌یل فه‌یلى روى وه‌ڕوى كیشه‌یل فره‌یگ بوینه‌وه‌و خریانه‌ دویا پله‌كانه‌و ئه‌وه‌ بوى بڕیار دادگا سه‌ركه‌فتنیگ بوى ئه‌ڕایان.

هه‌ر له‌ى باوه‌تیشه‌وه‌سه‌رۆك كوومار عراق جه‌خت كرد له‌بان كاراكردن بڕیاره‌یل دادگاى باڵاى تاوانه‌یل، ئه‌ویش وه‌ وازكردن نویسینگه‌ یا مه‌كته‌بیگ ئه‌را كاروبار كورده‌یل فه‌یلى، ئه‌یه‌ بیجگه‌ پشتگیرى سه‌رۆك هه‌رێم كوردستان مه‌سعود بارزانى و نورى مالكى سه‌رۆك وه‌زیره‌یل و له‌هه‌مان وه‌خت سه‌رچه‌وه‌ى دینى سه‌ید عه‌لى سستانى ك له‌ى باوه‌ته‌وه‌ هه‌ڵویس جوانیگ  داشت.

گشت هه‌وڵ و ته‌قلایگ له‌لایه‌ن هه‌ر وه‌رپرسیگه‌وه‌ له‌وه‌ر خاتر كیشه‌ى كورده‌یل فه‌یلى مه‌عناى گرینگى یا ئه‌همیه‌تداینه‌ وه‌ى چینه‌و ئومیده‌واریم كیشه‌گه‌ بكه‌فیگه‌ ژیر چه‌ودیرى خاسیگه‌وه‌و پشتگووش نه‌خریه‌یگ نه‌ك ته‌نیا له‌وه‌ر هاوردنه‌وه‌ى هه‌قه‌یلیان، به‌ڵكوو له‌وه‌ر خاتر هاوردنه‌وه‌ى رووح ئه‌را ئى چین زوڵملیكریاگه‌ ك هیمان ناڵنیگ وه‌ ده‌س به‌دبه‌ختى و مه‌ینه‌ته‌وه‌ له‌ناوچه‌یل مللى و ئومیده‌واره‌یم گرینگى یا ئه‌همیه‌ت خاسیگ  وه‌ خه‌مه‌یل ئى چینه‌ بدریه‌یگ  وه‌ گووره‌ى كاریگ  ستراتیجى ئه‌را هاوردنه‌وه‌ى ژیان به‌خته‌وه‌ریان. چوینكه‌ ئاشكراس ك بڕیار دادگا نه‌بایه‌د جى وه‌جى نه‌كریه‌یگ و هه‌ر له‌وه‌ر ئه‌وه‌یش بایه‌سه‌ چه‌ودیرى بكریه‌یگ و داواكاریم له‌وانه‌ك گرینگى ده‌نه‌ كیشه‌ى كورده‌یل فه‌یلى له‌گشت مه‌یدانیگه‌وه‌ هه‌وڵ و ته‌قلا بیه‌ن ئه‌را هاوردنه‌وه‌ى هه‌قه‌یل زه‌فتكریاگیان.