دویاى 35ساڵ له‌ دیكتاتۆریه‌ت چه‌ ئاڵشت بوى له‌ عراق؟

شفق نيوز

 

بیگومان ئه‌وه‌ك له‌عراق ئاڵشت بوى، نه‌مه‌ند رژیمیگ دیكتاتۆرى بوى، وه‌لى ئه‌وه‌گ شوونى گرت هویچ له‌و ئومید و ئه‌زره‌ته‌یله‌ ناورده‌ جى ك ملله‌ت سته‌مدیده‌ داشته‌ى و بگر كرده‌وه‌یلیگیش ته‌نانه‌ت ئه‌گه‌ر رژیم به‌عس له‌لى غافڵ بویه‌ ئیسه‌ حكوومه‌ت تازه‌ ئه‌ویش پڕه‌و كرد و نه‌یشتگه‌ عراق بى خوین و كاولكارى بمینید!!

زوڵم و تاوان فیشتره‌و بویه‌، تونڕه‌وى و ته‌كڕه‌وى هه‌ر وه‌رده‌وامه‌، دروسكردن خوسه‌و كینه‌ت له‌ ناونى پیكهاته‌و لایه‌نه‌یل ته‌كانیگ فیشتر داگه‌ وه‌ره‌و ماڵویرانى، بیبه‌شكردن ملله‌ت له‌ مووچه‌ى مانگانه‌ زوڵم و سته‌میگ تر تازه‌ى ئى حكوومه‌ته‌سه‌ ك ئیسه‌ نیشتگه‌و خوازیاره‌ وه‌" خوین وه‌ خوین" و هانداین مه‌ردم هووزه‌یل دعایه‌ى هه‌ڵوژاردن ئه‌را مه‌ندنه‌وه‌ى خوه‌ى بكا له‌بان ده‌سڵات.

له‌ى عراقه‌ تا ئیسه‌ هویچ سیستمیگ وه‌ ناو دیموكراسیه‌ت و هویچ پیشكه‌فتیگ له‌ بوار بنیاتناین دیموكراسى ناته‌سه‌ وجوود، هیمان كوشتن و بڕین و پلانكارى هه‌ر وه‌رده‌وامه‌و زوڵم و تاوانیش نه‌خشه‌ى سیاسى ئه‌راى نریه‌یدو هیمان گه‌ناته‌كارى و دارایى ملله‌ت وه‌ زوور زه‌فت كریاگه‌و له‌ڕوى ئارامى و ئاسایش و سه‌قامگیرییشه‌و رووژیگ نیه‌ له‌ى عراق ده‌یه‌ها كه‌س نه‌كوشیه‌ن و ده‌یه‌ها ته‌قینه‌وه‌و كرده‌وه‌یل ترۆریستى روى نه‌یه‌ید، یه‌یش گشتى له‌ژیر حوكم ده‌سڵاتداره‌یلیگ ك خوه‌یان ئه‌كته‌ر دروسكه‌ر و دانه‌ر پلان نه‌ته‌وه‌یى و مه‌زه‌وى و ره‌گه‌زیین له‌تى.

ئه‌ى دى نازانیم دویاى 35 ساڵ له‌ حوكم دیكتاتۆریه‌ت چه‌ ئاڵشت بویه‌ له‌ى عراقه‌و چ خاسسازى و ئاوه‌دانییگ له‌تى هاته‌سه‌ وجوود؟ یه‌سه‌ نه‌ حكوومه‌ت خه‌ت په‌رله‌مان خوه‌نید نه‌ په‌رله‌مانیش به‌زه‌یى وه‌ روڵه‌یل ملله‌ت ئه‌یادو نه‌یش هه‌ردوگیان خه‌م ئى وڵاته‌ خوه‌ن، یه‌ى خه‌ریك جه‌رده‌یى و تاڵانكردنه‌ و ئه‌ویش خه‌ریك گه‌رمكردن ئاگر ئاشووگه‌رى و نه‌ته‌وه‌ییه‌!!.

دانیال حه‌سه‌ن

ج . أ