دياريكردن ناسنامه‌ى كورد فه‌يلى

شفق نيوز

ئمجا وه‌و خاتريشه‌ داوا يه‌كه‌مجار داوا له‌ حكومه‌ت ناوه‌ندى ئه‌كه‌يم ك گرينگى تايبه‌تيگ بيه‌ێده‌ كورده‌يل فه‌يلى، چوينكه‌ فه‌يليه‌يل برا و شه‌ريكمانن له‌ ئايين و خاك و مێژوو ك بايه‌سه‌ له‌ شانيه‌تيان به‌رزه‌و بكا وه‌ بوونه‌ى ئه‌و قورسايى ئه‌نترۆپۆلۆجيه‌ ك هاته‌سه‌ تويشيان له‌ناو جه‌سه‌ى عراقى و وه‌خاتر ئه‌و ئه‌قڵ و داناييه‌ ك ديرنه‌ى و تواناداره‌ له‌بان به‌شداريكردن له‌ پرووسه‌ى بنياتناين عراق تازه‌ وه‌گووه‌رى ئه‌و شيوازه‌يل ديموكراسيه‌ ك بانگه‌واز ئه‌راى ئه‌كه‌يم. دويه‌م جاريش داوايش له‌ حكومه‌ت هه‌رێم كوردستان ئه‌كه‌يم نه‌خش جياى نموونه‌يى خوه‌يان له‌ پشتگيرى و خزمه‌ت كيشه‌ى كورد له‌ هويره‌و نه‌وه‌ن وه‌ دريژايى ماوه‌ى خه‌باتيان دژ ئه‌و رژيمه‌يل ديكتاتۆريه‌ ك سته‌م له‌ كورد كردن و له‌ گشت كورديگ وه‌بى جياوازى، چوينكه‌ دريژه‌وكردن ده‌س يارمه‌تى ئه‌ڕايان عه‌يب نيه‌ وه‌ل وه‌ديكردن قه‌واره‌يگ تايبه‌ت وه‌پيان و دياريكردن نوێنه‌ريان له‌ په‌رله‌مان و حكومه‌ت وه‌لاى كه‌مه‌و، ك وه‌و خاتريشه‌ نه‌بايه‌د هوير حكومه‌ت هه‌رێم كوردستان له‌لاى بنياتناين پاريزگايه‌يلى بوود وه‌بى كورده‌يل فه‌يلى ك دابه‌ش بوينه‌ له‌ جه‌سه‌ى عراق له‌ باكوور تا باشوور.

هه‌ر له‌وه‌ر ئه‌وه‌يش ئويشيم ئه‌ى سه‌ركرده‌يل ريزدار له‌ حكومه‌ت ناوه‌ندى و حكومه‌ت هه‌رێم ئايا چه‌وه‌ڕى ئه‌وه‌ ئه‌كه‌ين كورده‌يل فه‌يلى چه‌ك له‌ روێدان به‌رزه‌و بكه‌ن دوياى ئه‌وه‌گ گشت قاپيه‌يل له‌ ڕوييان به‌ساين و دوياى ئه‌وه‌گ جاڕس بوين له‌ شيوازه‌يل له‌وه‌رگرتن ڕيه‌يل ئاشتيانه‌و دبلۆماسى، وه‌و خاتريشه‌ ئوميده‌وارم ئى كيشه‌ له‌ چوارچيوه‌ى ماڵ عراقى چاره‌سه‌ر بكريه‌ێد و ڕى نايه‌يم ده‌ربچێده‌ ده‌يشت ئى چوارچيوه‌ ئه‌را ريكخرياگه‌يل جه‌هانى جوور يه‌كێتى ئۆرپا و نه‌ته‌وه‌يل يه‌كگرتگ و ريكخرياگه‌يل تر و فه‌يليه‌يل جوور قه‌سه‌يل عراق ئاڵشت بكه‌ن ئه‌را يۆگسلافياى دويه‌م و كيشه‌و گرفت بكه‌فێده‌وه‌و خودانه‌خواسته‌ جه‌نگ ناوخوه‌يى ده‌س وه‌پى بكاو دوياخريش وه‌ دابه‌شكردن كووتايى وه‌پى باێد له‌بان بنه‌ماى تايفى و ره‌گه‌زى، دى نموونه‌ى فريه‌يگ ها وه‌رده‌مدان و مقه‌يه‌ت بوون له‌ هاتنه‌وه‌ى ئاشووگه‌رى.

ساحب كازم ئه‌لهلالى