خیانه‌ت له‌ده‌ستوور، خیانه‌ته‌ له‌ملله‌ت

شفق نيوز

خوه‌شبه‌ختى و دووسى و ژیانیگ بى گرفت له‌لى باێده‌ وجوود. وه‌لى هه‌ر وه‌ختیگ  سیاسه‌ت له‌ره‌فتار و هه‌ڵسووكه‌فت ئه‌خلاقیه‌و دویر بوى، ئه‌وه‌ بیگومان كیشه‌و گرفت له‌لى كه‌فێده‌و و هه‌میشه‌ بار ژیان ناجیگیر و نه‌گونجیاگ مینێد و له‌ى ناونییشه‌ زه‌ره‌دمه‌ن یه‌كه‌م هاووڵاتییه‌.

ئمڕوو له‌عراق وه‌ناو دیموكراسى، سیاستیگ نیه‌ وه‌ناو سیاسه‌ت خزمه‌تكردن وه‌ خواست و ئاره‌زووه‌یل ملله‌ت، هه‌ر یه‌یش له‌یوا كردگه‌ گشت حزب ولایه‌نیگ ده‌س داشتوود له‌قورسه‌وكردن بار ئاسایى، چوینكه‌ زوورم سه‌ركرده‌ى حزبه‌یل له‌جیاى ئه‌وه‌ك وه‌و به‌شه‌ ك ئه‌ڕایان دیارى كریاس تیر نیه‌ون و به‌رژه‌وه‌ندى و ده‌سكه‌فت زیاتر خوه‌یان خستنه‌سه‌ بان به‌رژه‌وه‌ندى گشتى و ئارامى و ژیان ئاسووده‌ى ملله‌ت بى ده‌سڵات، وه‌ل ئه‌وه‌یشا مه‌سه‌له‌ى پابه‌ندى وه‌ ده‌ستوور له‌لایان ك زیاتر له‌ 85% مه‌ردم عراق ده‌نگ ئه‌ڕاى دان، فره‌ كزه‌و جووریگ له‌ دكتاتۆریه‌ت و ده‌مارگیرى له‌ئاستى تیه‌رنه‌ كار و خوازیار ئاڵشتكردن و ده‌سكاریكردن ئه‌و ده‌ستووره‌نه‌، یه‌یش جویر ئه‌وه‌ك چوین جایه‌ڵیگ دویه‌تیگ بخوازێد و له‌ سه‌ره‌تا وه‌ قسه‌ى خوه‌ش وه‌لیا ره‌فتار بكاو دویاى ماوه‌یگ بویشێد دڵم وه‌پیه‌و نیه‌.

له‌ دانایگ پرسین چوین هه‌ق خوه‌د له‌ دوشمن سینید؟ ئه‌ویش وت: وه‌ خود خاسسازیكردن(اصلاح النفس). ئیمه‌ى كورد ئمڕوو بایه‌سه‌ ئه‌وه‌ بزانیم ك حكوومه‌ت به‌غدا وه‌ته‌نیا ریگر نیه‌ له‌دابینكردن هه‌قه‌یلمان، به‌ڵكوو هاوساو نه‌ته‌وه‌یل داگیركه‌ریش ده‌خاڵه‌تكارن له‌ى مه‌سه‌له‌.

ئیمه‌ سه‌ره‌تا بایه‌سه‌ له‌ناو خود خوه‌مان دڵپاكى و دڵنیایى بیه‌یمنه‌ یه‌كترى، بایه‌سه‌ پشت سه‌ركرده‌یلمان بگریم له‌ وتار و هه‌وڵ و ته‌قلاى بى وچانیان، ئمجا له‌ى جووره‌ حاڵه‌تیگ بایه‌سه‌ گشت ناكووكییگ بخه‌یمنه‌ كنار و بچیمنه‌ پیرى چاره‌نویس و هه‌قه‌یل زه‌فتكریاى نه‌وه‌یلمانه‌و.

كورد هه‌میشه‌ ئه‌را گرفت و كیشه‌یل عه‌ره‌ب وه‌ تایبه‌ت ئه‌را ناكووكى و كیشمه‌كیش ناونى لایه‌نه‌یل عراقى مه‌ڵوه‌ن چاره‌سه‌ر بویه‌، ئه‌را نموونه‌: ده‌سپیشخه‌ریه‌گه‌ى سه‌رۆك مه‌سعود بارزانى له‌ هه‌ولێر و گرده‌وكردن گشت لایه‌نه‌یل ناكووك ك بویه‌ مایه‌ى پێكهاوردن حكوومه‌ت، یه‌یش جى شانازیه‌ ئه‌را كورد، وه‌لى ئایا عه‌ره‌ب وه‌ قه‌در ئه‌و هه‌ڵویسته‌یل به‌رزه‌ زانێد ك كورد ئه‌ڕاى ئه‌نجامیان ئه‌یاد؟ له‌یره‌ مه‌سه‌له‌گه‌ چیه‌سه‌ خانه‌ى گومانه‌و، چوینكه‌(جوواو خاسى وه‌ خاسیه‌)وه‌لى ئه‌وان هه‌رچى ئه‌ڕایان بكریه‌ێد خاسى كورد له‌وه‌رچه‌ویان نیه‌!!

ماناى ئه‌وه‌سه‌ نه‌ دویاخستن وه‌خت و نه‌یش سه‌بر زیاتر چاره‌سه‌ر كیشه‌ى كورد ناكا له‌ژیر سایه‌ى حكوومه‌تیگ بیده‌سڵات و فره‌ خاوه‌ن. چاره‌نویس ئیمه‌ كه‌فتیه‌سه‌ ده‌س قه‌ده‌ر، یا ئه‌وه‌سه‌ وه‌گشت هیزێگه‌و فشار یه‌كجاره‌كى باریه‌ێده‌ بان لایه‌ن وه‌رانوه‌ر یا ئه‌وه‌سه‌ ئه‌گه‌ر وه‌ڕاسى پشت دیریم و خود ئه‌مریكا خوه‌ى پشتگیرى كیشه‌ى كورد ئه‌كا جویر ئه‌وه‌ك ملله‌ت كورد له‌ڕووژگاریگ ئه‌ڕاى وسیاو بویه‌ هاوپه‌یمانى، ئه‌وه‌ ئیمه‌یش جویر هه‌رێم كۆسۆفۆ موڵه‌ت له‌خوه‌مان وه‌ربگریم و گشت ئه‌نجامیگ بگریمنه‌ مل. یه‌یش مینێده‌ بان تواناى خوه‌مان و ئه‌و جورئه‌ته‌ ك دیریمنه‌ى و بایه‌سه‌ سه‌ره‌تا گشت هساویگ ئه‌ڕاى بكه‌یم، وه‌گه‌رنه‌ هه‌قه‌یلمان مه‌حاڵه‌ وه‌ ئاسانى له‌ژیرده‌س نه‌یاره‌یلمان ده‌ركه‌یم، چوینكه‌ ئه‌ڵڵاجه‌وى ها له‌وره‌ ك حزبه‌یل و حكوومه‌ت به‌غدا بانگه‌واز ریڕه‌ویگ كه‌ن ئامانجه‌گه‌ى دیاره‌، دوینید له‌روخساره‌و دیموكراسیه‌ت و ئازادى له‌لى خوڕن و له‌ژیریشه‌و دكتاتۆریه‌ت و شۆڤێنیه‌ت تیه‌رنه‌ كار! ك یه‌یش خیانه‌ت و جیاوازیه‌ له‌ده‌ستوور و گشت ئه‌و به‌ند و بڕگه‌یلیه‌ ك هه‌ق نه‌ته‌وه‌و كه‌مینه‌یل دیارى ئه‌كا، ژیرپا خریه‌ێد و ماناى ژیانیان له‌ده‌س دریه‌ێد. وه‌ڕیه‌وبردن وه‌رپرسیاریه‌تى و سیاسه‌ت له‌گشت شوون و زه‌مانیگ زووان تایبه‌ت دیرێد، وه‌لى وه‌داخه‌و ئه‌و زووانه‌ له‌لاى سیاسه‌تمه‌داره‌یل عه‌ره‌ب هه‌ڕه‌شه‌و زه‌نگ مه‌ترسى و دروسكردن كیشه‌و گرفت و دویره‌و كه‌فتنه‌ له‌ڕاسیه‌یل. هه‌ر له‌وه‌ر ئه‌وه‌یش تویه‌نیم له‌یره‌ نموونه‌ى ئه‌و خیانه‌ته‌ ئاشكرا بكه‌یم جوور: جیوه‌جى نه‌كردن مادده‌ى(58) له‌31 كانوون یه‌كه‌م ساڵ 2007 جویر ئه‌وه‌ك له‌ ده‌ستووره‌گه‌ نویسیاو له‌لایه‌ن ملله‌ت عراقه‌و له‌تاریخ 15/10/2005 په‌سه‌ن كریا و دویاخریش ئاڵشت بوى  ئه‌را مادده‌ى 140. بیجگه‌ ئه‌وه‌یش مادده‌ى(108و109) ده‌ستوور ك تایبه‌ته‌ وه‌ یاساى نه‌فت و غاز و دیاریكردن به‌ش هه‌رێمه‌یل و مادده‌یل تر ك هیمان مشتومڕ فره‌یگ له‌بانیان كریه‌ێد.

بیگومان ئى جووره‌ سه‌رپیچیكردنیگ جویر جیوه‌جى نه‌كردن بڕگه‌و مادده‌یل ده‌ستوور له‌وه‌خت دیاریكریاگ و دویاخستنى، ماناى خیانه‌تكردنه‌ له‌زوورم مه‌ردم عراق، چوینكه‌ ئى ده‌ستووره‌ له‌بان ره‌زامه‌نى ملله‌ت دروس بویه‌و ئیسه‌یش له‌لایه‌ن وه‌رپرس و چه‌واشه‌كاره‌یل و شۆڤێنیه‌یله‌و توان له‌كه‌دار و نابوودى بكه‌ن. وه‌لى جموجویل گورج و گام ئه‌ڵگرتن زویتر ریگه‌چاره‌ى خاستریگه‌ ئه‌را كورد، چوینكه‌ وه‌خت ئه‌وه‌ نه‌مه‌ند وه‌ قسه‌و قه‌وڵ درووكانى جاریگ تر بخه‌ڵتیه‌یم و كیشه‌یلمان هه‌ر وه‌و جووره‌ بیلیمن وه‌بى چاره‌سه‌ر.

چوینكه‌ ئه‌گه‌ر ئمڕوو له‌جه‌له‌ولا و قزره‌وات هێز وه‌رانوه‌ر هێز ئاماده‌ كریا، ئه‌وه‌ سوو له‌یه‌ خراوتر له‌لى كه‌فێده‌و و شایه‌ت بنه‌و باره‌گایان زیاتر بچووده‌ ناو خاك هه‌رێم و سه‌نگه‌ر له‌لیمان بگرن و دى ئه‌و وه‌خته‌ بایه‌سه‌ فاتحاى هه‌قه‌یلمان بخوه‌نیم. ئمجا جویر ئه‌وه‌ك ئاماژه‌ وه‌پى كردیم بایه‌سه‌ ئیمه‌ وه‌رجه‌ قه‌ده‌ر ئاماده‌یى خوه‌مان وه‌ربگریم و گشت خاڵه‌یل ناكووك ناونى خوه‌مان یه‌كه‌و بخه‌یم تا وه‌هێزیگ بته‌وتر بتویه‌نیم داواى هه‌قه‌یل ره‌واى خوه‌مان بكه‌یم. ئمجا گرنگ ئه‌وه‌ نیه‌ ده‌ستوور چه‌ وتگه‌، گرنگ ئه‌وه‌سه‌ چوین بیلیم جیوه‌جى بكریه‌ێد و نه‌كه‌فێده‌ وه‌ر خیانه‌ت زیاتر و ده‌سكاریكردن كینه‌ت له‌دڵه‌یل و نه‌یاره‌یل كورد. وه‌ هه‌ر حاڵ عه‌ره‌ب عراق بایه‌سه‌ مه‌منوون خوداو ملله‌ت كورد بوون ئه‌را ئه‌و سه‌بره‌ ك وه‌پیان دریاگه‌و تائیسه‌ وه‌رگه‌ى ئه‌و هه‌مگه‌ ناحه‌قى و دویاخستنه‌ له‌ جیوه‌جیكردن ماده‌یل ده‌ستور گرتنه‌.

 

جه‌ماڵ ئه‌ركه‌وازى