شه‌فه‌ق و رووژ جه‌هانى رووژنامه‌گه‌رى

شفق نيوز

به‌شدارى ئه‌كا له‌به‌رزه‌وكردن نه‌ریت ئازادى و دیموكراسى و هه‌قه‌یل ئاده‌میزاد، هه‌ر له‌وه‌ر ئه‌وه‌یش ئاشكراكریاگ جه‌هانى ئه‌را هه‌قه‌یل ئاده‌میزاد ساڵ 1948 ئى هه‌قه‌یل سیاسیه‌ زه‌مانه‌ت كرد: هه‌ق له‌ئازادى راده‌رخستن له‌مادده‌ى(19)، هه‌ق له‌ره‌سانن له‌مادده‌ى(19)، هه‌ق له‌ ئازادى گرده‌وبوین و دامه‌زرانن كوومه‌ڵه‌یل له‌مادده‌ى(21)، هه‌ق له‌به‌شداریكردن له‌ده‌سڵات و كاره‌یل گشتى له‌ماده‌ى(21).

 

 

وه‌ل ئه‌وه‌یشا ریككه‌فتنه‌یل ناوده‌وڵه‌تى ك په‌یوه‌سه‌ وه‌هه‌قه‌یل مه‌ده‌نى و سیاسى ئاده‌میزادو كوومه‌ڵه‌ى گشتى نه‌ته‌وه‌یل یه‌كگرتگ له‌ساڵ 1996 ره‌زامه‌نى له‌بانى نیشاندا، ته‌ئكید له‌بان ئى هه‌قه‌یله‌ كردگه‌ له‌مادده‌ى شماره‌ 9 خوه‌ى، ك ئه‌ویش وه‌ى جووره‌سه‌:

1- گشت كه‌سیگ هه‌ق ئازادى ڕاده‌رخستن دیرێد.

2- گشت كه‌سیگ هه‌ق گوزارش دیرێد جوور ئازادى گه‌ردین له‌شوون زانیارى یا هویروڕاى جوراوجوور و ده‌رخستنى وه‌ئازادى یا له‌ڕى وتن یا له‌ڕى نویسانن و چاپكردن چ وه‌شیوه‌ى هونه‌رى یا هه‌ر شیوه‌یگ تر ك خوه‌ى ده‌سنیشانى بكا.

 

ئمجا له‌یرا قسه‌ له‌بان ئازادى رووژنامه‌نویسى كه‌یم جوور یه‌یكیگ له‌هووكاره‌یل گوزارش له‌بان ئازادى راده‌رخستن، ك یه‌یش له‌لایه‌ن خوه‌یه‌و یه‌كیگه‌ له‌ئازادیه‌یل گشتى وه‌ك: ئازادى گرده‌وبوین، ئازادى دامه‌زرانن كومه‌ڵه‌یل...هتد، ك په‌یوه‌سه‌ وه‌ى به‌شه‌و.

 

ئازادى گوزارشكردن و ئازادى رووژنامه‌گه‌رى له‌ڕوى فه‌لسه‌فیه‌و ئه‌یانه‌ ده‌رئه‌نجام سروشتیه‌ ئه‌را ئازادى باوه‌ڕ، ئمجا ئاده‌میزاد هه‌ق خوه‌یه‌ وه‌ ئازادى هویره‌و بكاو په‌ره‌ به‌ێده‌ ئنسانیه‌ت خوه‌ى.

 

گشتمان مه‌سه‌له‌ى هه‌وڵ به‌سانن رادیۆ شه‌فه‌ق ته‌نیا رادیۆى كوردى له‌به‌غدا زانستیم له‌وه‌ختیگ وزاره‌ت ژینگه‌ وه‌كتاویگ ره‌سمى تا ماوه‌ى ده‌ رووژ داوا له‌لى كرد نه‌مینید وه‌مه‌هانى ئه‌وه‌ك كاریگه‌رى دیرێد له‌بان ژینگه‌و ته‌ندروسى ئاده‌میزاد، دى نیه‌زانیم ئایا عراق له‌گشت پیسییگ قورتار بویه‌و ته‌نیا له‌بان رادیۆى شه‌فه‌ق مه‌ند ك ته‌نیا ژینگه‌ پیس كه‌ێد یا ئامانجیگ سیاسى له‌پشت مه‌سه‌له‌گه‌ بوى! رادیۆى شه‌فه‌ق ته‌نیا ده‌روازه‌یگه‌ ك ئه‌را مه‌ردم و لایه‌نگره‌یل و ئاشقه‌یلى واز بوى و زووان قسه‌كه‌ریانه‌ وه‌گشت راسییگ و سه‌ر وه‌هویچ ده‌سڵاتیگ نیه‌و به‌رژه‌وه‌ندى گشتى له‌وه‌رچه‌و گرێد له‌ كاره‌یلى و كارى وه‌كار كه‌سه‌و نیه‌و ئامانجیشى بازرگانیكردن نیه‌ و له‌به‌رژه‌وه‌ندى گشتى لانه‌یاگه‌و ئازاده‌و په‌یام خوه‌ى ره‌سنید وه‌بى فشار و كاریگه‌رى له‌لایه‌ن ده‌سڵاته‌و، ته‌نیا هه‌ر شه‌فه‌قیش هس وه‌ مه‌ینه‌تى هاووڵاتى ئه‌كاو هه‌وڵ ئه‌وه‌ ده‌ێد له‌گشت ڕییگه‌و ده‌نگیان بڕه‌سنید ئه‌را گشت لایه‌نه‌یل حكوومى، هه‌ر له‌وه‌ر ئه‌وه‌یش تواسن ئى ده‌نگه‌ كپه‌و بكه‌ن، ئمجا ده‌نگ شه‌فه‌ق ك وه‌هه‌ق داواى هه‌قه‌یل گشت هاووڵاتى و هه‌قه‌یل كورد فه‌یلى ئه‌كا دیاره‌ پیس بویه‌ نه‌ك ته‌وه‌ره‌گه‌ى! چوینكه‌ شاره‌زایه‌یل و دانه‌ره‌یل ته‌وه‌ر یا بورجه‌یل ئیزگه‌یى ئویشن: ته‌وه‌ره‌گه‌ هویچ كاریگه‌رییگ نه‌یرێد له‌بان ژینگه‌و ته‌ندروسى ئاده‌میزاد.

ئمجا هه‌ر وه‌ختى ئازادى راده‌رخستن و ئازادى وه‌رگرتن زانیارى و ئازادى گه‌ردین ریڕه‌و راسكانى خوه‌ى وه‌رگرت، دى ئه‌و وه‌خته‌ ئازادى ره‌سانن تیه‌ریمنه‌ ده‌س، وه‌لى ئیسه‌ ئه‌و ئازادیه‌یله‌ ڕوى له‌گرژى كردگه‌و دویرن له‌جه‌هان ئازادیه‌یل.

 

ئه‌سرا شاواز