له‌ كوردستان چه‌ گوزه‌رێد؟

شفق نيوز

وه‌ل ئه‌وه‌يشا جووريگ له‌ ركابه‌ری ديموكراسيانه‌ی لايه‌نه‌يل سياسيی و گووشگرتن له‌ دانيشتنه‌يل بان مێز گفتگوو وجوود ديرن و گشت ئه‌يانه‌يش هه‌رچه‌نی كه‌م وكوڕی له‌تی بوود و هه‌رچه‌نی گام و هه‌ڵويست وه‌رپرسه‌يل و سياسه‌تمه‌داره‌يل وه‌ل ئه‌زره‌ت و ئوميده‌يل ملله‌ته‌گه‌مان گونجياگ نه‌ون، وه‌لی پيشكه‌فتن و ئاڵشتكاری سه‌رجه‌م كوومه‌ڵگا هس وه‌پی ئه‌كريه‌يد.

له‌لايگ تريشه‌و هه‌رچه‌نی ده‌سڵات حزبه‌يل و ميديايه‌يل سای ئه‌و حزبه‌يله‌ بته‌و بوود، وه‌لی پرووسه‌ی به‌دڕه‌فتاركردن و شووردن مه‌ژگ هاووڵاتی وه‌ هويچ شيوه‌يگ ئه‌وه‌نه‌ فراوان نيه‌و نه‌ڕه‌سيه‌سه‌ ئاست تونڕه‌وی، ئمجا هه‌رچه‌نی تونڕه‌وی ئايينی بوود يا تونڕه‌وی ئه‌را ئايدۆلۆجيه‌تيگ و لايه‌نيگ دياريكرياگ، وه‌لی نه‌ڕه‌سه‌سيه‌ ئه‌و راده‌ ك ئاماژه‌ وه‌پی كرديم.

يه‌كيگ له‌ خاڵه‌يل بته‌و ژيان كوومه‌ڵايه‌تی كورده‌واريمان پيكهاتگه‌ له‌و ژيان مۆدێرنه‌ ك له‌ هه‌رێم كوردستان وه‌رجه‌سه‌ ئه‌كريه‌يد وه‌بی ئه‌وه‌ك ديارده‌يگ ئايينی كۆنترۆڵ ژيانی كوومه‌ڵگا بكا، ك هه‌رچه‌نی به‌شيگ دياريكرياگ كوومه‌ڵگای كوردی پابه‌ندن وه‌ ئايينه‌يل جياواز خوه‌يانه‌و.

كورد ئيسه‌ له‌ی وه‌خته‌يله‌ ها له‌وه‌رده‌م گاميگ دياريكردن ماف چاره‌نويس و بنياتناين ده‌وڵه‌تيگ سه‌روه‌خوه‌يی، بيگومان ئی پرووسه‌يشه‌ دوير و دريژه‌و روی وه‌ڕوی چه‌ن كيشه‌يگمان ئه‌كاد، وه‌لی له‌ی وه‌خته‌يله‌ ئه‌گه‌ر ئی پرووسه‌ سه‌ربگريد يا سه‌رنه‌گريد، ئه‌وه‌ راسييگ هه‌س ك ئه‌ويش ئه‌وه‌سه‌ ملله‌ت كورد بويه‌سه‌ خاوه‌ن كلتووريگ و كه‌سايه‌تی خوه‌ی بنيات ناگه‌.

كوومه‌ڵگا خاوه‌ن سفه‌تيگ تايبه‌ت خوه‌يه‌، ك فريه‌ دويره‌و فريه‌يش جياوازه‌ له‌وه‌ك له‌ به‌شه‌يل تر عراق هه‌ن. وه‌ل ئه‌وه‌يشا تاك كورديش خاوه‌ن كه‌سايه‌تی و متمانه‌ی تايبه‌ت وه‌ خوه‌يه‌، ك گشت ئه‌يانه‌ هووكارن ئه‌را ئه‌وه‌ك ئه‌و دو به‌ش جياواز عراقه‌ خاڵيگ هاوبه‌ش گرديانه‌و نه‌كا.

خاڵه‌يل جياوازيش پيكهاتنه‌ له‌ راده‌و شيواز وه‌ڕيه‌وبردن ژيان كوومه‌ڵايه‌تی و ئايينی و رووشنهويری و سياسی، وه‌ يه‌يش ملله‌ت كورد وه‌رجه‌ ئه‌وه‌ك ده‌وڵه‌تيگ سه‌روه‌خوه‌ی بنيات بنه‌يد، كلتووريگ سه‌روه‌خوه‌ی بنيات ناگه‌.

كامه‌ران چروستانی

ج . أ