شمشیر له‌ژیر هه‌ق شكیه‌یگ

شفق نيوز

سه‌رپیچیكردنیگ له‌لى مایه‌ى مه‌ترسى و تاوان گه‌ورایگه‌، ك ته‌نیا له‌ى وڵات قه‌زاو قه‌ده‌ر ئیمه‌ نه‌وگ ك ناوى عراقه‌، چوینكه‌ ده‌سڵات له‌بانى زاڵه‌و گشت بڕیاریگى خسته‌سه‌ ژیر كۆنترۆڵ و ڕه‌فتار خوه‌ى و تونڕه‌وانه‌ مامڵه‌ وه‌ل ئى ده‌زگاى ئنسانیه‌ ئه‌كا له‌ژیر ناونیشان(ده‌زگاى سه‌روه‌خوه‌ى)ك مه‌به‌س له‌لى ده‌زگاى باڵاى تاوانه‌یله‌.

جویر ئه‌وه‌ك ئاشكراسه‌و گشتمان زانیم، دادگاى باڵاى تاوانه‌یل له‌باوه‌ت كیشه‌ى كورده‌یل فه‌یلى ئه‌رك خوه‌ى وه‌شیوه‌یگ ئنسانیانه‌ ئه‌نجامداو په‌رده‌ له‌بان ئه‌و راسیه‌ لاورد ك وه‌خته‌یل فره‌یگه‌ كه‌فتویگه‌ ژیر چه‌وه‌ڕیكردن به‌زه‌یى بڕیاریگ  له‌چوارچیوه‌ى وژدان و هه‌ق چینیگ  زوڵملیكریاگ بوى ك وه‌ دریژایى ده‌یه‌ها ساڵ ژیرپا كریا له‌لایه‌ن حكوومه‌ته‌یل كویه‌ن و تازه‌ى عراقه‌وه‌، وه‌لى جى داخه‌ ك ته‌نیا خوه‌شییگ خریا دڵ روڵه‌یل ئى چینه‌ ته‌نیا ڕووژ ده‌رچگن بڕیاره‌گه‌ى دادگاى باڵاى تاوانه‌یل بوى له‌ 29 / 11 / 2010 ك وه‌له‌ناوبردن وه‌جه‌م(جینۆساید) گشت ئه‌و تاوان و كاره‌ساته‌یله‌ ده‌رهه‌ق كورده‌یل فه‌یلى كریا داره‌ى قه‌ڵه‌م، دى وه‌ داخ فره‌یگه‌وه‌ له‌و ڕووژه‌وه‌ تاڕووژ ئمڕوو ئه‌و بڕیاره‌ وه‌هویچ جووریگ نه‌كه‌فته‌ خانه‌ى جى وه‌جیكردن و هویچ هه‌قیگ ناته‌سه‌وه‌ ئه‌را خاوه‌نى.

كورده‌یل فه‌یلى چوینكه‌ خه‌ڵك ره‌سه‌ن ئى وڵاته‌نه‌و له‌هه‌مان وه‌خت تاریخ دویرو دریژیگ دیرن له‌ ڕه‌سه‌نایه‌تى و پیكهاته‌یگن بنه‌ڕه‌تى له‌ كومه‌ڵگاى عراقى و قوربانى فره‌یگ له‌ماڵ و حاڵ دانه‌و به‌شدار بوینه‌ له‌جموجویل ئازادیخواز ملله‌ته‌یل چه‌وسیاگ ژیر ده‌سڵات دكتاتۆریه‌ت، ماناى ئه‌وه‌سه‌ هویچ هیزیگ له‌ىدونیا نیه‌تویه‌نیگ ئنكار هه‌قه‌یلیان بكاو له‌هه‌مان وه‌خت خود كورده‌یل فه‌یلییش هویچ وه‌ختیگ واز له‌هه‌قه‌یلیان ڕه‌واى خوه‌یان نیارن و ده‌ریایگ له‌خوین رشاننه‌ له‌وه‌ر خاتر ئى خاك باوگ و باپیره‌یلیانه‌ ك ئیسه‌ شۆڤێنیه‌یل توان خوه‌یان بكه‌ن خاوه‌ن راسه‌قینه‌ى، وه‌ل ئه‌وه‌یشا په‌ندیگ كورده‌وارى خوه‌مان هه‌س ئویشیگ ( شمشیر له‌ژیر هه‌ق شكیه‌یگ )، هه‌قیش وه‌هه‌ر جووریگ بووگ هه‌ر ده‌ركه‌فیگ . دى خاستر ئه‌وه‌سه‌ لایه‌ن په‌یوه‌ندیدار له‌ ده‌سڵات خه‌مسه‌رد نه‌وگ له‌كاره‌گه‌و ئه‌رك خوه‌ى وه‌ ڕوى چه‌رمگه‌وه‌ باریگه‌ جى له‌وه‌ر خاتر شاده‌وكردن دڵ خیزانه‌یل كورد فه‌یلى و گشت خه‌یرومه‌نه‌یل ئى وڵاته‌و كیشه‌ى كورده‌یل فه‌یلى پشتگووش نه‌خه‌ن و چین گرنگ یاموهمیگ له‌ى نیشتمانه‌ دڵگران نه‌كه‌ن ك وه‌ڕاسى مایه‌ى شه‌رمه‌زاریه‌ ئى هه‌مگه‌ وه‌خته‌ له‌ده‌س دریاو حكوومه‌ت عراقى خوه‌ى گیل كرد له‌مه‌سه‌له‌گه‌.

وه‌باوه‌ڕ گشت كه‌سیگ ، دى نه‌مه‌ندن ئه‌وڕووژگاره‌ ك چه‌وسیان و كوشتن و بڕین جاریگتر بایگه‌وه‌و ملله‌ت له‌لى بیده‌نگ بوون، یا كه‌سیگ  یا لایه‌نیگ وه‌ته‌نیاو ته‌كڕه‌وانه‌ خوه‌ى وه‌خاوه‌ن ماڵ بزانیگ و مه‌ردمان تر وه‌ بیگانه‌، نه‌خه‌یر ئه‌و رووژگاره‌ وه‌سه‌ر چى ك هه‌ق وناهه‌ق له‌یه‌كه‌و نه‌دریا، ته‌ڕ و وشك وه‌یه‌كه‌وه‌ سزیا، ئیسه‌ سه‌رده‌م دیموكراسى و ئازادیه‌، سه‌رده‌م داواكردن هه‌قه‌یله‌، بایه‌سه‌ ئیسه‌ودویا له‌ى عراقه‌ قه‌در ئه‌را خواست ئاده‌میزاد دابنریه‌یگ ، هویچ راسییگ فه‌رامووش نه‌كریه‌یگ ، ئه‌و قوربانى و ده‌ریاى خوینیشه‌ ك كه‌فته‌وه‌ر ڕوڵه‌یل كورد فه‌یلى بنیات هه‌ق وه‌پى نریه‌یگ و گشت هه‌قیگ وه‌پى ڕه‌واس.

 

جه‌ماڵ ئه‌ركه‌وازى