ته‌ممووز..مانگ كوده‌تايه‌يل وپاكسازى خويناوى له‌ عراق!

شفق نيوز

له‌ڕووژيگ جوور ئمڕوو له‌ ساڵ 1968 حزب به‌عس ئه‌را جار دويه‌م ره‌سيه‌ ده‌سه‌ڵات، ئه‌ويش له‌وه‌ختيگ هاوپه‌يمانێتى ئه‌نجامدان وه‌ل ئبراهيم ئه‌لداوود فه‌رمانده‌ى كه‌تيبه‌ى ده‌بابه‌يل له‌ ماڵ كۆمارى و عه‌بدولڕه‌زاق ئه‌لنايف ده‌سميه‌تده‌ر وه‌ڕيه‌وبه‌ر ده‌زگاى هه‌واڵگرى سه‌ربازى.

هه‌ر وه‌و خاتريشه‌ حزب به‌عس وه‌ ده‌سخوه‌شيكردن له‌ ده‌زگايه‌يل هه‌واڵگرى جه‌هانيه‌و تويه‌نست عه‌بدولڕه‌حمان عارف سه‌رۆك كووچكردگ له‌ بان ته‌خت ده‌سڵات لاوه‌يد.

ئه‌وه‌ بوى ك حزب به‌عس نه‌ف له‌ غه‌ڵه‌ته‌يل كوده‌تا يه‌كه‌مه‌گه‌ى له‌ شوبات 1963 وه‌رگرت و ئيجاره‌ وه‌گشت هيزيگه‌و ده‌سه‌ڵات گرته‌ ده‌س و هه‌ر له‌ رووژه‌يل يه‌كه‌م كوده‌تا ده‌سكرده‌ له‌سێداره‌داين بڕيگ له‌ يه‌هووديه‌يل له‌ مه‌يدان ته‌حرير له‌ به‌غدا له‌وه‌رچه‌و مه‌ردم.

وه‌ل ئه‌وه‌يشا ده‌سكرده‌ پاكسازيكردن دوشمنه‌يلى وه‌ شيوازه‌يليگ دڕندانه‌و هه‌ر له‌وه‌ر ئه‌وه‌يش نازم گزار تاوانبار و "جه‌لاد قه‌سر نهايه‌" ئه‌و ئه‌ركه‌يل له‌سێداره‌داينه‌ وه‌ ته‌مامى ئه‌نجامدا.

حزب به‌عس عراق خسته‌ ناو جه‌نگه‌يل پڕ كاره‌سات وه‌ مه‌هانه‌ى جوراوجوور و له‌وانه‌يش: دژايه‌تى ئمپرياليست و داگيركار و سه‌هيۆنيزم هه‌ر له‌ جه‌نگ ئيران بگر تا ڕه‌سيه‌ جه‌نگ كه‌نداو، بيگومان ئه‌و جه‌نگه‌يليشه‌ هووكار بوين ئه‌را كاولكردن ئابوورى و له‌ناوبردن ژيرخان ئابوورى وڵاته‌گه‌ و بردنى وه‌ره‌و ئى حاڵه‌ته‌ ك ئمڕوو عراق وه‌پيه‌و ناڵنێد.

فاخر ده‌لۆ