دويه‌ته‌د وه‌ چه‌ن ده‌ێده‌ شوی؟

شفق نيوز

 

بيگومان ئی ديارده‌يله‌ تا ئيسه‌يش هه‌ر په‌يڕه‌و ئه‌كريه‌يد و لايه‌ن ئنسانی و خوه‌شه‌ويسی راسكانی له‌ی جووره‌ هاوسه‌رگيريه‌ داسه‌ شه‌قه‌ی باڵ و په‌ڕ و پوو جوانی و پيرووزيه‌گه‌ی كه‌فته‌سه‌ وه‌ر لافاو ليخن كووره‌گڵاڵان و گيژاو گوڵه‌مه‌يل.

خيزان فاميده‌و دونياديده‌ ها له‌هه‌وڵ په‌ياكردن ژيان ئارام و ئاشنايه‌تی و دامه‌زرانن په‌يوه‌ندييگ ئاقبه‌ت خه‌ير، خيزان دونيادووس و ماڵپه‌رس هه‌ميشه‌ هانه‌ هوير ئه‌نجامداين كرده‌وه‌يل ناپوخت و ناڕه‌وا، وه‌لی ته‌نيا هووكاريگ ئه‌را سه‌ركه‌فتن پرووژه‌ی هاوسه‌رگيری پيكهاتگه‌ له‌ نيازپاكی و له‌وه‌رچه‌وگرتن ره‌وشت كه‌س وه‌رانوه‌ر.

دی هه‌ر وه‌و خاتريشه‌ دوينيد كه‌سه‌يليگ ته‌ماكار هه‌ن ئه‌وه‌نه‌ هانه‌ هووڵ نزيكه‌وبوين له‌ بنه‌ماڵه‌ی ده‌وڵه‌مه‌ن ئه‌وه‌نه‌ گووش وه‌ روخسار و ره‌وشت و هه‌ڵسووكه‌فت دويه‌ته‌گه يا كوڕه‌گه‌‌ نايه‌ن و گرينگ نيه‌ له‌لايان ئه‌و دويه‌ته‌ يا ئه‌و كوڕه‌ ره‌فتار و هه‌ڵسووكه‌فتی چوينه‌، به‌ڵكوو ته‌نيا چشتيگ ك هوير له‌لی ئه‌كه‌ن ئه‌وه‌سه‌ ك بڕه‌سه‌نه‌ مه‌رام و ده‌سيان گير بكا له‌ ماڵ مه‌ردم!

ئمڕوو له‌ كوومه‌ڵگا ديارده‌يگ تر سه‌رهه‌ڵداگه‌و يه‌يش كرده‌وه‌يگ تر ناپه‌سه‌ن مه‌ردمانيگ پويلپه‌رس و دويه‌ت فرووشه‌ ك ئه‌را خاتر پويل دويه‌ته‌يليان نمايش ئه‌كه‌ن وه‌ بڕه‌ پويليگ دياريكرياگ و ناوی نه‌ن شيروايی و پشتئه‌غد، ئه‌را نموونه‌: ئيسه‌ خيزانه‌يليگ هه‌ن خاوه‌ن دويه‌ته‌يل جوانيگن و هانه‌ عومر هاوسه‌رگيری، وه‌لی دوينيد باوگ وداڵگ دويه‌ته‌گه‌ نرخ فريه‌يگ دانه‌ن ئه‌را هه‌ركه‌سيگ خوازيار خوازين دويه‌ته‌يان بوود و جوور كاڵايگ بازاڕی نمايشی ئه‌كه‌ن و ئاماده‌ن هه‌ر كه‌سيگ ئه‌و بڕه‌ پويل درياريكرياگه‌ ته‌سليميان بكا دويته‌يان به‌نه‌پی و ئويشنيش هه‌ركه‌سيگ ئه‌وه‌نه‌ پويل ناريد نايده‌ داوا!! دی گرينگ نيه‌ له‌لايان ئه‌و داواكه‌ره‌ خيش بوود يا بيگانه‌، خوداپه‌رس بوود يا ملهوڕ، دڕنده‌ بوود يا سته‌مكار، جوان بوود يا ناشرين، رووشنهوير بوود يا نارووشنهوير، دز بوود يا پياوكوش، بويچگ بوود له‌ عومر يا گه‌ورا، گرينگ ئه‌وه‌سه‌ وه‌و نرخه‌ ك خوه‌يان خوازنه‌ی بفرووشنه‌ی، دی گووش وه‌ ئه‌وه‌ نايه‌ن سوو دسوو ئی دويه‌ته‌ بكه‌فێده‌ وه‌ر تير وتانه‌ی ماڵه‌ خه‌سويره‌و هويچ قه‌در و حورمه‌تيگی نه‌گرن، ك يه‌يش بويه‌ به‌زم تازه‌ی دويه‌ت وه‌ شويداين‌ و شايه‌ت رووژيگيش باێد ژنه‌يل پرسيار له‌ يه‌كتری بكه‌ن دويه‌ته‌د وه‌ چه‌ن دێده‌ شوی؟ يه‌يش جوور حاڵه‌ت تازه‌يگ له‌ مه‌سه‌له‌ی ژن و ژنخوازین له‌ناو كوومه‌ڵگا سه‌رهه‌ڵدا.

ره‌نجده‌ر ئاواره‌