رێكخستنه‌وه‌ێ‌ په‌یوه‌ندیه‌يل مللی

شفق نيوز

وه‌يخاتره‌ له‌سه‌رده‌م‌ رژيمه‌يل دڕنده‌ی‌ عێراق هه‌میشه‌ هاوسووزی‌ و هه‌ستێگ‌ یه‌كه‌وگردن‌ وه‌ل عه‌ره‌ب‌ شیعه‌ وجود داشت .چوينكه‌ هه‌ردولا چه‌وسياێ‌ ده‌س‌ یه‌ك رژيم بوين. ئيمه‌ وه‌خاتر‌ جیاوازی‌ نه‌ته‌وه‌يی‌، يانێ‌ كورد بوينمان و ئه‌وان وه‌خاتر جیاوازی‌ مه‌زهه‌بیيان. له‌شوون‌ رميان‌ رژيم‌ به‌عس له‌ ساڵ‌ 2003 و هاتنه‌ نواێ‌ شیعه‌ و له‌ده‌سداين‌ ده‌سه‌ڵات له‌لایه‌ن عه‌ره‌ب‌ سوننه‌وه‌. خه‌ریكه‌ وه‌خاتر‌ به‌شێگ له‌ سیاسیه‌يل و كه‌سانێگ‌ نا وه‌رپرس له‌ میدیا جوورێگ له‌ یه‌ك دويره‌وكه‌فتن و ته‌نانه‌ت چيينه‌ دوخ دوشمنایه‌تی‌ له‌ ناونی كورد و عه‌ره‌ب‌ شیعه‌ دروست بوود.

يه‌ێش ره‌وش فره‌ خراوێگه‌. له‌ وه‌ختێگ عه‌ره‌ب‌ سوننه‌يش نه‌وينه‌سه‌ به‌شێگ له‌ دووسه‌يل‌ كورد, چوينكه‌ ‌تا ئی چركه‌ ساتيشه‌ عه‌ره‌ب‌ سوننه‌ ك‌ خوه‌یان له‌ داعش و به‌عسیه‌يل دویننه‌و‌, دوشمن‌ سه‌رسه‌خت‌ كوردن. يه‌يش‌ له‌ وه‌ختێگه‌ ك ئيمه‌ وه‌سه‌دان عه‌ره‌ب له‌كوردستان په‌نا دايمنه‌‌.

وه‌لێ هويچ سودێگ‌ دیبلۆماسی‌ مللی‌ و سیاسی له‌لێان‌ نه‌یمنه‌. وه‌يخاتره‌ ئيسه‌ ك وه‌ل شیعه‌ یه‌ك دوشمن‌ هاوبه‌ش ديريمن, هه‌قه‌ سه‌ركردایه‌تی‌ سیاسی‌ كورد و مه‌ردمان‌ تر له‌ رووشنهویره‌يل و پیاوه‌یل‌ ئاینی‌ و عه‌شایر و كه‌ناڵه‌یل‌ میدیا بكه‌فنه‌ خوه‌يان ئه‌را ئاسایی‌ كردنه‌وه‌ێ‌ ئی په‌وه‌ندی مللیه. چوينكه‌ ئيسه‌ بارودوخه‌گه‌ له‌ باره‌و هویچ قازانجێگيش‌ له‌تێ نيیه‌، ئيمه‌ ئی كه‌لينه‌ وه‌ل عه‌ره‌ب‌ شیعه‌ێ‌ عێراق لێوا گه‌وراوه‌‌ بكه‌يم.

وه‌يخاتره‌ دیبلۆماسیه‌ت‌ مللی‌ كوردی‌ بايه‌سه‌ ئيسه‌ فره‌ بكه‌فێده‌ خوه‌ێ‌ له‌ رێ‌ مه‌رجه‌عه‌‌گانه‌و‌ رێ نه‌دريه‌ێد سیاسیه‌یل‌ شیعه‌ وێنه‌ێ‌ كورد له‌ شه‌قام‌ خوه‌یان ناشرين نیشان بيه‌ن. هه‌میشه‌ كێشه‌ێ‌ سیاسی‌ ناونی كه‌سایه‌تیه‌يل و حزبه‌يل سیاسی ماوه‌ێگه‌‌ و شایسته‌ێ‌ خاسه‌وبوين و وه‌لاوه‌ناينه‌.

وه‌لێ هه‌روه‌ختێگ دوشمنداری‌ كه‌فته‌ ناونی دو ملله‌ت له‌سه‌ر هه‌ر جیاوازیيگ بووج، لێوا وه‌ئاسانی‌ كووتایی وه‌پێ‌ نیه‌تيه‌ێد و وێنه‌یان له‌لاێ‌ یه‌كتری ئاساییه‌و‌ نيه‌ود‌. جوور ئه‌وه‌گ‌ له‌ ناوبه‌ێن جويله‌كه‌ و عه‌ره‌ب هه‌س. ئيسه‌ له‌ ناونی شیعه‌ و سوننه‌ هه‌س. وه‌يخاتره‌‌ كورد بايه‌سه‌‌ هه‌ستیاربوود و نه‌يليمن وێنه‌ێ‌ كورد جوور ملله‌ت له‌ لایه‌ن هویچ ملله‌تێگ‌ تر ناشرين بوود.

له‌ی ديدگاوه‌‌ كورد هه‌وه‌جه‌‌ وه‌ دواره‌ رێكخستنه‌وه‌ێ په‌یوه‌ندیه‌يل مللی خوه‌ێ دێرێ. وه‌تایبه‌ت وه‌ل عه‌ره‌ب شیعه‌ێ‌ عێراق. كاره‌گه‌يش فره‌ سه‌خت نيیه‌, ئه‌گه‌ر نیه‌ت ئه‌ڕا خاسه‌وكردنێ بوود‌.

شادمان مه‌لا حه‌سه‌ن