مه‌ردم مه‌نه‌لى داواكه‌ن شاره‌گه‌یان بایده‌و ئه‌را باوه‌ش هه‌رێم كوردستان

شفق نيوز

قه‌زاى مه‌نه‌لى هه‌ڵوه‌شان و كرده‌ى ناحیه‌یگ سه‌ر وه‌ به‌له‌درووز ك ناحیه‌یگ بوى سه‌ر وه‌ قه‌زاى مه‌نه‌لى،  ئمڕوو په‌نجشه‌ممه‌ 14/4/ 2011 ،داموده‌زگایه‌یل حكوومى و حزبى و ڕیكخریایه‌یل جه‌ماوه‌رى و جه‌ماوه‌ریگ فره‌ى شار مه‌نه‌لى، له‌ گرده‌وبوین جه‌ماوه‌رى گه‌ورایگ له‌ سه‌نته‌ر شاره‌گه‌ جه‌مه‌و بوین و رابیته‌یگ وه‌ناو ((رابیته‌ى خه‌ڵك مه‌نه‌لى)) دامه‌زرانن ك پیهاتیه‌ له‌ نوێنه‌ره‌یل ڕیكخریایه‌یل كوومه‌ڵگاى شارسانى و پارته‌یل كوردستانى و كه‌سایه‌تیه‌یل ناودار و به‌ڕێوه‌به‌رایه‌تى شاره‌وانى ناحیه‌گه‌ و پیاوماقووڵه‌یل ناو و ده‌یشت مه‌نه‌لى و به‌یاننامه‌یگ وه‌ناو رابیته‌گه‌ وه‌ى بوونه‌ ده‌ركردن له‌تى داواكردن ك شاره‌گه‌یان دوباره‌ بایده‌و ئه‌را باوه‌ش گه‌رم هه‌رێم كوردستان.

سه‌رۆك ئه‌نجوومه‌ن شاره‌وانى مه‌نه‌لى ئازاد حه‌مید شه‌فى له‌ قسه‌یلى ئه‌را شه‌فه‌ق له‌ى باوه‌ته‌ وت:" له‌ به‌یاننامه‌ى كووتایى رابیته‌گه‌ په‌نج خاڵ سه‌ره‌كى هاتیه‌، یه‌كم ئه‌وه‌سه‌ ك مه‌نه‌لى دوباره‌ بكریه‌یده‌ قه‌زا و بڕیاره‌ه‌گه‌ى سه‌رۆكایه‌تى كۆمار وه‌رین هه‌ڵوه‌شیه‌یده‌وه‌ و دویم : قه‌ره‌بووكردن مه‌ردم مه‌نه‌لى جوور ئه‌وباقى كووچوه‌پیكریایه‌یل عیراق وه‌ بڕیاریگ حكوومى، و سێیم: ته‌رخانكردن بودجه‌ى تایبه‌تیگ له‌ حكوومه‌ت فیدرالى عیراق و حكوومه‌ت هه‌رێم كوردستان ئه‌را دوباره‌ ئاوه‌دانكردن مه‌نه‌لى، چوارم: وازكردن ده‌روازه‌ى سنوورى  و په‌نجمیش: هه‌ڵوه‌شانن گشت بڕیاره‌یل زاڵمانه‌ى ڕژیم دژ وه‌ مه‌ردم مه‌نه‌لى جوور بڕیار شماره‌ 617 ك تایبه‌ته‌ وه‌ ده‌سناین وه‌بان زه‌ویه‌یل هووزه‌یل كورد و نویساننى وه‌ناو وه‌زاره‌ت دارایى". و زیاتریش وت ك رابیته‌گه‌ كه‌فیده‌ شوون جیوه‌جیكردن بڕگه‌یل ئى به‌یاننامه‌.

سه‌رۆك رابیته‌ى مه‌ردم مه‌نه‌لى زوهێر نه‌ورووز له‌ قسه‌یلى ئه‌را شه‌فه‌ق وت:"مه‌ردم مه‌نه‌لى، سه‌رۆكایه‌تى و ئه‌ندامه‌یل ئه‌نجوومه‌ن پارێزگاى دیاله‌ مكیس كردن له‌ى گرده‌وبوین جه‌ماوه‌ریه‌ ئاماده‌ بوون ئه‌را دامه‌زرانن ئى رابیته‌ وه‌لى ئه‌وان نه‌هاتن", و وتیش:"ئه‌نجوومه‌ن پارێزگا وه‌ نوێنه‌ر مه‌ردم دیاله‌ دریه‌نه‌ قه‌ڵه‌م، وه‌لى ته‌نیا سه‌عاتیگیش ته‌رخان نه‌كردن ئه‌را ئه‌وه‌گ بان ئه‌را ئى گرده‌وبوینه‌، و ئیمه‌ نیه‌زانیم ئى كرده‌وه‌ چوین شیه‌و بكه‌یمن؟".

زیاتریش وت:"رابیته‌گه‌ داوا له‌ ئه‌نجوومه‌ن پارێزگاى دیاله‌ كه‌ید بایه‌خ بیه‌یده‌ پرۆژه‌یل ئاودێرى چوینكه‌ ئى جووره‌ پرۆژه‌یلیگ هه‌ر وجوود نه‌یرى له‌ مه‌نه‌لى و ئاویش فه‌ره‌ كه‌مه‌ و یه‌یشه‌ بویه‌سه‌ مایه‌ى كووچكردن مه‌ردمه‌گه‌ى". و له‌بان ئه‌وه‌یشه‌ جه‌ختكرد ك:"مه‌نه‌لى به‌شیگه‌ له‌ ناوچه‌یل داوڕیاى له‌ كوردستان، له‌وه‌ر ئه‌وه‌ داواى جیوه‌جیكردن مادده‌ى 140 ده‌ستوور كه‌یمن".

په‌له‌مانتار وه‌رین نازه‌نین مه‌نده‌لاوى ك له‌ گرده‌و بوینه‌گه‌ ئاماده‌ بوى؛ له‌ قسه‌یلى ئه‌را شه‌فه‌ق وت:"ئه‌وه‌زكردن مه‌نه‌لى له‌ قه‌زایگ ئه‌را ناحیه‌یگ وه‌توندى وه‌حكووم كه‌یمن و وه‌ناو جه‌ماوه‌ر مه‌نه‌لى داواكه‌یمن بڕیاره‌یل ئه‌نجوومه‌ن سه‌ركردایه‌تى شووڕش هه‌ڵوه‌شیاى هه‌ڵگریه‌ن، و كار ئه‌را ئه‌وه‌ بكریه‌ید ك خزمه‌تگوزارى ئه‌را مه‌ردم مه‌نه‌لى پیشكه‌ش بكریه‌ید و پرۆژه‌یل بیناسازى و ئاوه‌دانكردن له‌تى به‌رپا بكریه‌ید".

نازه‌نین مه‌نده‌لاوى له‌بان ئه‌وه‌یشه‌ جه‌ختكرد:"ماده‌ى 140 ده‌ستوور چشت فره‌گرنگیگه‌ ك بایه‌ته‌ حكوومه‌ت عیراق فیدرالى و حكوومه‌ت هه‌رێم كوردستان هه‌ڵه‌په‌ڵه‌بكه‌ن له‌ جیوه‌جیكردنى ئى ماده‌، تا شار مه‌نه‌لى دوباره‌ بایده‌و ئه‌را باوه‌ش هه‌رێم كوردستان چوینكه‌ هویچ گومانیگ نه‌یرى ك شاریگ كوردستانیه‌".

 

راپۆرت / ماجد سوره‌مێرى