نیشانه‌ى وازكردن قونسلیه‌ى توركى له‌ هه‌ولێر چه‌س؟

شفق نيوز

قونسلیه‌و سه‌فاره‌تخانه‌یله‌ له‌ ده‌وڵه‌ته‌یل تر، تا بووگه‌ نوێنه‌ر دبلۆماسى ئه‌ڕاى له‌ ده‌وڵه‌تیگ بیگانه‌ له‌وه‌ر خاتر ئاسانه‌وكردن هه‌وه‌جه‌یل هاووڵاتیه‌یلى و لاوردن بڕیگ سه‌ختى و سوكه‌وكردن كاروبار هاووڵاتى.

توركیایش كار خاسیگ كرد وه‌ وازكردن قونسلیه‌ى خوه‌ى له‌هه‌ولێر پایته‌خت هه‌رێم كوردستان و یه‌یش گام خاس و جوانیگه‌و له‌هه‌مان وه‌خت بازداین سه‌ركه‌فتگیگه‌ وه‌ره‌و په‌یوه‌ندى ناونى هه‌رێم كوردستان و توركیا. یه‌یش بیجگه‌ ئه‌وه‌ك گام خاسیگه‌ ئه‌را بته‌وكردن په‌یوه‌ندى و مه‌سه‌له‌ى ستراتیجى ناونى هه‌رێم و توركیا ك وه‌قانجاز ئابوورى و بازرگانى هه‌ردوگلا شكیه‌یگه‌وه‌و بووگه‌ مایه‌ى ڕیگه‌داین وه‌ كومپانیایه‌یل توركى ئه‌را ئه‌وه‌ك بانه‌ ناو بازاڕ عراقى و هه‌رێم و دویاخریش سه‌رمایه‌گوزارى هاوبه‌ش له‌لى دروس بووگ وه‌ل هه‌ردوگ كه‌رت یا قه‌تاع تایبه‌ت و گشتى عراقى و هه‌رێم. وجوود ئى قونسڵیه‌ له‌ هه‌ولێر له‌لایگه‌وه‌ هاوكاریگه‌ ئه‌را چاره‌سه‌ر گرفته‌یل فره‌یگ له‌وه‌رده‌م سه‌رمایه‌گوزاره‌یل له‌هه‌رێم و عراق و له‌لایگ تریشه‌وه‌  هه‌ر وه‌ل وازكردن قونسلیه‌ى توركى ئه‌وه‌ بوى بانك ناوده‌وڵه‌تى توركییش له‌ هه‌رێم واز بوى جویر ئه‌وه‌ك ئه‌ردوغان ئشاره‌ت وه‌پیكرد له‌وه‌خت وازكردن باڵه‌خانه‌ى سه‌فاره‌تخانه‌گه‌و وت: ئى ڕووژه‌ ڕووژ تاریخییگه‌ ئه‌را عراق وه‌گشت پیكهاته‌یلیه‌وه‌. بیگومان وازكردن ئى سه‌فاره‌تخانه‌ بووگه‌ كلیل خه‌یریگ ئه‌را هه‌ردوگلاو بیجگه‌ ئه‌وه‌یش ئه‌ردوغان باس له‌وه‌یش كرد ك گوایا فكره‌یگ له‌یوا هه‌س ناونى عراق و توركیا ڤیزه‌ نه‌توایگ  له‌ئاینده‌و كار له‌بان جى وه‌جیكردنى كه‌یم، وه‌ل ئه‌وه‌یشا ئشاره‌ت وه‌ ئه‌وه‌یش كرد ك مه‌سه‌له‌ى ئابوورى له‌ناونى توركیاو هه‌رێم زیاتر په‌ره‌ سینیگ ، وه‌تایبه‌ت كلكردن نه‌فت ئه‌را توركیا مه‌سه‌له‌ى گرنگ یا موهمیگه‌ له‌ڕى هه‌رێم كوردستانه‌وه‌، هه‌ر له‌وه‌ر ئه‌ویش هه‌ردوگلا گه‌شه‌كردن خاسیگ وه‌خوه‌یانه‌وه‌ دوینن له‌ بته‌وكردن په‌یوه‌ندى و متمانه‌ى برایه‌تى، ئنجا وه‌و بوونه‌وه‌ سه‌رۆك قه‌واره‌یل په‌رله‌مانى ك ئاماده‌یى خوه‌یان نیشاندان له‌ڕى وڕه‌سم وازكردن قونسڵخانه‌گه‌ داوا له‌ توركیا كردن سه‌رچه‌وه‌ى ئاوه‌یل عراق زیاتر واز بكه‌ن ئه‌را په‌ره‌داین زیاتر وه‌ كار كشتوكاڵى له‌عراق، بیجگه‌ ئه‌وه‌یش ئه‌ردوغان واده‌ى ئه‌وه‌یشدا مه‌سه‌له‌ى كورد له‌ توركیا چاره‌سه‌ر بكا.

بیگومان جویر ئه‌وه‌ك دیاردا، وازكردن قونسڵیه‌ى توركى ریككه‌فت بوى وه‌ل وازكردن ته‌یاره‌خانه‌ى هه‌ولێر ناوده‌وڵه‌تیا، بیجگه‌ ئه‌وه‌یش وازبوین قونسڵیه‌گه‌ رویداگیگ تاریخى و گرنگ  بوى و له‌ هه‌مان وه‌خت سه‌ردان سه‌رۆك وه‌زیره‌یل توركى سه‌ردانیگ گرنگ بوى و ده‌نگه‌ودا له‌جه‌هان و سه‌رۆك مه‌سعود بارزانى وه‌ سه‌ردانیگ بویرانه‌و ئازایانه‌و گام خاسیگ تاریفى كرد ئه‌را بته‌وكردن په‌یوه‌ندى له‌ناونى ملله‌ته‌یل، چوینكه‌ توركیاى هاوسا تایبه‌تمه‌ندى خوه‌ى دیریگ وه‌ل كوردا.

محه‌مه‌د عه‌لى