باره‌ قورسه‌گه‌ هه‌ميشه‌ ئه‌كه‌فێده‌ بان كورد

شفق نيوز

دی نوڕێد بنه‌ڕه‌ت ناوناين كورد له‌ وشه‌ی كواردو هات ك وه‌ بابلی مانای سوارخاس نوايين ئه‌ياد و هه‌ر وه‌و خاتريشه‌ ره‌گه‌زپه‌ره‌سه‌يل ناحه‌ز بوين ئه‌را كورد له‌ هه‌رسێ نه‌ته‌وه‌گه‌، وه‌لی هه‌ميشه‌ ئه‌و كورده‌ وه‌پيان په‌سه‌ن بوی ك نيازی پاك بوی ئه‌را نه‌ته‌وه‌يل يه‌كگرتگ وه‌ليانا، يه‌يش له‌وه‌ختيگ ك ئايدۆلۆجی باوه‌ڕ له‌ ئاڵشتكاری وه‌رده‌واميگ بوی، دی وه‌و جووره‌ هه‌ر له‌وه‌ختيگ ك په‌يوه‌ندييمان وه‌ ده‌وڵه‌ت عوسمانی كووتايی وه‌پيهات دی ملله‌ته‌گه‌مان ئاگاداره‌و بوی له‌ هوير به‌رژوه‌ندی، وه‌لێ نه‌ك به‌رژه‌وه‌ندی نه‌ته‌وه‌يی، به‌ڵكوو به‌رژه‌وه‌ندی تاكه‌ كه‌سی.

ئمڕوو گشت كه‌سيگ له‌بان ئی گووشه‌ی زه‌ويه‌ له‌ مه‌ارم ملله‌ت كوردستان ره‌سيه‌و، كورديش هوشياره‌و بوی و ئاگادارن له‌ جموجويل سه‌بازی و هه‌ر كه‌سيگ له‌ليان مه‌له‌كيه‌تيگ ديرێد و خوازياره‌ مقه‌يه‌تی له‌لی بكا.

له‌ كۆبانی كاريگه‌ريه‌يليگ تر ئه‌را ئافره‌ت كورد تۆمار كريا، گشت جه‌هان چه‌پڵه‌ ئه‌را كۆبانی كوتاو هه‌ر له‌و سووزيشه‌و سووزداری په‌لكيشا وه‌ره‌و شه‌نگاڵ ناو كويه‌ن سنجار جوور ئه‌وه‌گ رووژنامه‌نويسيگ سويدی هاورده‌ی كار له‌ ساڵ ١٩٧٢ له‌وه‌ختيگ ك خوازيار ئه‌وه‌ بوی بڕه‌سێده‌ شاره‌گه‌ وه‌خاتر نويسانن راپۆرتيگ رووژنامه‌گه‌ری، ك يه‌يش له‌يوا كرد پێشمه‌رگه‌يل قاره‌مان وه‌ پلانيگ سه‌ربازی بچنه‌ ناو قايمقاميه‌ت و جوور ئه‌وه‌گ هووكاره‌يل ره‌سانن ناوده‌وڵه‌تی له‌لی بڕه‌سننه‌و.

ئيسه‌يش وه‌ل به‌رزه‌وبوين لايه‌نگری مه‌ردمی، دوينيم ك داعشيه‌يل بانگه‌واز حه‌يا عه‌لالجيهاد ئه‌كه‌ن و له‌ رومادی و حه‌له‌ب و دێر ئه‌لزۆر ئه‌و بانگه‌وازه‌ نه‌كردن، تا ڕاده‌يگ ك وشه‌ی پێشمه‌رگه‌ ترس خسته‌ دڵه‌يليان.

ئمجا له‌يرا ئه‌خوازيم ئه‌وه‌ بويشيم ك ملله‌ت كورد تيه‌نگيه‌ ئه‌را چه‌ك و پشتگيری ئاسمانی و رويماڵكردن له‌لايه‌ن ره‌سانن وه‌ جووريگ ك توانای ملله‌ته‌گه‌ ده‌ربخا دژ زاڵم و سته‌مكاره‌يل و هه‌ر وه‌و خاتريشه‌ ئويشيم: سڵام له‌ قاره‌مانه‌يل ملله‌ته‌گه‌مان له‌ شه‌نگاڵ و خورماتوو، چوينكه‌ جه‌هان گشتی دڵخوه‌شه‌ وه‌ نزيكه‌وبوين كووتاييهاتن مه‌ينه‌تيه‌يل ئه‌و مه‌ردمانه‌ ك ژيان له‌ناو چادر ئه‌وه‌نه‌ سه‌ر.

سه‌ڵاح مه‌نده‌لاوی