له‌ناونى گوزه‌یشته‌و ئاینده‌

شفق نيوز

له‌ئیمه‌ تویه‌نیگ ژیان خوه‌ى له‌ گوزه‌یشته‌ یا له‌ئاینده‌ ده‌سنیشان بكا یائه‌وه‌سه‌ له‌ى وه‌خته‌ ژیان خوه‌ى بووه‌یگه‌ ڕییه‌وه‌.

ئه‌گه‌ر بتوایم ته‌نیا له‌ ئیسه‌ بژیه‌یم، ئه‌وه‌ كار سه‌ختیگه‌و شایه‌ت نه‌تویه‌نیم له‌هویره‌وكردن زیاتر چشتیگ له‌لى باریمنه‌ دى، وه‌لى ژیانه‌ راسه‌قینه‌گه‌ ئسپات ئه‌وه‌ كردگه‌ ك هه‌وه‌جه‌ وه‌ ئه‌وه‌ دیریم خوه‌مان له‌ناونى گوزه‌یشته‌و ئاینده‌ بوینیمنه‌وه‌.

هه‌ر رویداگیگ خوه‌شییگ یا ناڕه‌حه‌تییگ له‌ گوزه‌یشته‌ وه‌پیمان به‌خشا، هه‌میشه‌ له‌ هویرو هسه‌یلمان وجوود دیریگ و ده‌ركه‌فیگ وه‌ هه‌ر شیوه‌ى بووگ، ئنجا ئه‌وه‌ك له‌ گوزه‌یشته‌ رویداویگ و ناڕه‌حه‌ت بویگ، ئه‌وه‌ بیگومان تویش دڵه‌ڕاوه‌كى تیه‌ریگه‌ تویشمان و ئاره‌زوومه‌ندیم ئه‌گه‌ر وه‌ خه‌یاڵیش بووگ له‌مه‌ژگمان دوباره‌وه‌ نه‌وگ، یه‌یش بنه‌مایگه‌ ئه‌را ئه‌وه‌ك به‌عزه‌جاریگ له‌ ئیسه‌و ئاینده‌مان له‌ناو خه‌یاڵ و هویرو ئه‌ڕاى چوین ئه‌و رویداگه‌یله‌ بژیه‌یم و هه‌ر ئه‌وان بوونه‌ بنه‌ماى هویر و پلان و ئه‌ڕاى چوینه‌یلمان. ئه‌وه‌ك ئاقڵ بووگ له‌و گوزه‌یشته‌ ژیه‌یگ ك به‌یگه‌ ئه‌را ئاینده‌و بیجگه‌ ئه‌وه‌یش وه‌گشت فكره‌یگه‌وه‌ هویر له‌ گامه‌یل ئاینده‌ى ئه‌كا، ك تویه‌نیگ له‌ به‌رژه‌وه‌ندى ژیانى بووگ. ئنجا ئاقڵ ئه‌و كه‌سه‌سه‌ ك هویر له‌ مامڵه‌ى ئیسه‌ى خوه‌ى ئه‌كا.

بیگومان به‌، ك له‌ ئاقڵیید نیه‌ ئه‌گه‌ر ژیاند بووه‌سیده‌ شكاته‌یل گوزه‌یشته‌وه‌، یا له‌ناو زندان گوزه‌یشته‌ خوه‌د یه‌خسیر بكه‌ید و بویشید(من چه‌ كردویم تا تویش ئى به‌دبه‌ختیه‌ بام؟ ئایا شایسته‌ى ئه‌وه‌ بویم؟ ئه‌گه‌ر ئه‌وه‌ ڕوى نه‌یاتاگ ئه‌وه‌ من له‌ویا نه‌ویم، یا بویشید كاشكا ئه‌و گامه‌ نه‌نیاتام، وه‌نا ژیانم وه‌شیوه‌یگ تر چیاگه‌ ڕییه‌وه‌). ژیاند به‌رهه‌م سه‌عاته‌یل ئیسه‌ى گشت ژیان خوه‌ده‌، وه‌ ئه‌وه‌ك خوه‌د كردیده‌سه‌ى و وه‌ئه‌وه‌ك وه‌زعه‌گه‌ ئه‌راد هاورده‌سه‌ى، ماناى ئه‌وه‌سه‌ به‌شیگ  له‌وه‌ك خوه‌د له‌تى ژیه‌ید خوه‌د بڕیارده‌ر و جى وه‌جیكه‌ر بوید. گرنگ ئه‌و نیه‌، به‌ڵكوو گرنگ ئه‌وه‌سه‌ له‌وه‌رانوه‌ر ئه‌و قسه‌یله‌ بویشید: چه‌ بكه‌م ئه‌را ئه‌وه‌ك ده‌ڵه‌ك تازه‌یگ بنه‌مه‌ ژیانمه‌وه‌؟ ئه‌گه‌ر ئه‌وه‌یش غه‌ڵه‌ت بویگ  چه‌ بكه‌م ئه‌را ئه‌وه‌ك دوباره‌ نه‌وگه‌وه‌؟

ئه‌نجا ئه‌گه‌ر له‌خوه‌شى و شادیه‌یل گوزه‌یشته‌یش بژیه‌ید، ئه‌وه‌ بیجگه‌ ئازار و ناڕه‌حه‌تییگ  هویچ چشت تازه‌یگ وه‌پید نیه‌وه‌خشیگ و ناڕه‌حه‌تییگه‌ ك شه‌مه‌نده‌فه‌ریگ هه‌ڵى گریگ و روى شه‌مه‌نده‌فه‌ره‌گه‌یش هه‌میشه‌ وه‌ره‌و گوزه‌یشته‌س. ئیمه‌ ئه‌ڕاچه‌ بویشیم خوه‌زگمان وه‌ پار، ئه‌یه‌سه‌ ئه‌و فكره‌ ك به‌یگه‌د وه‌ره‌و گوزه‌یشته‌، چوینكه‌ له‌ى وه‌زع ئیسه‌ هویچ چشتیگ  نیه‌وینیده‌وه‌، چوینكه‌ له‌شوون ئه‌ڵماس و كوچگه‌یل گرانقیمه‌ت گوزه‌یشته‌یا تاو ده‌ید، وه‌لى ئه‌وانه‌ هه‌رچه‌نى نرخدار بوون، ئه‌وه‌ بیگومان هه‌ر كوچگ و كه‌ره‌سه‌یل ڕه‌قیگن له‌ ژیاند.

ئه‌و كه‌سه‌ ك له‌ئیسه‌ كه‌م بژیه‌یگ یا نه‌توایگ ژیانیگ ده‌سه‌وه‌ر بكا، ئه‌وه‌ هه‌وڵ ده‌یگ  ك پرس و ئه‌نجامه‌یلى هه‌میشه‌ به‌یگه‌ پاڵ گوزه‌یشته‌ى خه‌یاڵیه‌گه‌ى. ئنجا هه‌ق و وه‌رگیریگردن له‌ خود ماناى ئه‌وه‌ نیه‌ نامه‌ى گوناهه‌یل وه‌ڕاس و چه‌پ گوزه‌یشته‌یا په‌خشه‌و بكه‌یم و گشت چشتیگ و گشت كه‌سیگ تاوانبار بكه‌یم بیجگه‌ خود خوه‌مان.

ئه‌و كه‌سیشه‌ ك گوزه‌یشته‌ى خوه‌ى وه‌ك شه‌وق خوه‌ر بیگه‌رد زانیگ ، ئه‌وه‌ نه‌ك ته‌نیا دروو وه‌ل ده‌وروه‌ریا ئه‌كا، به‌ڵكوو خود خوه‌ى خه‌ڵه‌تنیگ له‌باوه‌ت گوزه‌یشته‌و ئاینده‌.

جویر ئه‌وه‌ك ئاشكراس ك گوزه‌یشته‌ چشتیگ جیگیره‌و ته‌نیا دره‌فه‌ت ئه‌وه‌ ده‌یگه‌ پیمان ك هویرى بكه‌یم، وه‌لى ئاینده‌ ده‌روازه‌ى وه‌رفراوانیگه‌و تویه‌نید چشته‌یل فره‌یگ له‌تى ده‌سه‌وه‌ر بكه‌ید، له‌ گوزه‌یشته‌ شه‌وق خوه‌ر نیه‌وینیده‌وه‌، به‌ڵكوو ته‌نیا تویه‌نید یادگاریه‌یل ئه‌وه‌ خوه‌ره‌ بوینید، ئنجا ئه‌گه‌ر رووژیگ له‌ ڕووژان ئه‌و شه‌وقه‌ له‌ گوزه‌یشته‌ داشتیده‌، ئه‌وه‌ بیگومان ئه‌گه‌ر بایگ و گامه‌یلد جیگیر بوون ئه‌وه‌ جاریگ تر هه‌ر وه‌ختیگ بووگ له‌له‌ ئاینده‌ خوه‌ریگ دوینیده‌وه‌.