ئايا ئيمه فه‌يلييم؟
دی جوور پيكهاته‌يل تر كومه‌ڵايه‌تی له عراق توانای ريككفه‌تن نه‌يريم له‌ناونی خوه‌مان له‌بان شيوازيگ كار هاوبه‌ش له‌وه‌ر داناين به‌رژه‌وه‌نديمان له‌بان به‌رژوه‌نديه‌يل تر، هه‌ر له‌وه‌ر ئه‌وه‌يش گوفتاره‌يلمان سه‌ر وه ئايدۆلۆجيات مه‌ند ك خزمه‌تمان وه هويچ چشتيگ ناكا. وه‌ل ئه‌وه‌يشا هۆڵۆكۆست كووچ وه‌پيكردنه‌يليش هاته بانی ئه‌را له‌ناوبردن گشت ئوميده‌يلمان و له هيزيگ ئابووری و كومه‌ڵايه‌تی كاريگه‌ره‌و له عراق ئاڵشتمان كرد داواكه‌ر په‌نابه‌ری و ميوان له وڵاته‌يل و شوونه‌يل تر.
دويای ئازادكردن عراق له‌ژير ده‌سڵات رژيم وه‌رين به‌عس له نيسان ٢٠٠٣ و ئاكام سياسه‌ته‌يل له‌ناوبردن زاڵمانه له‌لايه‌ن ئه‌و رژيمه، ده‌نگه‌يليگ له‌يرا و له‌ورا به‌رزه‌و بوی و هه‌وڵ چويچيانمان دا، ئمجا جاريگ بڕيگ له‌ليان وه‌ناو وه‌رگريكردن له مسته‌ڵحيگ ك ئيمه فه‌يلييم و بنه‌مای جوگرافی و مێژوو ديرێم و له‌ليانيش بوی وتيان ته‌نيا ته‌سفيركرياگه‌يل فه‌يليين و جارجاريگيش كه‌سانيگ دوينيم مكوڕن له‌بان ئه‌وه‌گ فه‌يلی نيين و بنه‌چه‌كيان به‌نه‌و ئه‌را هووزه‌يل تر، تائيسه‌يش ئيمه له كوردستان تويش سه‌ختيه‌يل فريه‌يگ ئه‌يه‌يم و قه‌سه‌مان يه‌كيگ نيه و ده‌نگه‌يلمان چويچياگه‌و توانای يه‌كڕزی و يه‌كده‌نگی نه‌يريم، ك هه‌رچه‌نی خاسيش زانيم ك هيزمان ها گرده‌وبوين و يه‌كگرتنمان.
له‌يرا مه‌رامم له‌وه نيه ئاشنای خوه‌نه‌وار وه هه‌قدارێتی ئه‌ياكه له‌واكه بكه‌م، وه‌لێ ئه‌پرسم ك ئايا ئی چويچيانه له به‌رژه‌وه‌ندی كييه؟ كه قانجاز ئه‌كا له‌ی كاره؟
بيگومان ئيمه زه‌ره‌دمه‌نيم و هه‌ركه‌سيگ وه‌رده‌وامی ئه‌ياده ئی كيشمه‌كيشه ئه‌و قانجاز ئه‌كا. ئمجا گت پيكهاته‌يل كار له‌وه‌ر يه‌كگرتن و يه‌كده‌نگی ئه‌كه‌ن و ئيمه‌يش هيمان جياوازيم له‌بان ناوناين لاوه‌كی و له هويرمان چيه ئيمه وه‌رجه هه‌ر چشتيگ كورديم و هه‌ر مه‌ينه‌تی و تاوانيگ هاته تويشمان ته‌نيا له‌وه‌ر ئه‌وه بوی ك كورديم، هه‌ر وه‌و خاتريشه بايه‌سه له‌بان گشتلايگ ك هيزمان ها يه‌كگرتنمان و گشت ناكووكيه‌يليگ بخه‌نه كنار و با وه‌يه‌كه‌و هوير له كيشه‌ی ملله‌ت كوردمان و ئه‌و ئاره‌زووه بكه‌يم ك نزيكه‌و بويه له وه‌ديهاتن تا جاريگتر مه‌ويسيمان دوباره‌وه نه‌كريه‌ێد وه‌ده‌س ئه‌وانه‌گ ك ئمڕوو ئه‌خوازن چويچيان له‌ناونيمان دروس بكه‌ن وه مه‌رامه‌و.
سوبحی مه‌نده‌لاوی
