له‌شوون ئاڵشته‌وبوين كی جينشينه‌؟

شفق نيوز

چه‌وه‌ڕی كه‌ن له‌شوون خوه‌ینيشانداينه‌يل و بشيويه‌يليگ تا ئيسه‌ وه‌رده‌وامه‌ نه‌وبه‌تيان بايگ.

ئه‌ی رويداگه‌يله‌ له‌لايه‌ن ملله‌ته‌يليگ ئه‌نجام گرت ك حه‌ق دياری كردن ئايه‌نده‌ی خوه‌ی و هه‌ڵوژاردن ده‌سه‌ڵاتيگ ئه‌را وڵاته‌گه‌ی ك پيشكه‌ش كردن هه‌وه‌جه‌يلی جيوه‌جی كه‌ی و قوربانيه‌يل فره‌يگ له‌ی شورشه‌يله‌ داگه‌. رويداگه‌يليگ تائيسه‌ دريژه‌ ديرن ته‌نيا قۆناغ يه‌كمه‌ و راسه‌ ك فره‌ گرنگه‌ وه‌لی قۆناغ ئايه‌نده‌ گرنگتره‌ و بايه‌د بنه‌وای راسيگ ئه‌را ده‌سه‌ڵاته‌يل نوو دياری بكريه‌يگ تا ئه‌ی شۆرشه‌يله‌ وه‌ ئامانج خوه‌يان بڕه‌سن و لايه‌نه‌يليگ له‌ خاوه‌نه‌يل سه‌ره‌كی خوه‌یان نه‌دزنه‌ی.

وه‌لی ئه‌ی پرسيار گرنگه‌ وجوود ديريگ ك چ كه‌سيگ قوناغ دويه‌م دياری كه‌ی؟ و چ كه‌سيگ نه‌خش گه‌وراتريگ له‌ دياری كردنی نيشان ده‌يگ؟ كومه‌ڵگه‌ی ناوده‌وڵه‌تی يا ناوچه‌ی هه‌رێمی، يا هه‌و ملله‌ته‌ ك ئه‌ی شۆرشه‌يله‌ ڕيكخستن؟

گوڕانكاريگ له‌ ناوچه‌ی عه‌ره‌بی ئه‌نجام گرت، وه‌ له‌كار لاوردن سه‌رۆك تونس(زين العابدين بن علی) ده‌س وه‌پی كرد و له‌شوونی سه‌رۆك مسری (حسنی موبارك) و ئيسه‌ی چه‌وه‌ڕی كريه‌يگ وه‌ ده‌سه‌ڵات (معمر قذافى) سه‌رۆك ليبيا و (علی عبدالله صالح) سه‌رۆك يه‌مه‌ن و شايه‌ديش سه‌رۆك سوريا و وڵاته‌يلتر كووتايی بايگ. قوناغ يه‌كم جيوه‌جی كريا و له‌ بڕيگ له‌ وڵاته‌يل ديريگ جيوه‌جی كريه‌يگ وه‌لی قوناغ دويه‌ميگ له‌ گشت ئه‌ی وڵاته‌يله‌ چه‌وه‌ڕی كريه‌يگ ناوی نرياسه‌ قوناغ(چ كه‌سيگ جينشينه؟‌). جينشينيگ بڕياره‌ دياری بكريه‌يگ گشت نگران كردگه‌ چوينكه‌ قه‌بوول نيه‌كريه‌يگ ده‌سه‌ڵات ديكتاتۆری وه‌ل ده‌سه‌ڵاتيگ ئاڵشته‌و بكريه‌يگ ك له‌وه‌يش خراوتره‌ و له‌بان په‌يوه‌ندی وه‌ل لايه‌نه‌يلتر كاريگه‌ری نه‌يگ و مايه‌ی نائوميدی گشت لايه‌نه‌يله‌س. وه‌يخاتره‌ گشت چه‌وه‌ری جينشينه‌يليگ كه‌ن برياره‌ له‌ی وڵاته‌يله‌ بانه‌ سه‌ر كار تا ئايه‌نده‌ی په‌يوه‌نديه‌يل وه‌ل گشت لايه‌نه‌يل سياسی و ئابووری و بواره‌يلتر ئاشكرا بكه‌ن.

 

ع. م