عراق ٨٥ ساڵ تر قه‌ره‌بوو زه‌ره‌ده‌يل جه‌نگ ئه‌كا!

شفق نيوز

 

له‌ سياسه‌ت وڵاته‌يل دونيا، قوربانی ئابووری به‌سانه‌سه‌ شيويان بار سياسی، وه‌لی ئی وڵات عراقه‌ سه‌ره‌تا وه‌ جه‌نگه‌يل ده‌س وه‌پيكرد، ك وه‌دڵنياييه‌و كاره‌سات ئنسانی و قه‌يران ئابووری له‌ ئاكامه‌يلی بويه‌.

له‌ ديد ئابووريه‌و وه‌ گووره‌ی راپۆرتيگ ئه‌وه‌ ده‌ركه‌فتگه‌ ك خه‌رج ئه‌مريكا له‌ی جه‌نگه‌يله‌ له‌ ساڵ ٢٠٠٨ نزيكه‌ی ١٢،٥ مليار دۆلار مانگانه‌ بويه‌، يه‌يش له‌وه‌ختيگ ك زويتر له‌ ساڵ ٢٠٠٤ بڕ ئه‌و پويله‌ ٤،٤ مليار دۆلار بوی، ك ئه‌را ماوه‌ی چوار ساڵ سێ قات به‌رزه‌و بوی، يه‌يش بيجگه‌ ئه‌وه‌ك چه‌وپووشی له‌ خه‌رجه‌يل تر فريه‌يگ كردگه‌ جوور خه‌رج زه‌خمدار و قوربانيه‌يل ئی جه‌نگه‌، ك له‌ئاكام ئه‌وه‌يش وڵات ئه‌مريكا ئاماژه‌ وه‌ زه‌ره‌ده‌يل خوه‌ی كرد له‌ی جه‌نگه‌و مه‌زه‌نه‌ی وه‌ ٣٢٠ بليۆن دۆلار ئه‌كا، ئمجا ئايا ت بويشيد ئه‌مريكا له‌ی هه‌مگه‌ چشته‌ واز باريد؟ يا ئه‌وه‌ك ئيسه‌ ئه‌ياده‌ بان عراق قه‌سايسيگ بدێ!!!

له‌ ديد ئنسانييشه‌و وه‌گووره‌ی مێژوو له‌ ساڵه‌يل جه‌نگ كه‌نداو زه‌ره‌د گيانی ره‌سيه‌ ٨٠٠ – ٣، ١ مليۆن كه‌س ك بوينه‌سه‌ قوربانی و ٥، ٤ مليۆن كه‌سيش ده‌روه‌ده‌ر بوينه‌، يه‌يش بيجگه‌ ئه‌وه‌ك له‌ ساڵه‌يل ١٩٩٢ تا ٢٠٠٣ سه‌رشماری قوربانيه‌يل ئنسانی ره‌سيه‌ ١،٥ مليۆن له‌ ئه‌نجام نه‌خوه‌شی و ورسگی و كرده‌وه‌ی ترۆريستی.

ئمجا وه‌گووره‌ی زانياری بڕيگ له‌ ئابووريناسه‌يل و زانايه‌يل و كاروه‌ده‌سه‌يل ئه‌مريكا، بڕ خه‌رجه‌يل عراق ئه‌را قه‌ره‌بوو كوه‌يت و ئيران و جه‌نگ كه‌نداو و رمانن رژيم وه‌رين ره‌سيه‌سه‌ يه‌ك تريليۆن و ١٩٣ مليار دۆلار، ك ئه‌گه‌ر رووژانه‌يش ٣،٢ مليۆن به‌رميل نه‌فتيش كلبكريه‌يد و هه‌ر به‌رميليگيش وه‌ ٩٥ دۆلار بفرووشيه‌يد، ئه‌وه‌ ئه‌تويه‌نيم مه‌زه‌نه‌ی داهات وه‌ ١٥ مليار دۆلار بكه‌يم ، مانای ئه‌وه‌سه‌ عراق بايه‌سه‌ ئه‌را ماوه‌ی ٨٥ ساڵ قه‌ره‌بوو زه‌ره‌ده‌يل جه‌نگ مێژوو بكاو ئه‌گه‌ريش بار ئاسايشی عراقيش وه‌ی شيوه‌ وه‌رده‌وام بدێ ئه‌وه‌ پيشبينی ئه‌كريه‌يد ك هه‌تاهه‌تاس له‌ژير بار قه‌رد بمينيد!

هه‌نای باس له‌ عراق ئه‌كه‌يم بيگومان كوردستان تا ئيسه‌ وه‌شيوه‌يگ فه‌رمی به‌شيگه‌ له‌و وڵاته‌و له‌ماوه‌ی ساڵه‌يل ٢٠٠٣ تا ئمساڵ له‌ داينه‌وه‌ی ئه‌و قه‌رده‌يله‌ به‌شدار بويه‌، چوينكه‌ هه‌نای نه‌فت فرووشيا پويله‌گه‌ی راسه‌وخۆ له‌ بانك ئه‌مريكا دانرياو راسه‌وخۆيش قه‌ره‌بوو كوه‌يت وه‌پی كريا.

ئه‌گه‌ريش باس كوردستان بكه‌يم له‌ڕوی قوربانی ئنسانيه‌و، ئه‌وه‌ وه‌ل ملله‌ت عراق به‌شدار بويه‌ و شماره‌ی فريه‌يگ مه‌ردمه‌گه‌يشی له‌ ئه‌نجام جه‌نگ ناونی ئيران و عراق و جه‌نگ كه‌نداو فه‌وتياگه‌ بيجگه‌ ئه‌وه‌ك وه‌ده‌س رژيم وه‌رينيش له‌ هه‌ڵه‌بجه‌و ئه‌نفال وه‌ هه‌زاران ئاده‌ميزاد كورد شه‌هيد بوينه‌.

له‌لايگ تريشه‌و باج غه‌ڵه‌ته‌يل سياسی ئی وڵاته‌ گشت وه‌ختيگ كوردستان ئه‌ياده‌ی چ له‌ڕوی ئاسايش و سه‌قامگيری چ له‌ڕوی ئابووريه‌و، ماوه‌ی چه‌ن مانگيگيشه‌ نه‌داين مووچه‌ی هه‌رێم گه‌وراترين قه‌يران و شووڕش ئابووريه‌، ك گشت ئه‌يانه‌ بيجگه‌ ئه‌و جه‌نگه‌يل خوينياوييشه‌ ك ئيسه‌ له‌ شار موسڵ و له‌لای كه‌ركووك و خانه‌قين و شوونه‌يل تر وجوود ديريد، ك سه‌رله‌نوو گرفت سياسی رويداو ده‌رئه‌نجاميش گرانبوين خوه‌راك و كاڵاو هه‌وه‌جه‌و سوزه‌مه‌نييش تاڕاده‌يگ كوردستان تويش قه‌يران كردگه‌.

هه‌ر وه‌و خاتريشه‌ تا زويه‌ خاستر ئه‌وه‌سه‌ گام ئاينده‌ وه‌ره‌و سه‌روه‌خوه‌يی ڕی بگريده‌وه‌ر و ته‌نيا بنه‌ڕه‌تيگيش ئه‌را ئه‌و قوناغه‌ ته‌نيا ژيرخان ئابوورييگ وه‌هيز و بته‌وه‌، وه‌نا بايه‌سه‌ تا ٨٥ ساڵ تر و بگر فيشتريش سه‌ر ئه‌را وڵاتيگ ده‌وڵه‌مه‌ن زه‌ره‌دمه‌ن و قه‌رزار وه‌ناو عراق بچه‌منيم.

شيلان بيبانی

ج . أ