وه‌ ناوجيكه‌ريش خه‌نجه‌ر له‌ كورد وه‌شنن!

شفق نيوز

ئی كيشه‌يله‌ هه‌رچه‌نی قويله‌و بوون، ئه‌وه‌نه‌ فيشتر سه‌ركرده‌و په‌رله‌مانتاره‌يل سه‌ر وه‌ باڵ نه‌خشدار ناو ئه‌و حزب دياريكرياگه‌ هه‌وڵ ئه‌يه‌ن جوور بيلايه‌ن ده‌ربكه‌فن، ئه‌وه‌سه‌ له‌ناونی هه‌ولێر و به‌غدا يا دروستر بويشيم: كورد و عه‌ره‌ب جوور ناوجيكه‌ر خوه‌يان ده‌رخه‌ن، ئمجا گرفت له‌وه‌ نيه‌ ئه‌را مه‌رام حزبی و بڕيگ هويرده‌ ده‌سكه‌فت سياسی ناوجی ئه‌كه‌ن، به‌ڵكوو گرفت گه‌ورا ها له‌وه‌ له‌ ناوجيكردنه‌گه‌يش راسگوو نين و بار خه‌تاگه‌ ئه‌خه‌نه‌ بان كورد.

له‌ مه‌سه‌له‌ی خوه‌ی دزينه‌وه‌ له‌ جيوه‌جيكردن مادده‌ی ١٤٠ ده‌ستوور و بڕين بودجه‌و مووچه‌ی كارمه‌نده‌يل و په‌يڕه‌وكردن سياسه‌ت ورسگكردن مه‌ردم كوردستان و له‌ هه‌ڕه‌شه‌يل زويتر فه‌رمانده‌يی ئۆپراسيۆنه‌يل دجله‌و ئمڕوو حه‌شد شه‌عبی ئه‌را داگيركردنه‌وه‌ی كه‌ركووك و وه‌رده‌واميداين فيشتر وه‌ سياسه‌ت دژ كوردانه‌ی سه‌دام حسێن و هه‌وڵداين ئه‌را مه‌رزداركردن ده‌سڵاته‌يل حكوومه‌ت هه‌رێم و كه‌مه‌وكردن ده‌سكه‌فته‌يل له‌ چوارچوه‌ی خواست عرووبه‌و مسه‌له‌يل تر خوه‌يان ئه‌كه‌نه‌ ناوجيكه‌ر، ئمجا له‌و ناوجيكردنه‌ يا ئه‌وه‌سه‌ به‌غدا بيتاوان ئه‌كه‌ن، يا ئه‌وه‌سه‌ مه‌سه‌له‌گه‌ وه‌ كيشه‌ی شه‌خسی تاريف ئه‌كه‌ن، دی ئه‌گه‌ر له‌و كيشه‌يله‌ كورد تاوانبار و عه‌ره‌ب بيتاوان بوود جوور ئه‌وه‌ك ئه‌و لايه‌ن نه‌خشداره‌ ئويشيد! ئه‌ی له‌وه‌رچه‌ ڕی ئه‌ياد ك به‌شه‌ حكوومه‌ت خوه‌ی بدێده‌ شه‌ريك تاوانه‌يل؟ خو ئه‌گه‌ر ئه‌و مه‌سه‌له‌يليشه‌ ك ئاماژه‌ وه‌پيان كرديم شه‌خسی بوون! ئه‌پرسيم: ئايا ئه‌و مه‌سه‌له‌يل نه‌ته‌وه‌ييه‌ كامانه‌ن ك ئه‌وان له‌بانيان ئه‌يه‌نه‌ ده‌نگ؟

سياسه‌ت مقه‌يه‌تيكردن به‌رژه‌وه‌ندی ئه‌و لايه‌نه‌ نه‌ك هه‌ر ئه‌وه‌يش، به‌ڵكوو له‌ له‌ ره‌ساننه‌يليش وه‌ده‌م رشانن ئه‌سر چه‌وه‌يله‌و خوازيارن له‌يوا باس ئه‌را مه‌ردم كوردستان بكه‌ن ك ئه‌وه‌ حكوومه‌ت هه‌رێمه‌ پابه‌ند نادێ وه‌ ريككه‌فتنه‌يل و به‌غدايش وه‌و خاتره‌سه‌ بودجه‌و مووچه‌ی كارمه‌نده‌يل هه‌رێم ره‌وانه‌ ناكا! ك يه‌يش هانداين مه‌ردمه‌ دژ وه‌ حكوومه‌ت هه‌رێم و په‌ياميگيشه‌ ئه‌را به‌غدا ك وه‌رده‌وام بدێ له‌بان سياسه‌ت بڕين نان مه‌ردم، يه‌يش بيجگه‌ ئه‌وه‌ك باس حكوومه‌تيش وه‌ شكه‌ستخواردگ ئه‌كه‌ن و داوای ده‌س له‌كاركيشانه‌وه‌ی ئه‌كه‌ن و له‌ په‌رله‌مانيش ره‌خنه‌گر و موزايه‌ده‌چی و له‌ جاده‌يش وه‌ هانداين و جموجويلداين سووز مه‌ردمه‌و خه‌ريكن.

سووره‌ مه‌رگه‌يی

ج . أ