ته‌نيا دوشمن خيانه‌ت ناكا

عه‌لى  حسێن فه‌يلى

شه‌فه‌ق نيوز/ وه‌ ڕاى من قه‌واره‌ى ئاماده‌بوين سياسى كورد له‌ ماوه‌ى ئى ساڵه‌يل دوياخره‌ له‌ به‌غدا ئه‌وه‌نه‌ى كاريگه‌رى ته‌نيا گوله‌يگ له‌ تفه‌نگ پێشمه‌رگه‌يگه‌و وه‌ره‌و روى داعش نيه‌و له‌وانه‌يش كاريگه‌رى له‌بان ئاست جه‌هانى وكاريگه‌رى ئه‌را يه‌كڕزى ملله‌ته‌گه‌مان.

 

دونياى كويه‌نمان وه‌ مردگى په‌يا بوى و دونياى تازه‌مانيش له‌ ره‌ساننمان دوياكه‌فت و ئاكامه‌گه‌يش ئايا به‌شداريمان وه‌و جوور وجوودمانه‌ وه‌ ڕاده‌ى خواستيگ ئه‌دێ؟ ئمڕوو ده‌رفه‌ت خياڵكردن و پاشگه‌زى و گله‌وخواردنيش نيه‌، ئمجا ئه‌گه‌ر كه‌فيتمنه‌ ناو هه‌ڵوژانن خراو و خراوتريش هويچ چاره‌سه‌ريگ نه‌يريم بيجگه‌ خه‌بات، وه‌ل ئه‌وه‌يشا له‌شوون گشت ژان و مه‌ويسى و سه‌دان هه‌زار شه‌هيد و زه‌خمدار، دوينێد كه‌سه‌يليگ هانه‌ ده‌ورگردمان نه‌خوه‌شى له‌ليان داگه‌ وه‌بى چاره‌سه‌ر و سزاى ملله‌ت كورد وه‌خاسى دوينن و ته‌نانه‌ت ره‌حم وه‌ چاره‌نويس هه‌فسه‌د هه‌زار خوه‌ندكاريش ناكه‌ن له‌وانه‌گ بوينه‌ قوربانى له‌ پايز خوه‌نين و ئى شماره‌يشه‌ چوار نزيكه‌ى چوار ئه‌وه‌نه‌ى قوربانيه‌يل ئه‌نفاله‌.

 

هه‌وڵ لاوه‌كردن مه‌ردمانيگ له‌بان كورد چشت تازه‌يگ نيه‌، وه‌لێ ئه‌وه‌گ ئمڕوو ده‌ركه‌فێد ئه‌وه‌سه‌ ك ئه‌و هه‌وڵه‌يل و ئه‌و ريكخستن سيناريۆيه‌يله‌ راسه‌وخۆ وه‌ل دوشمنه‌يل ته‌قلێدى نادێ، ئه‌گه‌ر فه‌رز بكه‌يم ده‌رفه‌تيگ ته‌له‌فزيۆنى يا سه‌كوويگ ره‌سانن ئه‌را بڕيگ له‌ قسه‌كه‌ره‌يل كورد له‌وانه‌گ پابه‌ند نين هه‌ڵكه‌فێد، دوينيم باس باوه‌ته‌يليگ ئه‌كه‌ن ك دوشمن باسى نه‌كردگه‌و هوير له‌لى ناكا، ئيمه‌ سه‌رمان سوڕمينێد له‌ به‌زه‌يى كه‌سه‌يل تر و كينه‌ت روڵه‌يل يه‌ك خاك.

 

ئه‌و كه‌سه‌يله‌ ك وه‌ عه‌ره‌بى قسه‌ كرديان پشت كردنه‌ ملله‌ته‌گه‌يان وه‌ مه‌هانه‌ى كيشمه‌كيش سياسى و چشته‌يل تر، ك وه‌ل موازات له‌ سه‌رسامى دوشمنه‌يل ره‌تڵه‌يليگ له‌ چه‌فته‌وكردن باركردن، ئمجا ئه‌و كوردستانه‌ ك ناسيمنه‌ى فراوانه‌ ئه‌را ئه‌وانه‌گ باوه‌ڕ وه‌پى ديرن نه‌ك ئه‌وانه‌گ ئاژاوه‌چيه‌يل نه‌خشه‌ى كيشن.

 

بڕياره‌يل چاره‌نويسساز نه‌ك گشت ساڵيگ، به‌ڵكوو گشت رووژيگ سه‌رنه‌كه‌فتگه‌يل و ئكماله‌يل ئمته‌حان له‌تى ئه‌كه‌ن و وه‌ل ئه‌وه‌يشا ده‌رفه‌ت ئه‌يه‌ن، وه‌لێ راسيه‌گه‌ى ئه‌وه‌سه‌ ك ئه‌وانه‌گ پابه‌ند نين وه‌ ئسووڵ و باوه‌ڕه‌يل هه‌وه‌جه‌ وه‌ ده‌رفه‌ت تازه‌ نه‌يرن و ئه‌وانه‌ هه‌ر له‌ بنه‌ڕه‌ته‌و واز له‌ زانست هاوردنه‌ وه‌ گووره‌ى ئه‌و تارماييه‌ ك ديرنه‌ى له‌ دڵ و ئه‌قڵ و خياڵ ئه‌وه‌ ئه‌كه‌ن گشت چشتيگ جوور كارت خوه‌ى وبه‌ختيه‌، ك وه‌ڕاسى برنه‌وه‌يشى له‌بان ملله‌ت سيه‌س.

 

ئاشكراس ك زه‌ره‌د گه‌ورا وه‌ مه‌سه‌له‌ى مكوڕبوينيان له‌بان وه‌رگرفتكردن پرووژه‌ى كورد نيه‌، به‌ڵكوو وه‌ سه‌بر ملله‌ت و چه‌وڕيكردنيه‌ له‌بان ئى مه‌ينه‌تيه‌، ئمجا گوزه‌يشته‌يل ك وه‌ى ڕيه‌و گام نانه‌ گله‌و ناخوه‌ن و ژانيش وه‌ كووچكردنيان نيه‌و يه‌يش چشت تازه‌يگ نيه‌و كه‌سانيگ وه‌رجه‌ ئه‌وانيش له‌يوا بوينه‌، ك وه‌ڕاسى بوينه‌سه‌ ميراتگه‌ر ئى فكره‌يله‌، دى نوڕێد كووچكردگه‌يل هه‌وڵ هاوردن به‌غدا دانه‌ ئه‌را ديم كوردستان وه‌ گووره‌ى قه‌واره‌ى كينه‌ت و ميژووه‌ تيه‌ڵه‌گه‌يان.

 

ئمڕوويش وه‌ل چه‌وديرى بريار ئه‌را بته‌وكردن ئاشتى وئاشتيخوازى – سه‌روه‌خوه‌يى كوردستان، دوينێد ده‌يان ده‌وڵه‌ت له‌ ده‌وڵه‌ته‌يل جه‌هان ئاماده‌گى سياسى و سه‌ربازى له‌ناوچه‌گه‌ ديرن و ئه‌وه‌نه‌ى قه‌واره‌ى ئاشتى و ئاسايش جه‌هان وه‌ل ملله‌ته‌گه‌مان هاوبه‌شى ديرن و له‌ هه‌مان وه‌خت مه‌ينه‌تيه‌يل فيشتريگيش ديرن وه‌ل يه‌يگه‌ريكاره‌يل له‌ كيشه‌گه‌مان، ك ئايا بايه‌سه‌ له‌بانمان فيشتر چه‌وه‌ڕى بكه‌يم؟

 

ئمڕوو كوردستان تاكه‌يليگ ملله‌ت و خاك و ده‌سڵات سياسى ديرێد، باقييشى سه‌روه‌رى سه‌روه‌خوه‌ييه‌، باوه‌ڕمانيش ئه‌وه‌سه‌ ك خواسته‌ له‌ى زيندان دودڵى و چه‌وه‌ڕيه‌ ده‌ربچيم، چوينكه‌ گوزاره‌ى سه‌روه‌خوه‌يى جوور ئه‌وه‌ نيه‌ كووچكه‌ره‌يل خياڵى ئه‌كه‌ن له‌ دروسكردن دوشمنايه‌تى يا كاره‌يل تر، به‌ڵكوو وه‌چه‌واشه‌وه‌، چوينكه‌ ديد كوردستان ته‌مامكه‌ر گامه‌يل نه‌خشه‌كيشياگه‌ له‌ گشت بواره‌يل و سه‌روه‌خوه‌ييمانيش نادێده‌ مايه‌ى ژارى و په‌شيمانى، به‌ڵكوو باوه‌ڕه‌گه‌مان بته‌وتر ئه‌كا له‌ بواره‌يل ديموكراسى و مافه‌يل تاك و سه‌روه‌رى، ئه‌وه‌كيش وه‌ چه‌واشه‌وه‌ هه‌وڵ بيه‌ێد ئه‌وه‌ بيگومان دوشمن نايه‌ده‌ قه‌ره‌مان و رووژيگ له‌ ڕووژان خيانه‌تمان ناكا.

عه‌لى حسێن فه‌يلى