جاده‌یگ كورده‌وارى له‌ناوڕاس به‌غدا

شفق نيوز

هه‌ر له‌زویه‌وه‌ نیشته‌جى ئه‌و شوونه‌یله‌ بوینه‌، وه‌تایبه‌ت كورده‌یل فه‌یلى ك تاریخ كویه‌نیگ دیرن له‌ى وڵاته‌و به‌غدایش وه‌ شیوه‌یگ سه‌ره‌كى شوون كاروبار و بازرگانى و ژیان زوورم فه‌یلیه‌یل بویه‌.

شوونه‌یل جیاجیایگ له‌به‌غدا وه‌ك سه‌دریه‌و ئه‌بو سه‌یفه‌ین و عه‌گدلئه‌كراد و ئه‌بو ده‌وده‌و قوشه‌ل و ڕاس ئه‌لساگیه‌و ده‌هانه‌و جه‌میله‌و حه‌ى ئه‌لئه‌كراد له‌ سه‌وره‌و....هتد، گشت ئه‌یانه‌ كورد فه‌یلى له‌تیان تاریخیگ دیریگ له‌ڕوى نیشته‌جیبوینه‌وه‌. وه‌لى ئه‌و شوونه‌ ك هیمان تام كورده‌وارى ده‌یگ  و مه‌ردمه‌گه‌ى په‌یوه‌سن وه‌ بڕیگ ره‌فتار كورده‌واریه‌وه‌، ئه‌ویش جاده‌ى كفاح دڵ پایته‌خت به‌غداس.

وسیان له‌جاده‌ى كفاح یا سه‌رداین ناوچه‌گه‌، بیگومان هس كوردایه‌تى خه‌یگه‌ هویرد، مه‌ردم وه‌ زووان كوردى له‌تى قسه‌ كه‌ن و زوورم بازاڕ و دوكانه‌یلى كورده‌یل فه‌یلى هاوردنه‌سه‌ى كار و تائیسه‌یش داب ونه‌ریت كورده‌وارى له‌ورا هه‌ر زاڵه‌و روحیه‌ت كوردى فره‌ پاكیگ وه‌پیه‌وه‌ دیاره‌، وه‌لى وه‌داخه‌وه‌ ناوچه‌گه‌ له‌ڕوى خزمه‌تگوزاریه‌وه‌ ده‌س به‌زه‌یى هیمان وه‌پى نه‌ڕه‌سیه‌و هویچ وه‌رپرسیگ له‌ حكوومه‌ت لایگ له‌لى نه‌كرده‌سه‌وه‌و لایه‌ن په‌یوه‌ندیداریش خوه‌ى له‌لى دویر گرتگه‌.

له‌سه‌رده‌م پاشایه‌تى وه‌جاده‌ى كفاح وتیان جاده‌ى مه‌لك، وه‌لى دویاخر له‌وه‌ر خاتر حورمه‌ت و ریزگرتن له‌ مه‌ردمه‌گه‌ى و له‌وه‌ر شووڕش 14ى ته‌ممووز 1958 ناوه‌گه‌ى ئاڵشت كریا ئه‌را جاده‌ى كفاح. وه‌ل ئه‌وه‌یشا جاده‌ى مه‌ردم كفاح ناوبانگى فره‌یگ له‌ ئازایه‌تى و خه‌بات داشتنه‌و ڕوڵه‌یل ئى شوونه‌ هه‌میشه‌ ئازاو چه‌ونه‌ترس بوینه‌و روى وه‌ڕوى زاڵم و سته‌مكار وسیانه‌. تاریخ ناوچه‌گه‌ فره‌ كویه‌نه‌و یه‌كیگه‌ له‌ كویه‌نترین جاده‌یل شار به‌غداى پایته‌خت، ك ناوچه‌ى باب ئه‌لموعه‌زه‌م و باب ئه‌لشه‌رجى به‌سیگه‌ یه‌كه‌وه‌و ناوه‌ڕى ناونى هه‌ردوگ ناوچه‌گه‌س.

جاده‌ى كفاح سه‌رچه‌وه‌ى بڕیگ له‌ پیشه‌ى سه‌ره‌كیه‌ وه‌ك(تۆڕنه‌چى، مه‌یدان كرایه‌كردن كۆمپرێسه‌ر، نویسینگه‌ یا مه‌كاتب مقاولات، دامه‌زرانن كه‌ره‌سه‌ى جوراوجوور (انشائی)و....هتد). ئنجا تائیسه‌یش نزیكه‌ى 90% كارگه‌ر و خاوه‌ن كاره‌یلیش هه‌ر كوردن و كاریان پاك و جوانه‌و مایه‌ى متمانه‌ن له‌هه‌ر شوونیگ ته‌كلیف بكریه‌ن ئه‌را كاركردن.

ئى ناوچه‌ى كورده‌واریه‌ وه‌ڕاسى دڵگیر و دڵنشینه‌، ك هه‌رچه‌نى كزى و به‌زه‌یى وه‌پیه‌وه‌ دیاره‌و هیمان له‌ڕوى خزمه‌تگوزاریه‌وه‌ مامڵه‌ى وژدانى و ئنسانى وه‌لیا نه‌كریاگه‌و دویره‌ له‌ فه‌رهه‌نگ خاسسازى حكوومه‌ته‌وه‌، وه‌لى وه‌ل ئه‌وه‌یشا هه‌ر ئیراده‌ى پوڵایین خوه‌ى له‌ده‌س نه‌یاگه‌و ڕوڵه‌یلى نه‌یشتنه‌ شوونه‌وار ره‌سه‌ن و په‌سه‌نى بفه‌وتیه‌یگ و شانازى وه‌پیه‌وه‌ كه‌ن له‌وه‌ختى ئویشن خه‌ڵك كفاحیم.

له‌ى ناوچه‌ ده‌یه‌ها زاناى دینى و فكرمه‌ن و هه‌زاره‌ها رووشنهویر و خاوه‌ن قه‌ڵه‌م و مامۆستاو هونه‌رمه‌ند په‌یا بوینه‌و هه‌ر یه‌كیگ له‌لیان وه‌ جووریگ خزمه‌ت كردگه‌، وه‌لى گشتیان جویر یه‌ك خوه‌شه‌ویسى ئه‌را ناوچه‌گه‌یان نیشان دانه‌.