چه‌وه‌ڕى هایدرۆجین

شفق نيوز

گیرفانن، ملله‌ته‌یل ئازاد گام وه‌ره‌و سازداین ریككه‌فتنه‌یل ئاشتى كه‌ن وه‌ل ئه‌ساره‌ى كه‌و ئاسمان له‌وه‌ر خاتر گه‌ردین له‌شوون وزه‌ى خاسیگ ئه‌را ژینگه‌ ئه‌را هه‌ڵمژین غازه‌یل گه‌رم.

 

هایدرۆجین له‌و باس و ئه‌زموونه‌یله‌سه‌ ك پله‌ یه‌ك پیكهاوردگه‌ ك هه‌وه‌جه‌ى ئنسانیه‌ له‌ ئاینده‌ ئه‌را وزه‌یگ پاك و وه‌رده‌وام، ئنجا زانایه‌یل وزه‌ ئویشن: هایدرۆجین ئه‌و وزه‌سه‌ ك گرینگداره‌و بوود وه‌ل هه‌وه‌جه‌ى جه‌هانیه‌و له‌بانى جوور مادده‌یگ ك هویچ زه‌ره‌دیگ ناڕه‌سنیده‌ ژینگه‌، یه‌یش بیجگه‌ توانایى ئه‌مباركردن و جیوازكردنى و بیجگه‌ ئه‌وه‌یش وه‌كارهاوردنى وه‌ك ئاگردوى ئه‌را خانه‌یل سوزه‌مه‌نى وه‌رگ برۆتونى ك یه‌یش هووكاریگ كه‌هروكیمیاویه‌و تواناى به‌رهه‌مهاوردن وزه‌ى كاره‌بایى دیرێد، ئنجا زانایه‌یل ئه‌ڵمانى گام تازه‌یگ نان له‌وه‌ر ده‌رفه‌ت وه‌رگرتن له‌ هایدرۆجین وه‌شیوه‌یگ كه‌م خه‌رج و ره‌فه‌یق ژینگه‌، ك سستم تازه‌یگ دروسكردن ئه‌را وه‌ده‌سهاوردنى و بویه‌ هووكاریگ و ئیسه‌ له‌بازاڕه‌یل جه‌هانى وجوود دیرێد.

 

ماتیاس بیله‌ر سه‌رۆك په‌یمانگاى رۆستۆك له‌ى باوه‌ته‌و ئویشێد: شاره‌زایه‌یل په‌یمانگاگه‌ سه‌ركه‌فتن له‌ په‌ره‌داین شیواز خاسیگ ئه‌را دراوردن هایدرۆجین وه‌ كه‌مترین خه‌رج له‌تورش فۆرمیك.

 

بیگومان ئه‌و نه‌فته‌ ك شانازى وه‌ فره‌ییه‌و كه‌یم نه‌كردیمنه‌ى ئامانجیگ ئه‌را ئابوورى ئاینده‌مان، ئنجا ئایا له‌ئاینده‌ له‌وه‌ختیگ ده‌وڵه‌ته‌یل پیشكه‌فتگ جه‌هان ده‌رفه‌ت له‌ نه‌فت وه‌رگرن ئه‌را وه‌ده‌سهاوردن وزه‌ى وه‌رده‌وام وپاكیگ جوور هایدرۆجین؟

 

وزاره‌ت نه‌فت له‌گشت بوونه‌یگ ته‌ئكید له‌بان بارزه‌وكردن راده‌ى به‌رهه‌م نه‌فت ئه‌كا ك له‌ساڵه‌یل نزیكیگ بڕه‌سیده‌ 14 ملیۆن به‌رمیل رووژانه‌، وه‌لى وه‌ل ئه‌وه‌یشا كه‌رته‌یل خزمه‌تگوزارى و په‌ره‌سه‌ندن حاڵه‌ت خراویگ دیرێدو ئه‌و هه‌مگه‌ ملیاره‌ها دۆلاره‌ كه‌س نازانى چه‌ وه‌پى تیه‌ێد و هویچ چینگیگ له‌عراق گونجیاگ نیه‌ ئه‌را ژیان.

 

فره‌جار ژنه‌فیم ك وه‌رپرسه‌یل عراق وه‌ شانازیه‌و باس له‌وه‌ كه‌ن ك عراق گه‌ردیده‌ شوون ئه‌وه‌ك بووده‌ سه‌رچه‌وه‌ى یه‌كه‌م ئه‌را نه‌فت له‌جه‌هان، وه‌لى تواناى نه‌خشه‌ناین سیاسه‌تیگ نه‌فتى نه‌یرن، ئه‌ویش له‌ساى نه‌وین یاساى نه‌فت وغاز ك تائیسه‌یش مایه‌ى كیشمه‌كیش لایه‌نه‌یل سیاسیه‌.

 

وه‌گووه‌رى ئه‌و ئاڵشتكاریه‌یله‌ ك له‌جه‌هان رویدا، دیاره‌ عراق هیمان گام خاسیگ نه‌ناگه‌و مه‌ردم عراقیش ده‌رفه‌ته‌یل فره‌یگ له‌كیسیان چى، هه‌ر له‌وه‌ر ئه‌وه‌یش له‌ سه‌ره‌تایه‌یل سه‌ده‌ى بیس وه‌ل  دامه‌زرانن ده‌وڵه‌ت عراق تازه‌ ئه‌وه‌ بوى داگیركه‌ر نه‌خش فره‌یگ داشت له‌ئاڵشتكارى ژیان عراقى وه‌گووه‌رى بنیاتناین ده‌زگایه‌یل نزیك له‌ رووح دیموكراسى، وه‌لى نه‌ریته‌یل توتالیتارى و سته‌مكارى گشت ئه‌و ئازادیه‌ خسته‌ ژیر سایه‌ى حوكم پاشایه‌تى ئه‌را بردنه‌وه‌ى عراق ئه‌را سستم هووزایه‌تى و حزب هووزه‌یل تا ره‌سیه‌ رووژ ئمڕوون ئنجا ئایا سامان عراق كه‌ى ئاینده‌ى خاسیگ تیه‌رێده‌ دى ئه‌را مه‌ردم، ئاینده‌یگ ئه‌را گشت چین و نه‌ته‌وه‌یل، هه‌ر له‌وه‌ر ترسیه‌یم رووژ ئه‌و ده‌ریایه‌یل نه‌فت بته‌قتن و كوچگ و ئاده‌میزاد بخنكنن.

 

كفاح هادى

 

ج