خوه‌شه‌ویسى هه‌لیگ له‌ماڵ كورد ئه‌ڕاى هه‌ڵكه‌فت

شفق نيوز

دوشه‌ممه‌ 14/ 2/ 2011 ریكخریاگ ماڵ كورد وه‌ به‌شدارى ده‌زگاى رووشنهویرى و ره‌سانن كورده‌یل فه‌یلى شه‌فه‌ق وه‌ بوونه‌ى رووژ خوه‌شه‌ویسى جه‌هانیه‌وه‌ ئاهه‌نگیگ ساز كرد له‌ژیر ناونیشان(ماناى خوه‌شه‌ویسى له‌ناونى ملله‌ته‌یل)، ك شماره‌ى فره‌یگ له‌ كه‌سایه‌تیه‌یل سیاسى و ریكخریاگه‌یل كوومه‌ڵگاى مه‌ده‌نى به‌شدار بوین له‌تى، له‌ هه‌مان وه‌خت جایه‌ڵ جوانه‌یل فره‌یگیش له‌ كوڕ و دویه‌ت ئاماده‌ى ئاهه‌نگه‌گه‌ بوین.

له‌ى ئاهه‌نگه‌ هه‌ر یه‌ك له‌ نویسه‌ر و ڕۆماننویس د.ئه‌زهار ڕه‌حیم و وه‌ڕیه‌وبه‌ر جیوه‌جیكار ڕادیۆى مه‌حه‌به‌ له‌ به‌غدا بوشرا ئه‌لئه‌مین له‌باوه‌ت ئاهه‌نگه‌گه‌ باس و گفتوگوو كردن و له‌و باسه‌یلیشه‌ قه‌یریگ  له‌ ماناى خوه‌شه‌ویسى له‌یه‌كه‌ودریا جویر: په‌یوه‌ندى ژن و پیاگ، په‌یوه‌ندى ئاده‌میزاد وه‌ ئاده‌میزاد برایه‌وه‌. وه‌ل ئه‌وه‌یشا قسه‌و باسه‌یلیگ  پڕ له‌ جورئه‌ت و گفتوگوو ئاشكرایگ  خریا ڕوى جویر دید كوومه‌ڵگایه‌یل خوه‌رهه‌ڵات ئه‌را په‌یوه‌ندیه‌یل ئنسانى و له‌وانه‌یش په‌یوه‌ندیه‌یل ئشق و خوه‌شه‌ویسى.

نویسه‌ر ئه‌زهار ره‌حیم وه‌ گووره‌ى ئه‌زموون ئه‌ده‌بى خوه‌ى باس له‌باوه‌ت خوه‌شه‌ویسى كرد وه‌تایبه‌ت له‌ بان جفتبوین خوه‌شه‌ویسى و سیاسه‌ت وه‌ گووره‌ى ئه‌وه‌ك له‌بڕیگ  داستانه‌یلى وه‌ناو (هه‌یشت قه‌ده‌ر)ئاشكراى كردگه‌و ئشاره‌ت وه‌ قه‌ده‌ر هه‌یشت ژن ئشقدار كرد ك خوه‌شه‌ویسى كردنه‌، وه‌لى سیاسه‌ت سته‌مكار دڵ ئه‌و ژنه‌یله‌ وه‌ دویره‌وخستن و كووچ وه‌پیكردن داڕزان ك هاته‌ تویش چین گه‌ورایگ  له‌ كوومه‌ڵگاى به‌غدادیه‌وه‌، ك بیگومان ئه‌و چینیشه‌ كورده‌یل فه‌یلى بوین.

بیجگه‌ ئه‌وه‌یش ئه‌زهار ره‌حیم جه‌خت له‌بان ئه‌وه‌یش كرد ئه‌و كه‌سه‌ك خوه‌شه‌ویس نه‌یاشتووگ شایسته‌ى ژیان نیه‌، چوینكه‌ خوه‌شه‌ویسى وه‌ گووره‌ى له‌یه‌كه‌وداین(ماناى راسه‌قینه‌ى ژیانه‌و باوه‌ڕیش نیه‌كه‌یم سروشتیگ  له‌ جوانى بووگ وه‌بى وجوود خوه‌شه‌ویسى، ئه‌وه‌كیش له‌ جوانى گشت شیوازه‌یل ژیانمان زیاى ئه‌كا ته‌نیا خوه‌شه‌ویسیه‌). وه‌لى وه‌ڕیه‌وبه‌ر جى وه‌جیكار ڕادیۆ مه‌حه‌به‌ له‌ به‌غدا (بوشرا ئه‌لئه‌مین) خوه‌شحاڵى خوه‌ى وه‌ ئاهه‌نگه‌گه‌ى ریكخریاگ ماڵ كورد و ده‌زگاى شه‌فه‌ق له‌ به‌غدا نیشاندا ك وه‌ تاریف ئه‌و ماناى فره‌یگ  له‌لى كه‌فیگه‌وه‌ ئه‌را ملیۆنه‌ها ئاده‌میزاد، له‌ هه‌مان وه‌خت باس له‌ نه‌خش یا ده‌ور ریكخریاگ ماڵ كورد كرد له‌و په‌خشكردن رووشنهویرى خوه‌شه‌ویسى و ئاشتى و به‌شداریكردن بته‌وه‌ له‌جفتكردن بنه‌ماى كوومه‌ڵگاى مه‌ده‌نى.

بوشرا ئه‌مین بیجگه‌ ئه‌وه‌یش ئشاره‌ت وه‌ په‌یوه‌ندیه‌یل سووزدارى ناپوخت و ناپه‌سه‌ن كرد ك نیه‌گونجیه‌یگ  وه‌ل په‌یوه‌ندیه‌یل ئنسانیه‌تاو ئیسه‌ له‌ناو كوومه‌ڵگا وه‌تایبه‌ت له‌ناونى جایه‌ڵ جوانه‌یل په‌خشه‌و بویه‌، هه‌ر له‌وه‌ر ئه‌وه‌یش بوشرا ئه‌مین داوا له‌ نه‌وه‌یل وه‌رین كرد پابه‌ند وه‌رپرسیاریه‌تى بوون له‌وه‌ر خاتر رینماییكردن نه‌وه‌یل تازه‌ وه‌ره‌و په‌یوه‌ندیه‌یل ئنسانى له‌بان بنه‌ماى راسگوویى و راسه‌قینه‌یگ  ده‌رهه‌ق ژن و پیاو له‌ په‌یوه‌ندیه‌یل ساقیگ  و له‌چوارچیوه‌ى خوه‌شه‌ویسى نه‌ك به‌رژه‌وه‌ندى خودى و قانجاز وه‌ختى.

بیگومان ئاهه‌نگه‌گه‌ به‌شدارى وه‌رفراوانیگ  وه‌ خوه‌یه‌وه‌ دى له‌ ئاماده‌بویه‌یل و له‌ هه‌مان وه‌خت خوه‌شه‌وه‌ كریا وه‌ به‌شدارى شعرى ك وه‌باڵاى ئشق و ئاشقه‌یلا خوه‌نست، هه‌ر وه‌و بوونه‌یشه‌وه‌ وه‌رپرسه‌یل شه‌فه‌ق وه‌ هه‌لیگ  زانستنه‌ى ئه‌را ئاشكراكردن جفتبوین(اقتران) هاوكاره‌یل هه‌وراز ئه‌مین و لانا سائب و له‌هه‌مان وه‌خت هه‌ردوگ هاوسه‌ر خه‌ڵات كریان له‌لایه‌ن سه‌رۆك ئه‌نجوومه‌ن وه‌ڕیه‌وبردن ده‌زگاى شه‌فه‌ق عه‌لى حسێن فه‌یلى ك دیارى یادگاریانه‌یگ  پیشكه‌ش كرده‌ پیان جویر ریزگرتن له‌ ئه‌نجامداین كاره‌یل ره‌سانن یا ئعلامییان له‌وه‌خت وجوودیان له‌ شه‌فه‌ق. دى وه‌و جووره‌ له‌كه‌ش وهه‌وایگ  شادى و به‌خته‌وه‌رى ئه‌و ئاهه‌نگه‌ ده‌رفه‌تیگ  بوى ئه‌را ئاماده‌بویه‌یل تا خوه‌شحاڵى خوه‌یان ده‌رخه‌ن و پیرووزبایى له‌یه‌كترى بكه‌ن وه‌و بوونه‌وه‌ له‌ هه‌ڵكه‌فتیگ  پڕ له‌ به‌دبه‌ختى و كاره‌سات.