سه‌رمايه‌گوزاره‌يل جه‌هانی گرنگی ده‌نه‌ هه‌رێم كوردستان

شفق نيوز

سه‌قامگيری ئه‌منييه‌ ك له‌ هه‌رێم كوردستان وجوود ديرێ، سه‌رمايه‌گوزاره‌يل هان داس تا وه‌ره‌و كوردستان بان و وه‌ل ئه‌وه‌يش ياسای سه‌رمايه‌گوزاری له‌لايه‌ن سه‌ركردايه‌تی كوردستان په‌سه‌ن كريا ك ئازادی فره‌يگ داسه‌ سه‌رمايه‌گوزاره‌يل بيگانه‌، ئه‌ی ياسا پيشكه‌فتگترين قانوون له‌ فيشتر وڵاته‌يل عه‌ره‌بی وه‌حساو تيه‌يگ و له‌ ئاست ياسای وڵاته‌يل ئه‌وروپی نزيكه‌ و ئاسانكاريه‌يليگ له‌باره‌ی سيستم باج يا زه‌ريبه‌ و جيوه‌جی كردن نه‌فه‌يل پيشكه‌ش ئه‌كا و ئاسانكاريه‌يل فره‌تريگ ئه‌را سه‌رمايه‌گوزاره‌يل له‌ی ياسا‌ دياری كرياس جوور تايبه‌ت كردن زه‌ويه‌يليگ ئه‌را سه‌رمايه‌گوزاری كردن سه‌رمايه‌گوزاره‌يل تايبه‌ت ئه‌كا و هه‌ق مۆڵكداريش داسه‌ ئه‌ی سه‌رمايه‌گوزاره‌يله‌.

وه‌يخاتره‌ مايه‌ی سه‌رسووڕمان نيه‌ ئه‌گه‌ر هه‌رێم كوردستان بويه‌سه‌ بازاڕ گه‌ورايگ ئه‌را سه‌رمايه‌گوزاری جه‌هانی و سه‌دان كۆمپانيای جه‌هانی له‌تی سه‌رمايه‌گوزاری كه‌ن. ئيمه‌ بايه‌د هه‌ميش ئشاره‌ت بكه‌يمنه‌ ئه‌ی باوه‌ته‌ ك له‌ ميرنشينی شارقه‌ 14هه‌مين كۆنفرانس وڵاته‌يل ئسلامی به‌رپا كريا و حكوومه‌ت هه‌رێم كوردستان له‌ی كۆنفرانسه‌ به‌شداری كرد و نوێنه‌ر بڕيگ له‌ وڵاته‌يل به‌شدار له‌باره‌ی سه‌قامگيری ئه‌منی هه‌رێم كوردستان ئعلان خوه‌شحاڵی كردن و ئعلان كردن ئاماده‌ن له‌ هه‌رێم كوردستان سه‌رمايه‌گوزاری بكه‌ن و وه‌خاتر ئه‌و ئاسانكاريه‌يله‌ ك له‌لايه‌ن قانوون سه‌رمايه‌گوزاری له‌ هه‌رێم كوردستان پيشكه‌شيان كريه‌يگ په‌يوه‌نديه‌يل ئابووری و بازرگانييان بته‌وتره‌و بكه‌ن. قانوون سه‌رمايه‌گوزاری به‌ش گه‌ورايگ له‌ هانداين سه‌رمايه‌گوزاره‌يل بيگانه‌ و مه‌حه‌لی ئه‌را سه‌رمايه‌گوزاری له‌ عيراق داشتگه‌ چوينكه‌ جياوازييگ له‌ناونی سه‌رمايه‌گوزار بيگانه‌ و مه‌حه‌لی نه‌يريگ و حه‌قه‌يل هه‌ردولا زامن كرياگه‌ و له‌ باج يا زه‌ريبه‌يل مه‌حه‌لی و گۆمركی عه‌فو كريانه‌ و سه‌رمايه‌گوزار بيگانه‌ ئه‌ی هه‌قه‌ ديريگ ك نه‌فه‌يل خوه‌ی ئه‌را ده‌يشت كل بكه‌ی و تايبه‌تمه‌ندييه‌يل فره‌تريگ له‌ی قانوونه‌ وجوود ديريگ. شايان باسه‌ سه‌رمايه‌گوزار بيگانه‌ تويه‌نيگ گشت جاريگ له‌بان پرۆژه‌يل گه‌ورا و ئستراتيژی ته‌ركيز بكا وه‌لی سه‌رمايه‌گوزار مه‌حه‌لی ته‌قالا ئه‌را نه‌فه‌يل سه‌ريعيگ ئه‌كا و له‌بان كه‌رته‌يل ئسكان و باز‌رگانی ته‌ركيز ئه‌كا.

وه‌تايبه‌ت ك له‌ی وه‌خته‌ هه‌رێم كوردستان وه‌ بته‌وكردن ژيرخان ئابووری و دامه‌زرانن كارخانه‌يل و كارگايه‌يل گه‌ورا جوور كارخانه‌يل پيشه‌يی و ئۆتۆمبيلسازی و سازين ئامێره‌يل كاره‌بايی و كارخانه‌يل ره‌نگ و كارخانه‌يلتر و هه‌ميش جيوه‌جیكردن پرۆژه‌يل گرنگيگ جوور سازين سكه‌ی شه‌مه‌نده‌فه‌ر و پێڵه‌يل و چشتيلتر هه‌وه‌جه‌ ديريگ، قاپيه‌يل هه‌رێم كوردستان له‌وه‌راوه‌ر گشت سه‌رمايه‌گوزاره‌يل وازه‌ تا له‌ ئه‌ی بازاڕه‌ ركابه‌ری بكه‌ن.

 

محه‌مه‌د عه‌لی سه‌ماوی