ژن بته‌و ماناى كوردستان بته‌وه‌

شفق نيوز

 

له‌ گشت وڵاته‌یل دونیا، هه‌زاره‌ها ریكخریاگ وه‌رگریكردن له‌ هه‌قه‌یل ژن دامه‌زریانه‌، ك وه‌رده‌وام خه‌ریك پیشكه‌شكردن چالاكى جوراوجوورن وه‌خاتر بته‌وكردن هوشیارى و راده‌ى رووشنهویرى ژنه‌یل و ده‌سخستن یه‌كسانى له‌ناونى ژن وپیاو له‌وه‌ر نواگرتن له‌ له‌ چه‌وساننیان و ئامانج گشتیانیش ره‌سانن ژن بته‌وه‌.

راسه‌ له‌ كوردستانیش چه‌نه‌ها ریكخریاگ هه‌ن وه‌ مه‌رام داكوكیكردن له‌ هه‌قه‌یل ژن، یه‌یش بیجگه‌ ئه‌وه‌ك زوورم چالاكیه‌یلیان شایسته‌ى ده‌سخوه‌شیه‌، وه‌لى له‌ هه‌مان وه‌خت له‌ وه‌رانوه‌ر چاره‌سه‌ركردن مه‌سه‌له‌ى ژنه‌یل كورد فریه‌ كز و كه‌مته‌رخه‌من، چوینكه‌ كیشه‌ى پرس ژنه‌یل له‌ هه‌رێم كوردستان هه‌وه‌جه‌ وه‌ چاره‌سه‌ركردنیگ هه‌میشه‌یى دیرید نه‌ك چاره‌سه‌ریگ وه‌ختى.

ئه‌وه‌ك ئیمه‌ دیمنه‌سه‌ى چه‌و، له‌ كوومه‌ڵگاى ئیمه‌ مه‌سه‌له‌ى ژن فریه‌جار دویا خریه‌ید، یه‌یش خوه‌ى له‌ خوه‌ى بووده‌ هووكار په‌یابوین كاریگه‌رى خراو له‌ناو كوومه‌ڵگا، چوینگه‌ ئمڕوو هه‌رێم كوردستان له‌ ڕوى ئاڵشتكارى لایه‌ن سیاسى و ئابوورى پیشكه‌فتن وه‌رده‌وامیگ دیرید، ك بایه‌سه‌ كیشه‌ى ژنیش شان وه‌شان ئى پیشكه‌فتنه‌ تاوتوى بكریه‌یدو ڕى چاره‌سه‌ر ئه‌ڕاى ئاماده‌ بكریه‌ید، ئه‌ویش له‌وه‌ر ئه‌وه‌ك كوومه‌ڵگاى مۆدێرن و پیشكه‌فتگ بایه‌سه‌ له‌ گشت لایه‌نیگه‌و بته‌و بوود، تا له‌ ئاینده‌ كه‌متر تویش گرفت بوود له‌ وه‌رانوه‌ر دامه‌زرانن كوومه‌ڵگایگ بته‌و، ك بایه‌سه‌ ریكخریاگه‌یل له‌ گشت بورایگه‌و بوونه‌ خوه‌ندنگاو چه‌تر ژنه‌یل.

ئه‌را نموونه‌: وه‌ختى ژن له‌شوون جیابوینه‌وه‌ى وه‌ل هاوسه‌ره‌گه‌ى ئه‌گه‌ر له‌ دادگا هه‌ق ته‌واو خوه‌ى وه‌رنه‌گرت، ئه‌وه‌ بایه‌سه‌ ریكخریاگ تایبه‌ت وه‌ مقه‌یه‌تیكردن هه‌ق ژنه‌یل بڕسنه‌ى هاناى و رینیشانده‌ر و هاوكارى بوون ئه‌را وه‌رگرتن هه‌قه‌یلى و ئاڵشتكردن بڕیار دادگا. یا وازكردن خول پیشه‌یى تایبه‌ت جوور دویرانن و كار ده‌سى و كاره‌یل تر له‌ى جووره‌ ئه‌را ئه‌و ژنه‌یله‌ ك هانه‌ ماڵ و خاوه‌ن باوه‌ڕنامه‌ نین، ئه‌ویش له‌وه‌ر ئه‌وه‌ك تا بوونه‌ خاوه‌ن كاریگ پیشه‌یى و بتویه‌نن وه‌ڕیه‌وبردن ژیان خوه‌یان و مناڵه‌یلیان بگرنه‌ مل. به‌ڵى ژن بته‌و چاره‌سه‌ریگ كاریگه‌ره‌ ئه‌را قورتاربوین ژنه‌یل له‌ چه‌وسیان، رییگه‌ ئه‌را فه‌راهه‌مكردن ئازادیه‌یلیان و بنه‌مایگ سه‌ره‌كیه‌ ئه‌را كوومه‌ڵگایگ بته‌و و خاوه‌ن سستمیگ دیموكراسى.

ئمڕوو كوردستان هه‌وه‌جه‌ وه‌ بته‌وى كوومه‌ڵگا دیرید، هه‌ر له‌وه‌ر ئه‌وه‌یش له‌ڕى گرینگیداین وه‌ مه‌سه‌له‌ى ژن و لاوردن گشت ئه‌و قاپیه‌یل به‌سیاگه‌ ك بوینه‌سه‌ ریگر له‌وه‌رده‌م به‌شداریكردن ژنه‌یل له‌ بواره‌یل جیاجیاى ژیان، كوردستانیگ بته‌و دروس بوود، یه‌یش گامیگ سه‌ره‌كى و گرینگه‌ ئه‌را دروسبوین ده‌وڵه‌ت كوردى.

لیزا فه‌له‌كه‌دین كاكه‌یى

ج . أ