هه‌وڵ كورد له‌ى قوناغ چاره‌نویسسازه‌

شفق نيوز

 هه‌رێم كوردستان دویاى هه‌وڵ و ته‌قلاو ئه‌زموون خاسیگ تویه‌نست بیجگه‌ سه‌قامگیرى و ئارامى متمانه‌ى خاسیگیش له‌لاى ملله‌ته‌یل تر بیگانه‌یش په‌یا بكا وه‌ گووره‌ى ئه‌و خزمه‌تگوزراى و مه‌یل پیشكه‌فتن و خاسسازى و ئاوادانیه‌ ك هه‌وڵ بیوچان ئه‌یاد ئه‌ڕاى.

ئمڕوو وڵاته‌یل خوه‌رئاواو بڕیگ له‌ وڵاته‌یل تر جه‌هان ره‌سینه‌سه‌ ئه‌و باوه‌ڕه‌ ك كورد شایسته‌ى ئه‌وه‌سه‌ سه‌روه‌خوه‌یى خوه‌ى داشتوود و خه‌ت ستراتیجیه‌ت واز بكا وه‌ل وڵاته‌یلا، وه‌لى ئیمه‌ ئویشیم هیمان زویه‌و بار ئابوورى كوردستان هیمان هه‌وه‌جه‌ وه‌ بته‌وتر دیرید و هیمان سه‌ره‌تاى ریككه‌فتن و كلكردن نه‌فت كوردستانه‌، وه‌لى ئه‌گه‌ر هات و ئى ریككه‌فتنه‌ وه‌ ته‌واوى سه‌ر گرت و حكوومه‌ت به‌غدا كیشه‌ى گه‌وراتر دروس نه‌كرد، ئه‌وه‌ كوردستان هه‌وڵ فیشتر ئه‌یاد له‌ قوناغه‌یل تر ئاینده‌.

وه‌رجه‌ ماوه‌یگ رووژنامه‌یگ بیگانه‌ راپۆرتیگ بڵاو كردو له‌تى ئه‌وه‌ ده‌رخست ك وڵاته‌یل یه‌كگرتگ ئه‌مریكا وه‌گووه‌رى ره‌فتار مامڵه‌ وه‌ل كیشه‌ى كورد عراق ئه‌كا، رووژنامه‌گه‌ مه‌زه‌نه‌و پیشبینى ئه‌وه‌یش كردگه‌ ك واشنتۆن هه‌وه‌جه‌ى فره‌یگ دیرید وه‌ ئاشكرابوین و ده‌ركه‌فتن فیشتر سیاسه‌ت كورد.

ئنجا راسه‌ ك ئیسه‌ كورد جوور ئه‌وسا نیه‌و پایه‌ ئابووریه‌گه‌ى خوه‌شگوزرانى خاسیگ دروس كردگه‌و ژیان ئارامیگ هاورده‌سه‌ وجوود و هه‌وه‌جه‌ وه‌مقه‌یتكردن راسه‌وخۆ نه‌یرید، وه‌لى له‌ هه‌مان وه‌خت پشتگیرى وڵاته‌یل خاوه‌ن هیز وه‌تایبه‌ت وڵاته‌یل یه‌كگرتگ ئه‌مریكا فریه‌ گرینگه‌ له‌ى قوناغ چاره‌نویسسازه‌.

ئیسه‌ بار هه‌رێم كوردستان له‌ وه‌رانوه‌ر مه‌سه‌له‌ى ناوچه‌یل كوردستانى ده‌یشت هه‌رێم بویه‌سه‌ مایه‌ى نگه‌رانى حكوومه‌ت و هیمان ئه‌و ناوچه‌یل كوردنشینه‌ تا ئیسه‌یش كه‌فنه‌ وه‌ر مه‌ترشى هه‌ڕه‌شه‌ى ترۆریسته‌یل و كووچ وه‌پیكردن زووره‌ملى وه‌ره‌و شوونه‌یل تر، ك یه‌یش به‌شیگه‌ له‌ كیشه‌ى كورد و هه‌وه‌جه‌ وه‌ چاره‌سه‌ر یه‌كجارى دیرید، وه‌ل ئه‌وه‌یشا مه‌سه‌له‌ى بودجه‌و چه‌ن كیشه‌یگ تر له‌ناونى هه‌ولێر و به‌غدا بویه‌سه‌ مایه‌ى ناره‌حه‌تى و نگه‌رانى لایه‌نه‌یل گرنگیده‌ر.

گشت ئى كیشه‌و گرفت و ئه‌ركه‌یله‌ له‌ى قوناغ نازگه‌ هه‌وه‌جه‌ وه‌ یه‌كهه‌ڵویستى و یه‌كڕزى و سیاسه‌ت حه‌كیمانه‌یگ دیرید وه‌ جووریگ ك ملله‌ت كورد له‌تى زه‌ره‌دمه‌ن نه‌ود و هه‌قه‌یل چه‌ن ساڵه‌ى زه‌فتكریاگى نه‌فه‌وتیه‌ید. ئنجا بایه‌سه‌ ئه‌وه‌یش له‌ هویر نه‌كه‌یم ك هیمان كوردستان ده‌روازه‌ى خاسیگیشه‌ ئه‌را وڵاته‌یل یه‌كگرتگ ئه‌مریكاو سیاسه‌ته‌ ستراتیجیه‌گه‌یشى، ك یه‌یش نه‌خش باڵایگه‌ له‌ وه‌رچه‌رخان كوردو ده‌سكه‌فتن پشتگیرى.

عه‌لى غه‌فور

ج . أ