قورئانه‌گه‌و فه‌وتیان قه‌یه‌م خه‌یر

شفق نيوز

  بیگومان له‌ناو ملله‌ت كورد وه‌ دریژایى تاریخ شیره‌ ژنه‌یلیگ هه‌ڵكه‌فتنه‌ ك هه‌میشه‌ مایه‌ى حورمه‌ت و شانازى بوینه‌ ئه‌را گشت كوردیگ . هه‌ر له‌ ئازایه‌تى و چه‌ونه‌ترسى و بته‌وى ئه‌و شیره‌ ژنه‌یلیشه‌ ژنه‌یل تر كوومه‌ڵگایش تویه‌نستنه‌ هیز و توانایى وه‌ربگرن و به‌شدارى خه‌بات و چه‌كدارى ملله‌ت كورد بكه‌ن و شان وه‌ شان پیاوه‌یل هه‌وڵ سه‌ركه‌فتن بیه‌ن.

ساڵ 1925 له‌وه‌ختیگ ك ره‌زاشاى په‌هله‌وى شامرایخان فه‌یلى كوشت، له‌ ئاكام ئه‌و كوشتنه‌ شووڕشیگ به‌رپا بوى له‌وه‌ رخاتر هه‌قه‌وكردن ئه‌و سته‌مه‌، ئه‌وه‌ بوى ك قه‌یه‌مخه‌یر فه‌یلى خوه‌یشك شامرایخان په‌رچه‌م ئه‌و شووڕشه‌ به‌رزه‌و كردو گیانفیدا بوى ئه‌را رزه‌ وه‌ ڕوى بوینه‌وه‌ى هیز ده‌سڵاتدار ره‌زا شاى په‌هله‌وى.

قه‌یه‌مخه‌یر دویاى ئاماده‌گى و دروسكردن له‌شكریگ ، بڕیار ئه‌وه‌ دا وه‌ لویله‌ى چه‌ك خه‌بات هه‌ق ملله‌ته‌ سته‌مدیده‌گه‌ى بسینید، هه‌ر وه‌و خاتریشه‌ نامه‌یگ ئه‌را شێخ مه‌حموود حه‌فید له‌ سلێمانى نویسا به‌شكه‌م هه‌ردوگ هیزه‌یلیان بكه‌نه‌ یه‌كیگ و ته‌نانه‌ت له‌تیشى نویسا له‌شكره‌گه‌ى من بیلا له‌ژیر فه‌رماند بوود وه‌خاتر لاوردن ئه‌و زوڵم و زووره‌ له‌بان كورد، هه‌ر وه‌و خاتریشه‌ قه‌یه‌مخه‌یر بڕیار دا سه‌ر ئه‌را هویچ سته‌مكاریگ نه‌چه‌منید.

بیجگه‌ ئه‌وه‌یش قه‌یه‌مخه‌یر له‌ناو نامه‌گه‌ى ئه‌را شێخ مه‌حموود نویساوید كوشتن شامرایخان برام ناهه‌قى بویه‌و ئیسه‌یش من هه‌وه‌جه‌ى دو ساڵ دابین كردمه‌ جوور خواردن و چه‌ك و ته‌قه‌مه‌نى ئه‌را شووڕش و با وه‌یه‌كه‌و هه‌ردوگ به‌ش كوردستان خوه‌رهه‌ڵات و كوردستان باشوور رزگار بكه‌یم و مه‌ترسى دوشمنه‌یل له‌ خوه‌مان دویره‌و بخه‌یم، وه‌لى جى داخه‌ شێخ مه‌حموود ئه‌و هه‌وڵه‌ ره‌ته‌و كرد و ئاماده‌گى خوه‌ى ئه‌را پشتگیرى ئه‌و شووڕش كوردستانیه‌ ده‌رنه‌خست!

وه‌ هه‌ر حاڵ دویاى جه‌نگ و روى وه‌ڕوى بوینه‌وه‌ى سه‌ختیگ ك خوین فریه‌یگیش له‌و شووڕشه‌ رشیا، ئه‌وه‌ بوى هیز ره‌زاشا تویه‌نست ئه‌و شووڕشه‌ كپه‌و بكا له‌ ئاكام ئه‌وه‌ك قه‌یرانیگ له‌ناو له‌شكر قه‌یه‌مخه‌یر دروس بوودو ئه‌و له‌شكره‌ بویه‌ دو به‌ش و به‌شیگى خوه‌یان دزینه‌وه‌و به‌شیگى وه‌ل قه‌یه‌مخه‌یر مه‌ندنه‌و ، ك له‌ ئاكام ئه‌وه‌یش له‌شكر شكیه‌یده‌وه‌و بڕیگ له‌ چه‌كداره‌یل روى كه‌نه‌ لاى ره‌زاشاو ئه‌ویش وه‌خشینیگ ده‌رئه‌كا ئه‌رایان.

ئنجا ره‌زاشا وه‌ل ده‌ركردن ئه‌و وه‌خشینه‌، نامه‌یگ ئه‌را قه‌یه‌مخه‌یر نویسید و قورئانیگیش ئه‌راى كلكرد جوور دڵنیایى تا باوه‌ڕ وه‌پى بكاو خوه‌ى ته‌سلیم بكا، ئه‌و بوى قه‌مخه‌یر و گشت شووڕشكاره‌یلیش باوه‌ڕ وه‌و قورئانه‌ كردن و هه‌ر وه‌و خاتریشه‌ خوه‌ى و نزیكه‌ى 20 كه‌س له‌ وه‌رپرسه‌یلیشى خوه‌یان دانه‌ ده‌سه‌و، وه‌لى غه‌در و خیانه‌ت ره‌زا شا له‌و قورئانه‌ بویه‌ هووكار له‌ سێداره‌داین وه‌رپرسه‌یل و دویاخریش فه‌وتیان قه‌یه‌مخه‌یر له‌ زیندان و باقى عومرى هه‌ر له‌ زیندان برده‌ سه‌ر و هه‌ر له‌ زیندانیش وه‌ حه‌سره‌ت كاڵه‌و ماڵئاوایى یه‌كجارى له‌ دونیاو نه‌ته‌وه‌گه‌ى كرد.

جه‌ماڵ ئه‌ركه‌وازى