پیاگ بى زڕیوه‌ت و ژنه‌یل وجاخ كووركه‌ر

شفق نيوز

 

وه‌ل ئه‌وه‌یشا ماڵ بى مناڵ له‌لاى خیزانه‌یلیگ جوور زیندان و قه‌ور ته‌نگ و هه‌میشه‌ مایه‌ى نگه‌رانى و دڵته‌نگیه‌، چوینكه‌ ماڵ بى مناڵ گوزران سه‌ختیگه‌و هویچ ئاڵشتكارییگ له‌ ریڕه‌و ژیان ئاڵشت نیه‌ودو چشتیگ تر دڵخوه‌شكه‌ر نیه‌ شوون بى مناڵى پڕه‌و بكاو جار له‌یوایشه‌ هه‌س هه‌ر وه‌ى بوونه‌یشه‌و مه‌هانه‌و ئه‌نگه‌مه‌ دروس بوود له‌لاى كه‌س و كار پیاوه‌گه‌و هه‌ر وه‌و خاتریشه‌ ره‌وڕه‌وى ژیانیان وه‌ دویر له‌ قه‌ناعه‌ت گوزه‌ر ئه‌كه‌ن، چوینكه‌ به‌شیگ له‌ به‌خته‌وه‌رى و هه‌وه‌جه‌یلیان نادیاره‌.

له‌ هه‌مان وه‌خت دڵ ژنه‌یل بى رووڵه‌یش گه‌وراترین میلكان پڕ ژان و هاوار و نزاو لاڵكیان رووژانه‌س، وه‌تایبه‌ت له‌وه‌ختیگ ك دوینن كورپه‌یلیگ تر له‌ باوه‌ش گه‌رم و پڕ سووز خوه‌شه‌ویسى شیر خوه‌شبه‌ختى داڵگه‌یلیان مژن، ك له‌و وه‌خته‌ ئه‌زره‌تمه‌نن له‌ خودا دڵیان وه‌ مناڵیگ شاد بوود و بیبه‌ش نه‌ون له‌و زینه‌ته‌و پویل فریه‌یگیش وه‌ سه‌ردان پزیشك و شێخ و مه‌لا خه‌رج ئه‌كه‌ن، وه‌لى بى هووده‌س و هویچ ئاكامیگ دڵخوه‌شكه‌ر نایه‌رنه‌ ده‌س، هه‌ڵه‌بته‌ فره‌جاریش تا خودا رازى نه‌ود گه‌ڵا له‌ دار ناڕزیه‌یدو رزق و رووزى و مناڵیش ها ده‌س په‌روه‌رده‌گار.

له‌یرا فریه‌جار نا ئومیدى روى له‌ ئاده‌میزاد ئه‌كا، وه‌تایبه‌ت ئیسه‌یش له‌ سه‌رده‌م پیشكه‌فتن و ته‌كنۆلۆجیا ژیه‌یم و له‌ هه‌مان وه‌خت خودایش زانست دانه‌سه‌ ئاده‌میزادو شاره‌زایه‌یل بوار پزیشكى له‌ى سه‌رده‌مه‌ وه‌ گووره‌ى وشكانن و تاقیكردن ده‌سنیشان كیشه‌و گرفت نه‌وین مناڵ ئه‌را ژنه‌یل وه‌ ئاسانى ئه‌كه‌ن و زانن هووكاره‌گه‌ى چه‌س.

وه‌لى جى داخه‌ له‌ ناو كومه‌ڵگا زوڵم و سته‌میگ هه‌س، ك ئه‌ویش ئه‌وه‌سه‌ جارجاریگ دوینیم ئه‌گه‌ر ژنیگ مناڵ ئه‌راى نه‌ود یا هووكار سه‌ره‌كى مناڵ نه‌هاوردن له‌ خوه‌ى بوود، وه‌ دریژایى ژیانى رى نایه‌یده‌ هاوسه‌ره‌گه‌ى مینه‌ى چاره‌نویس تر بكاو ژنیگ تر بخوازید تا خودا مناڵیگ وه‌پى بووه‌خشیدو جوور ئه‌وه‌گ په‌ند كورده‌وارى خوه‌مان ئویشید تا"وجاخ كوور"نه‌ود، وه‌لى دوینید ژنه‌یلیگ هه‌ن وجاخ كووركه‌ر و دونیایگ ته‌م و خه‌م دروس ئه‌كه‌ن له‌ژیان هاوسه‌ره‌یل بى زڕیوه‌تیان!.

بیگومان ئى مه‌سه‌له‌ په‌یوه‌سه‌ وه‌ وژدان و رووشنهویریه‌ت خود ژنه‌گه‌و نه‌بایه‌د ئه‌زره‌ت له‌ دڵ هاوسه‌ره‌گه‌ى خاكه‌سار بكا، به‌ڵكوو بایه‌سه‌ له‌ روى وژان و ئنسانى و خوه‌شه‌ویسیه‌و هه‌ر خود ئه‌و ژنه‌ هه‌وڵ چاره‌سه‌ر گونجیاگ بیه‌یدو ده‌ین و گوناى ئه‌و پیاوه‌ ناریده‌ بان خوه‌ى له‌رووژ قیامه‌ت، ك یه‌یش راسيیگه‌و نه‌بایه‌د حاشا له‌لى بكریه‌ید، ك هه‌ر وه‌و خاتریشه‌ خوه‌شتر ئه‌وه‌سه‌ خود ژنه‌گه‌ ده‌سپیخه‌ر بوود له‌ى مه‌سه‌له‌و ریگر نه‌ود له‌وه‌رده‌م ژیان خوه‌شبه‌ختى.

جه‌ماڵ ئه‌ركه‌وازی