سكۆتلاند و ئێمه‌

شفق نيوز

له‌ی رووژه‌يل دوياخره‌ سكۆتله‌نديه‌يل خه‌يك جيايی بوين له‌و شانشين گه‌وراو ئه‌را ئه‌و مه‌راميشه‌ راپرسييگ ئه‌نجامدان و له‌ ئاكاميش ملله‌ته‌گه‌ كرده‌ دو به‌شه‌و ئه‌را پشتگيريكردن و دژايه‌تيكردن راپرسيه‌گه‌، ئه‌وه‌ بوی ئاكامه‌گه‌ی ك زوورمينه‌ی ملله‌ت دژ جيايی بوين، ئی برياريشه‌ وه‌ گووره‌ی ئه‌وانه‌ك ده‌نگ وه‌ مه‌ندنه‌وه‌ی دان، له‌لای ئه‌وان به‌رژه‌وه‌ندی سكۆتلاند فيشتر مقه‌يه‌تيكرياگ ئه‌دێ وه‌تايبه‌ت لايه‌نه‌ ئابووريه‌گه‌ی.

ئمجا ئه‌وه‌ك له‌يرا ئه‌خوازيم باس له‌لی بكه‌يم به‌راورديگه‌ له‌ناونی ئيمه‌و ئه‌وان، ك له‌ی ماوه‌ بڕيگ له‌ ده‌زگايه‌يل كوردستان فريه‌ گرينگی دانه‌ ئی مه‌سه‌له‌، ك باوه‌ڕم ئه‌وه‌سه‌ ئه‌گه‌ر كوردستان ئه‌و راپرسيه‌ ئه‌نجام بياتاد هه‌ر هه‌مان كار ئه‌رای كرديان.

كورد ماف ياسايی خوه‌يه‌ ئاشكرای سه‌روه‌خوه‌يی بكا، وه‌لی ئه‌را به‌راوردكردن وه‌ل شوونه‌يل تر، هه‌ڵبه‌ته‌ بواره‌يل گونجياگ و تايبه‌تمه‌نده‌يل يه‌كه‌و ناگرن و هه‌ر ملله‌ت و شوونيگ تايبه‌تمه‌ندی خوه‌ی ديريد.

ئيمه‌ ئه‌گه‌ر به‌راورد وه‌ل سكۆتلاند بكه‌يم، ئه‌وه‌ جياوازی يه‌كجار فريه‌يگ دوينيم له‌ ناونيمان، راسه‌ رووژيگ له‌ رووژان هه‌ردوگلامان تويش زوڵم و زوورداری هاتيمنه‌، وه‌لی ته‌نيا ئه‌يه‌ خاڵ هاوبه‌شه‌ له‌ ناونيمان و ئه‌وان به‌شيگن له‌ وڵاتيگ ك فيشتره‌ له‌ چوار سه‌ده‌ديموكراسی په‌يڕه‌و ئه‌كه‌ن و ئيمه‌يش نه‌ك هه‌ر به‌شيگيم له‌ ناديموكراسی، به‌ڵكوو له‌ ناوچه‌يگ دوير له‌ ديموكراسی و يه‌كسانی.

ئيمه‌ هه‌نای باس ديموكراسی ئه‌كه‌يم وه‌ چه‌ك و كار دژ وه‌ ئاده‌ميزاد جواوه‌و ئه‌دريه‌يم، وه‌ به‌شبه‌شه‌وكردن خاك عراق تومه‌تبار ئه‌كريه‌يم، ئه‌وان وه‌چه‌واشه‌ی ئيمه‌ داواگه‌يان وه‌ ريز و حورمه‌ته‌و قه‌بوول كريا ك هه‌رچه‌نی فريه‌يگ له‌ وڵاته‌يل ئۆرپی دژی بوين، وه‌لی وه‌ شيوازيگ ديموكراسيانه‌ مامڵه‌ وه‌ل مه‌سه‌له‌گه‌ كردن، ته‌نانه‌ت بريتانيايش ك دژ ئه‌و راپرسيه‌ بوی وه‌لی وه‌شيوه‌يگ زانستيانه‌و باوه‌تيانه‌ هه‌ڵسووكه‌فت كردو زه‌ره‌ده‌يل ئه‌و جياييه‌ خسته‌ڕوی تا ئه‌و راده‌ ك سه‌رۆك وه‌زيره‌يل بريتانيا ديڤێد كامرۆن ئه‌وه‌ ده‌رخست ك ئه‌گه‌ر زوورمينه‌ ده‌نگ وه‌ به‌ڵی بيه‌ن ئه‌و خوه‌ی ئه‌كوشيد، وه‌لی سه‌رۆك وه‌زيره‌يل عراق وه‌رجه‌ ئه‌وه‌ك باس راپرسی بكه‌يم نان ملله‌ت كورد بڕی.

ئيمه‌ ده‌وڵه‌ت عراق و وڵاته‌يل ناوچه‌گه‌ و كومكار عه‌ره‌بی دژمانن ئه‌را ئه‌نجامداين راپرسی، وه‌ چه‌واشه‌ی سكۆتلاند ك هه‌رچه‌نی دژايه‌تيكردنيان له‌وڵاته‌يل فريه‌يگ دوينريا، وه‌لی وه‌ شيوازيگ ديموكراسی و زانستيانه‌ بوی.

ئمجا من هامه‌ ئه‌و باوه‌ڕه‌ ئه‌گه‌ر ئه‌و بواره‌ ئه‌را سكۆتله‌نديه‌يل هه‌ڵكه‌فت ئه‌را ئيمه‌ هه‌ڵكه‌فتياد ئه‌وه‌ بيگومان ئه‌و جياييه‌ بوياده‌ مه‌حاڵ، ئيمه‌ بيجگه‌ ئه‌و زوڵم و زووره‌ ك له‌ليمان كرياگه‌، تا ئيسه‌يش باس له‌ يه‌كپارچه‌يی عراق ئه‌كه‌يم، ئه‌وه‌ جياوازه‌ له‌ناونی ئيمه‌و ئه‌وان ته‌نيا ئيراده‌ی راسكانی و پابه‌ندبوينه‌ وه‌ خاك و نيشتمان و ئه‌وه‌ك جياوازه‌ هس نه‌ته‌وايه‌تی ئيمه‌و ئه‌وانه‌.

شێركۆ حه‌بيب

ج . أ