داستان ده‌روه‌ده‌رى

شفق نيوز

كه‌س هس وه‌ سه‌ختیه‌گه‌ى ناكا تا له‌ڕووژگارى نه‌ژیه‌یگ، هسه‌یل ئه‌ڵڵاجه‌وى و ترسناك له‌تى كریه‌یگه‌ دى، ژان ده‌روه‌ده‌رى(مه‌نفا) پڕه‌ له‌ به‌دبه‌ختى و دڵته‌نگى، هه‌ر له‌وه‌ر ئه‌وه‌یش دوینید كه‌سیگ  یا دووس ئه‌زیزیگد له‌لید دویره‌و هه‌رچه‌نى هه‌وڵ ده‌ید ناتوانید له‌هویره‌و بووه‌یده‌ى و فره‌جاریش یادگاریه‌یلى كه‌فیگه‌ هویرد و تواناى ئه‌وه‌ نه‌یرید وه‌لیا بویشید، وه‌لى خه‌یاڵى هه‌ر مینیگ  له‌لاد.

عراقیه‌یل له‌ غوربه‌ت به‌ش شیر كه‌فته‌سه‌ پیان و هویچ شوونیگ  له‌بان ئى گووشه‌ى زه‌ویه‌ نیه‌ ئه‌گه‌ر پاى عراقیه‌یل وه‌پى نه‌ڕه‌سویگ ، دویرى چه‌نیگ  جوان بووگ له‌چه‌و به‌عزه‌ كه‌سه‌یلیگ ، هه‌ر بایه‌سه‌ ته‌رازوى ژیانى له‌تى له‌نگ  باریگ  و به‌عزه‌ وه‌خته‌یلیگ  خوه‌شیه‌یلى بایگه‌وه‌ ئه‌را ژیر سفر.

ئیمه‌ى عراقیه‌یل له‌ دید رژیم رمیاگ جویر ڕیه‌نیگ  بویمن و هه‌ر وه‌ختى بتواساگ له‌لیمان سه‌ر بڕى، ئمجا وڵات خوه‌مانیش له‌لیمان بویگه‌ ده‌روه‌ده‌رى، وه‌نا چوین تاریف ئه‌و جایه‌ڵ جوانه‌یله‌ كریه‌یگ  ك له‌ نه‌مام عومر بوین و ده‌س تاوانبار زوورمیان بڕى و خسته‌یانه‌ زندانه‌یل تاریك و هویچ وه‌ختى له‌لى قورتار نه‌وین؟ ده‌روه‌ده‌رى ئه‌وانه‌ هه‌تاهه‌تایى بوى و له‌لى ده‌رنه‌چین ئه‌ڕا ئى دونیا. جویر ئه‌وه‌ك شاعر گه‌ورا ئه‌حمه‌د مته‌ر ئویشیگ :

ئیمه‌ منیمنه‌ ڕیه‌ن و قه‌ساویش شوانمانه‌

جویر ده‌روه‌ده‌ر ژیه‌یمن له‌ى وڵات خوه‌مانه‌

كار زووره‌و بایه‌سه‌ تابووت خوه‌مان ئه‌ڵگریم

هه‌ر خوه‌مانیش دابنه‌یم پرسه‌ى ئه‌و مردنمانه‌

تاریف ده‌روه‌ده‌رى ئه‌وه‌سه‌، ك دویرید له‌و شوونه‌ ك له‌تى گه‌ورا بویده‌و گشت وه‌ختى هویرد ها لاى ، فره‌جار ئه‌و ده‌روه‌ده‌ریه‌ لاشه‌د فڕه‌ ده‌یگ  ئه‌را شوونیگ  دویر له‌و شوونه‌ ك پاد له‌بان خاكه‌گه‌ى هووكاره‌ بوى، وه‌لى نوڕید فره‌جاریش هه‌رچه‌نى ئه‌و ماوه‌ فره‌و دویر بووگ مه‌حاڵه‌ ئه‌و ئاگر ده‌روینه‌ بكوشنیگه‌وه‌و ئه‌و یادگاریه‌یل جوان وخوه‌شه‌ له‌هویرد بووه‌یگ  یا شه‌وق تامازروو دڵد ئه‌را خوه‌شه‌ویسه‌یلد بكوشنیگه‌وه‌و ڕه‌سمه‌یلیان له‌وه‌رچه‌و لاوه‌یگ .

جار له‌یوایشه‌ هه‌س ده‌روه‌ده‌رى له‌یوا له‌ ئاده‌میزاد ئه‌كا پشتى چه‌منیگ  و دڵى شكنیگ ، ئمجا ئایا حاڵ ئه‌و په‌نابه‌ره‌یله‌ له‌ ده‌یشت وڵات چوینه‌ ك وه‌ زوور له‌ خاك خوه‌یان ده‌ركریان جویر كورده‌یل فه‌یلى ك كووچ زووره‌ملى وه‌پیان كریاو ئه‌وانه‌یش ك له‌تاو زوڵم و سته‌م هه‌یواین و ده‌روه‌ده‌رى و ئاواره‌یى بویه‌ به‌شیان.