ئايا راسه‌ زانايه‌يل عراقى وه‌ى شيوازه‌ مامڵه‌ بكريه‌ن ؟

محه‌مه‌د  ته‌وفيق عه‌لاوى

شه‌فه‌ق نيوز/ گشت ساڵيگ ده‌زگايه‌يليگ له‌ وڵاته‌يل پيشكه‌فتگ وه‌تايبه‌ت له‌ ئه‌مريكا ده‌س ئه‌كه‌نه‌ كلكردن شانده‌يليگ ك نوێنه‌رايه‌تى حكومه‌ت و كومپانيايه‌يل گه‌وراى ئه‌هلى ئه‌كه‌ن و سه‌ردان زانكۆيه‌يل گرينگ ئه‌كه‌ن و ته‌ماشاى ئه‌تروحه‌يل ماسته‌ر و دكتۆرا ئه‌كه‌ن له‌گشت تايبه‌تمه‌ندييگه‌و، ئى مه‌سه‌له‌يشه‌ وه‌ل منيش روێدا، له‌وه‌ختيگ ك وه‌ل به‌شداره‌يل تر كومپانياى(1st Call) ئه‌را دراوردن و به‌رهه‌مهاوردن به‌رميله‌يل گه‌وراى ته‌كنيكى ئامێته‌كرياگ داشتيم له‌بان قورس كومپيۆته‌ر له‌ يه‌كه‌مين دامه‌زراننى له‌ ناوڕاس ساڵه‌يل نه‌وه‌د سه‌رده‌ى وه‌رين له‌ شار برايتۆن بريتانى.

 

له‌و شاره‌ زانكۆێگ نموونه‌يى تايبه‌ت وه‌ زانسته‌يل كۆمپيته‌ر وجوود داشت و ئيمه‌يش ئه‌ندازياريگ پله‌ به‌رز له‌ داهێنان و نموونه‌يى داشتيم ك سه‌رپه‌رشى تيم كومپانياگه‌ كردياد ئه‌را دراوردن فيلم تايبه‌ت وه‌ خوه‌ندكاره‌يل له‌وه‌ر ئاشناكردن مه‌ترسيه‌يل و شوونه‌وار وه‌كاربردن مادده‌يل بيهووشكه‌ر.

 

دوياى ته‌مامبوين له‌ به‌رهه‌مهاوردن ئه‌و به‌رنامه‌ى نموونه‌ييه‌ له‌ به‌رژه‌وه‌ندى وزاره‌ت خوه‌نين باڵاى بريتانى(DfE)ئه‌و ئه‌ندازياره‌ داواى ده‌س له‌كاركيشانه‌وه‌ كرد، ئمجا وه‌ختيگ پرسيار له‌باره‌ى هووكار داواكاريه‌گه‌ى كردم، وته‌پيم: من خوه‌شم ئه‌ياد كار وه‌لدانا بكه‌م، وه‌لێ من له‌ دويا ساڵ خوه‌نينم له‌ زانكۆ تيميگ سه‌ر وه‌ كومپانيايگ گه‌وراى ئه‌مريكى هاتنه‌ لام و دوياى ته‌ماشاكردن ئه‌تروحه‌ زانكۆيه‌گه‌م نمايشيگ وه‌ مووچه‌ى فريه‌ به‌رزيگ وه‌ل شوون نيشته‌جى خاسيگ و سه‌ياره‌يگ و زه‌مانه‌تكردن ته‌ندروسى ئه‌را خوه‌م و خيزانه‌گه‌م له‌ حاڵه‌ت هاوسه‌رگيريكردنم و خوه‌ندنگاى تايبه‌ت ئه‌را مناڵه‌يلم ك ئه‌گه‌ر بويمه‌ خاوه‌ن مناڵ له‌ ئاينده‌ ئه‌رام خستنه‌ڕوى و وتنه‌پيم: ئى نمايشه‌ وه‌رده‌وامه‌ ئه‌را ماوه‌ى دوساڵ له‌شوون ده‌رچگنديش له‌ زانكۆ، ك ئيسه‌يش ئه‌و دوساڵه‌ خه‌ريكه‌ ته‌مام ئه‌دێ و ناخوازم ئه‌و ده‌رفه‌ته‌ له‌ده‌س خوه‌م بيه‌م.

 

بيگومان ئه‌يه‌ كرده‌وه‌ى ده‌وڵه‌ته‌يل و حكومه‌ته‌يل و ئه‌و ده‌زگايه‌يله‌سه‌ ك حورمه‌ت خوه‌يان ئه‌گرن و حورمه‌ت له‌ زانست و زانايه‌يليان ئه‌گرن، ئيمه‌يش له‌ عراق زانايه‌يلمان و رووڵه‌يل نموونه‌ييمان له‌ده‌س ئه‌يه‌يم، ك ئايا وه‌رپرسه‌يل له‌ى راسيه‌يله‌ كه‌ى بڕه‌سنه‌و تا گرينگى بيه‌نه‌ ئى چينه‌ ك شايه‌ت بوونه‌ ناوك بنه‌ڕه‌تى پيشكه‌فتن و په‌ره‌داين وڵات!!

محه‌مه‌د ته‌وفيق عه‌لاوى