مقه‌یه‌ت بوون...شووڕشه‌گه‌ كوشن

شفق نيوز

كرده‌ى وه‌رجه‌ ساڵه‌یلیگ  له‌یرا له‌بان خاك دوچه‌مان.

وه‌ختى گه‌ورا تاوانبار و خوینمژ و دز و ئایه‌مكوشه‌یل ئازاد كریان وه‌رجه‌ ئه‌وه‌ك بهه‌یوایگ وه‌ چه‌ن مانگیگ تا وه‌رده‌وامى بیه‌نه‌ كاره‌گه‌ى له‌شوون خوه‌ى، یجگه‌ ئه‌وه‌یش وه‌سیه‌ت كرده‌ دارو ده‌سه‌و سه‌ركرده‌یل رژیمه‌گه‌ى ده‌س بكه‌نه‌ دزى و تاڵانكردن چشته‌یل ناو وڵات و ئه‌مبار یا خه‌زینه‌و سه‌ربازگایه‌یل وه‌ پیسترین شیوه‌ ك وڵاته‌گه‌ به‌تاڵكردن له‌گشت به‌ڵگه‌و دارایى و ته‌نانه‌ت شوونه‌واره‌یل ناو موزه‌خانه‌ یا مه‌تحه‌فیش. ئمجا له‌وه‌ختیگ  ك دكتاتۆر عراق خوه‌ى له‌ناو كونایگ  شارده‌وه‌ له‌ژیر زه‌وى، دكتاتۆر تونس وه‌ ته‌یاره‌یگه‌وه‌ له‌بان ئاسمان ناوچه‌گه‌ به‌رزه‌و بوى و له‌شوون خوه‌ى مه‌ردمانیگ هیشته‌جى له‌وانه‌ك ئه‌رك كپه‌وكردن شووڕش و راپه‌ڕین كه‌فته‌ بانیان، وه‌ جووریگ  ك ته‌فروتوینه‌ى گشتیان كردن و ڕوى كردنه‌ شوونه‌یل تر له‌وڵات و ده‌وڵته‌یل تر له‌تاو زاڵم دكتاتۆر ك وه‌گشت شیوه‌یگه‌وه‌ كه‌فتنه‌ ناویان و ته‌ڕ و وشك وه‌یه‌كه‌وه‌ سزانن و خوین هاووڵاتیه‌یل رشانن.

راسه‌ ك دكتاتۆر بار خوه‌ى پیچاوه‌و هه‌یواى ئه‌را به‌هه‌یشتیگ تر دویر له‌ ماڵ سه‌رۆكایه‌تى و به‌نه‌یلى، وه‌لى رژیمیگ هیشته‌جى خوه‌ى چه‌ودیرى په‌روه‌رده‌كردن و دروسكردنیان كرد زیاتر له‌ بیس ساڵ وه‌ هه‌مان هویر و ریڕه‌و رژیم عراق ك وه‌جووریگ ره‌فتار و هه‌ڵسووكه‌فت كه‌ن نیه‌یلن پیشكه‌فتن ڕوى به‌یگ و بوونه‌ وه‌ربه‌س له‌نواى گشت بنیات و پیشكه‌فتنیگ دیموكراسى ئازاد. بیگومان هه‌یواین دكتاتۆر مه‌عناى جى وه‌جیكردن شووڕش یا ئاڵشتكردن رژیم نیه‌، چوینكه‌ تاریخ چشته‌یل فره‌یگ له‌باوه‌ت هه‌یواین و هاتنه‌وه‌ نویساگه‌و توومار كردگه‌و تائیسه‌یش شووڕش موسه‌ده‌ق ئیرانى و هه‌یواین شاى ئیران له‌ یادگارى سیاسى ملله‌ته‌یل ئیرانى نویساگه‌. له‌ تونسیش هیمان هیز ئه‌و دكتاتۆره‌ زاڵن له‌بان چشته‌یل گرینگ یا موهمیگ له‌ده‌وڵه‌ت و كوومه‌ڵگاو تواناى ڕویداگ گویڕانكارى دیریگ وه‌و جووره‌ ك خوه‌ى توایگه‌ى و دژ ئومید و ئاره‌زووه‌یل مه‌ردم. له‌وه‌ر ئه‌وه‌ زوورم ده‌زگایه‌یل گرینگ یاموهم له‌ده‌وڵه‌ت له‌ به‌رهه‌م و دروسكرن هویر تۆتالیتارى یا شموولیه‌ ك له‌لایه‌ن زه‌ینولعابدین دكتاتۆره‌وه‌ سه‌رپه‌رشى كریا جویر ده‌زگایه‌یل سه‌ربازى و ئاسایش و ته‌نانه‌ت په‌رله‌مانیش.

ئمجا وه‌ل گشت ئه‌گه‌ره‌یلا، ئه‌وه‌ك ئیسه‌ ڕویده‌یگ، ئشاره‌ت وه‌ جووریگ  له‌ پیشكه‌فتن له‌ كار مللى ئۆپۆزسیۆن ئه‌كا له‌و ده‌وڵه‌ته‌یل خاوه‌ن رژیم تۆتالیتاریه‌، ك بیگومان یه‌یش یه‌كیگه‌ له‌ ئه‌نجام كاردانه‌وه‌ى مه‌سه‌له‌ى گویڕانكارى وه‌رده‌وام له‌وڵات ناونى دوچه‌مانه‌وه‌ ئه‌را زوورم رژیمه‌یل سیاسى خاوه‌ن ئه‌قڵیه‌ت و رووشنهویرى حوكم توتالیتارى یا شموولى.

ئه‌وه‌ك ئمڕوو له‌ تونس ڕویده‌یگ، جویر په‌یام گرینگ یا فره‌موهمیگه‌ ئه‌را ملله‌ته‌یل ئى ناوچه‌ ك ده‌یه‌ها ساڵه‌ له‌ژیر ده‌سڵات سته‌مكارى ژیه‌ن و له‌هه‌مان وه‌خت جویر مزگانییگه‌ ئه‌را گویڕانكارى وه‌رفراوان له‌زوورم وڵاته‌یل ناوچه‌گه‌. هه‌ر له‌وه‌ر ئه‌وه‌یش بایه‌سه‌ ملله‌ت مقه‌یه‌ت بوون، چوینكه‌ زاڵمه‌یل شووڕشه‌گه‌ كوشن ئه‌گه‌ر مه‌ردم دیموكراسیخواز غافڵ بوون له‌و ڕخه‌وبردن و دعایه‌و كاره‌ساته‌یل دزى و تاڵان و كوشتنكارى و له‌ناوبردن ئومید و ئاره‌زووه‌.

 

كفاح مه‌حموود كه‌ریم