بژارده‌یلمان وه‌ مه‌رامه‌و سنوورداره‌

شفق نيوز

  وه‌ل نزیكه‌وبوین هه‌ڵوژاردنه‌یل په‌رله‌مان كوردستان و له‌ساى ئى بار ئیسه‌ى عراق و قه‌یرانه‌یل سه‌خته‌ ك هاته‌سه‌ تویش ده‌وڵه‌ته‌یل هاوسا، بایه‌سه‌ هویر له‌ ئاكام هه‌ڵوژاردنه‌یل و شوونه‌وار خاس و خراوى و كاریگه‌ریى له‌بان كیشه‌ى كورد فه‌یلى بكه‌یم.

له‌ى هه‌ڵوژاردنه‌یله‌ بڕیگ له‌ حزبه‌یل كویه‌ن ك تاریخ دویر و دریژ و مه‌ردم و تواناى فریه‌یگ دیرن كه‌فنه‌ ركابه‌رى یه‌كترى، وه‌لى وه‌بى نوێنه‌رایه‌تى كورد فه‌یلى.

ئى مه‌سه‌له‌یشه‌ چووده‌و ئه‌را خه‌مسه‌ردى حكوومه‌ت هه‌رێم له‌ دویا كابینه‌گه‌ى ك كورد فه‌یلى له‌تى وجوود نه‌یرید، ئنجا ئه‌یه‌ گشت باسه‌گه‌ نیه‌و حاڵه‌ته‌گه‌ وه‌ ته‌واوى جیاواز نیه‌ له‌و بواره‌یل تر ژیانه‌ ك بایه‌سه‌ وه‌رده‌وام بوود وه‌ل هه‌وه‌جه‌یل وه‌رده‌وامى به‌شداریكرن سیاسى و رووشنهویرى و كوومه‌ڵایه‌تى و ئابووریمان له‌تى له‌ كوردستان یا له‌حكوومه‌ت عراقى.

وه‌ چه‌واشه‌ى هویر وڕاى رووڵه‌یل ملله‌ته‌گه‌مان، باوه‌ڕم ئه‌وه‌سه‌ ك كیشه‌گه‌ ته‌نیا ئه‌وه‌ نیه‌ وجوود له‌ په‌رله‌مان یا حكوومه‌ت نه‌ود، به‌ڵكوو ته‌نیا به‌شداریكردنیگ بى كاریگه‌رییش به‌س نیه‌، چوینكه‌ ئیمه‌ ئه‌زموونداریم و بڕیگ به‌ڵگه‌و هویراو ڕاى كه‌سه‌یل تر دیریم و هه‌ڵویستیان ئاشكراس. راسیه‌یلیگ هه‌ن بایه‌سه‌ وه‌ چه‌و گرینگیه‌و ته‌ماشا بكریه‌ن و له‌وانه‌یش په‌یوه‌ندیه‌یل كوردى و جوگرافیاى هاوبه‌شمان وه‌ل مه‌ردمان تر.

له‌یرا ئه‌خوازم بویشم ك ئه‌یه‌ بار ئیمه‌س له‌ هه‌ڵوژاردنه‌یل ئاینده‌ له‌ كوردستان، وه‌لى له‌باوه‌ت هه‌ڵوژاردنه‌یل نوێنه‌رایه‌تى عراقى، هه‌قه‌یل تر و ئاسوویگ هه‌س، له‌ورا وجوود و ئاماده‌بوین كاریگه‌ر و راسه‌وخۆ دیریم و له‌ورا دڵسووز و ده‌سمیه‌تده‌ر فریه‌یگ دیریم ك هه‌ق كۆتا ده‌نه‌ پیمان، یه‌یش ماناى به‌شداریكردن كه‌سایه‌تیه‌یلیگه‌ له‌ پیكهاتگه‌مان وه‌ل مه‌ردمان تر له‌ژیر ناونیشانه‌یل تر، ئه‌يه‌ ماناى لاداین نیه‌ له‌ پابه‌ندیمان له‌ نه‌ته‌وه‌و مه‌یلداریمان وه‌ره‌و لاى مه‌زه‌وى، به‌ڵكوو ئه‌یه‌ نوڕستن دروسیگه‌ ئه‌را عراق ئمڕوو.

هه‌ر له‌وه‌ر ئه‌وه‌یش بایه‌سه‌ بزانیم ئه‌وانه‌ك نه‌وه‌ له‌دویاى نه‌وه‌ ك كووچ وه‌پیان كریاو ده‌ركریان و هویچ ئاینده‌یگ یا زه‌مانه‌تیگ ئه‌رایان دابین نه‌كریا، ئه‌وانه‌ كورده‌یل فه‌یلیین ك وه‌رجه‌ گشت مه‌ردمانیگ وه‌ مه‌رامه‌و سنوورداره‌، ك یه‌یش هویچ مه‌هانه‌یگ نه‌يريد ئه‌را به‌شدارى نه‌كردن له‌ هه‌ڵوژاردنه‌یل، به‌ڵكوو مه‌سه‌له‌گه‌ له‌یواسه‌ ده‌نگ خوه‌مان بیه‌یمه‌ ئه‌وانه‌ك باوه‌ڕ وه‌ كیشه‌گه‌مان دیرن.

ج . أ