خودا دیرید ئه‌ى عراق

شفق نيوز

له‌ڕوى ژیان ناونى فه‌قیره‌یل و وه‌رپرسه‌یل ك ئه‌وان ته‌نیا هانه‌ هویر پویل و تام و له‌زه‌ت ئى دونیاو فه‌قیریش جه‌ور به‌دبه‌ختى و سه‌ختى فره‌یگ كیشێد.

 

یه‌یش بیجگه‌ قه‌یرانه‌یل سه‌خت ك ژیانى كه‌نه‌ دووزه‌خ راسكانى، دى هه‌ر له‌نه‌وین كاره‌با بگر تا ڕه‌سێده‌ گرانى خوارده‌مه‌نى وه‌بێ مه‌هانه‌ى باوه‌ڕدار، ئمجا بارزگانه‌یل كه‌فنه‌ گیان فه‌قیره‌یل و گشت چشتیگ له‌لیان گران كه‌ن و قانجاز حه‌رام جوور ده‌رفه‌تیگ زاننه‌ى.

 

یه‌یش بیجگه‌ بیكارى و كه‌مى ده‌رفه‌ت كار وه‌تایبه‌ت له‌لاى جایه‌ڵ جوانه‌یل و بیجگه‌ كه‌مى ئاو خواردن و سازگار و نه‌وین خزمه‌تگوزارى و چه‌ودێرى كوومه‌ڵایه‌تى ك پشت و په‌ناى فه‌قیر و نه‌داره‌یله‌ تا ڕه‌سێده‌ مه‌سه‌له‌ى گه‌ناته‌كارى ك باڵ كیشاسه‌ بان گشت لایه‌نه‌یل ده‌وڵه‌ت وه‌بى جیاوازى، ئه‌ویش له‌وه‌ر هووكار ئه‌وه‌ك بڕیگ له‌ سیاسیه‌یل جیوه‌جیكار بازى وه‌ چاره‌نویس عراق كه‌ن و كۆنترۆڵ له‌ده‌سداگه‌و ده‌رفه‌ت بنیاتانین و ئاوه‌دانى ئه‌راى نیشتنه‌سه‌و، ك یه‌یش شوونه‌وار خراویگ له‌لى كه‌فتیه‌سه‌و له‌بان زه‌وى واقع.

 

یه‌یش بیجگه‌ ئه‌وه‌ك ده‌یه‌ها ملیار دۆلار له‌ى بواره‌و خه‌رج ده‌وڵه‌ت بویه‌و چیه‌سه‌ گیرفان بڕیگ دزو جه‌رده‌و گه‌ناته‌كار له‌سایه‌ى نه‌وین ده‌سڵات دادوه‌رى و ئى بار سه‌خته‌ ك عراق له‌تى ژیه‌ید له‌ ئى هه‌مگه‌ ماڵویرانى و كاولكاریه‌ ك ته‌نیا وه‌ قانجاز دز و گه‌ناته‌كاره‌یل ته‌واو بویه‌و بانكه‌یل پڕ كردنه‌ له‌پویل حه‌رام.

 

له‌و داراییشه‌ ك ته‌رخان كریا ئه‌را پرۆژه‌یل دامه‌زرانن ویستگه‌یل به‌رهه‌مهاوردن وزه‌ى كاره‌با، ك تویه‌نریا وه‌ چواریه‌كى ئه‌و پویل تاڵانكریاگه‌ كاره‌باى ته‌واو دابین بكریه‌ید وه‌ دریژى رووژانه‌، وه‌لى ها كوو پرس وپرسكارى و چه‌ودێرى؟ په‌رله‌مان و نه‌خش په‌رله‌مان ك جوور ده‌سڵات بریارناینه‌ هاكوو؟ ئه‌را ئه‌رك خوه‌ى ئه‌نجام نیه‌یدو وه‌رپرسه‌یل نیارێده‌ وه‌رده‌م پرسكارى و جوواودانه‌وه‌و له‌لیان بپرسێد ئى هه‌مگه‌ پویل فره‌ چییه‌ كووره‌؟ كى وه‌رپرسه‌ له‌بان دزینى و له‌ چ وه‌ختیگ بریا؟ وه‌رپرسیاریه‌تى و مقه‌یتیكردن نیشتمانى ها كووره‌؟ ئه‌و قه‌وڵه‌یله‌ ك ئه‌ندامه‌یل په‌رله‌مان دانه‌ى وه‌رجه‌ سه‌ركه‌فتن و ده‌سكه‌فتن پویل و ماڵ ها كووره‌؟

 

دى وه‌ى جووره‌ گشت به‌ڵگه‌یلیگ خریه‌یده‌ ناو زبڵدان، ئمجا ئایا وژدانیان ئسراحه‌ته‌ ك هاووڵاتى بناڵنید وه‌ده‌س گه‌رماى تاوسان و ئه‌وانیش له‌به‌هه‌یشت بژیه‌ن؟ ئایا ئه‌ندامه‌یل په‌رله‌مان خه‌وه‌ر له‌ كه‌مه‌وكردن و تاریخ ئكسپایه‌ر كارت خوه‌راك دیرن؟ ئایا ئه‌ندامه‌یل په‌رله‌مان خه‌وه‌ر له‌ به‌رزه‌وبوین نرخ خوارده‌مه‌نى دیرن؟

 

دى نازانیم كه‌ى یاسایگ ده‌رچوود پشتگیرى هه‌قه‌یل هاووڵاتى بكاو گشت نرخه‌یل بچه‌سپنیدو كه‌س نه‌تویه‌نید وازى وه‌ نرخ بكا، هه‌ر له‌وه‌ر ئه‌وه‌یش بڕیگ گیر فره‌یى پویل و دارنده‌یى هاتگه‌و بڕیگیش خوه‌یان وه‌ چه‌نه‌ها ره‌نگ نیشانده‌ن و مه‌ردمانیگیش هه‌ن باوه‌ڕیش وه‌ى مانگ ره‌مه‌زانیشه‌ نه‌یرن و ته‌ماشاى حاڵ فه‌قیر ناكه‌ن .

 

جومعه‌ عه‌بدوڵڵا

 

ج. ا